Read Diospa Simin Qelqa 2 CRÓNICAS 23 Bible Online

2 CRÓNICAS 23 - Diospa Simin Qelqa bible

2 CRÓNICAS 23

¹Qanchiskaq watapin Joiadaqa imachus yuyaykusqanta ruwarqan, chaypaqmi waqyachirqan pachak soldadoq umallinkunata, hinaspan paykunawan rimanakurqan: Jerohampa churin Azariaswan, Johananpa churin Ismaelwan, Obedpa churin Azariaswan, Adaiaq churin Maasiaswan, Zicriq churin Elisafatwan ima.

²Paykunan Judá suyuntinta purirqanku, hinaspa llapan llaqtakunamanta Leví runakunata, ayllu umallikunata huñumurqanku. Chaymantataq Jerusalenman chayaspa,

³llapan chay huñuykusqa runakunawan Dios yupaychana wasipi reywan rimanakurqanku. Joiadataq paykunata nirqan: — Kaymi kashan reypa churin, paymi suyupi kamachikunqa, Davidpa mirayninmanta Señor Diospa prometesqanman hina.

⁴Chhaynaqa, kay hinatan ruwankichis: Mayqen Leví runakunamanchus sacerdotekunamanchus samana p'unchaypi llank'ay tupasuqtiykichisqa kinsamanmi t'aqakunkichis, huk t'aqan punkukunata makilla cuidankichis,

⁵iskaykaq t'aqataq reypa wasinta makilla cuidankichis, kinsakaq t'aqataq Teqsi Punku nisqata makilla cuidankichis. Wakin qharikunataq Señor Dios yupaychana wasi patiokunapi kankichis.

⁶Manan pipas Señor Dios yupaychana wasitaqa haykunqachu, aswanpas llank'ashaq sacerdotekuna Leví runakunallapiwanmi, paykunaqa ch'uyanchasqa kaspankun haykunqaku, wakin qharikunataq ichaqa Señor Diospa kamachikuyninman hina hawallapi kanqaku.

⁷Leví runakunataq llapa ladomanta reyta muyuykunqaku, sapanka qhari armayoqkama. Pipas yupaychana wasiman haykuqqa wañuchisqan kanqa. Paykunallan reyta waqaychanqaku lloqsiqtinpas haykuqtinpas, nispa.

⁸Hinan Leví runakunapas llapan Judá runakunapas sacerdote Joiadaq kamachisqanta hina ruwarqanku. Chaymi sapanka umallikunaqa runankunata pusarqan, samana p'unchaypi llank'aq haykuqkunata, hinallataq llank'ananmanta samapuqkunatapas sacerdote Joiada mana mayqenninkutapas kacharirqanchu.

⁹Hinan Joiadaqa pachak soldadoq umallinkunaman lanzakunata, hatun escudokunata, huch'uy escudokunatawan qorqan. Chaykunaqa rey Davidpan karqan, Dios yupaychana wasipitaq kasharqan.

¹⁰Llapan runakunatataq reypa muyuriqninpi churarqan sapankata armayoqtakama, paykunaqa altar qayllapin kasharqanku yupaychana wasiq wichay ladonmanta uray ladonkama.

¹¹Chaymantataq Joiadaqa churinkunapiwan reypa churin Joasta pusamurqanku, hinaspa payman coronata churarqanku. Reypa imachus ruwanan qelqatawan qospanku rey kasqanta rimarirqanku. Hinaspan aceitewan hawirqanku, qaparirqankutaq: ¡Kawsachun rey! nispa.

¹²Chaymi Ataliaqa runakunaq qaparispa phawasqanta reyta hatunchasqankutawan uyarispa Señor Dios yupaychana wasipi kashaq runakunaman rirqan.

¹³Hinaspan reyta rikurqan punku haykunapi rey tusa qayllapi sayashaqta. Reypa qayllanpin umallikunaqa trompeta tocaqkunapiwan sayasharqanku. Llapan runakunataq putututa tocaspanku q'ochukusharqanku, tocanayoq takiqkunapas yupaychaykunata takichisharqanku. Hinan Ataliaqa p'achanta llik'ikuspa qaparirqan: — ¡Q'otukuymi kayqa! ¡Q'otukuymi kayqa! nispa.

¹⁴Joiadaqa manan yupaychana wasipi Ataliata wañuchinata munarqanchu, chaymi pachak soldadoq umallinkunata kamachirqan: — Guardiakunaq chawpinta hawaman horqoychis, pipas hark'akuqtataq wañuchiychis, nispa.

¹⁵Chaymi paykunaqa reypa wasin qayllapi Ataliata hap'irqanku Caballo Punku nisqaman chayaykushaqtin, chaypitaq wañuchirqanku.

¹⁶Chaymantataq Joiadaqa rimanakurqan reywan llapan runakunawan ima, llapanku Señor Diospa llaqtan kanankupaq.

¹⁷Hinan llapan runakunaqa Baal dios yupaychana wasita rirqanku, hinaspa chayta thunirqanku. Altarninkunatapas idolonkunatapas ñut'uta p'akirqanku, Baalpa sacerdoten Matantataq altarkuna qayllapi wañuchirqanku.

¹⁸Chaymantataq Joiadaqa Señor Dios yupaychana wasipi llank'achinankupaq churarqan Leví runa sacerdotekunata, paykunatan Davidqa chaypi llank'anankupaq churasqa. Paykunan Moisespa kamachikuynin qelqaman hina ruphachina sacrificiokunata haywananku karqan, kusikuspa takispa Davidpa kamachikuyninman hina.

¹⁹Churallarqantaq Señor Dios yupaychana wasiq punkunkuna qhawaqkunata, ama pipas mana ch'uyanchasqa kashaspa haykunankupaq.

²⁰Chay qhepatataq Joiadaqa pachak soldadoq umallinkunapiwan allinnin runakunapiwan, llaqta kamachikuqkunapiwan, llapan llaqta runakunapiwan rirqanku, hinaspa Señor Dios yupaychana wasimanta kamachikunan wasiman reyta pusarqanku, Wichay Punkunta chay wasiman pusaykuspankutaq, kamachikuy tiyanapi tiyaykachirqanku.

²¹Hinan Judá suyu llapan llaqta runakunaqa kusikurqanku. Ataliaqa wañupurqanñan, chaymi llaqtaqa thak-nisqa kapurqan.