Read Diospa Simin Qelqa 2 CRÓNICAS 24 Bible Online

2 CRÓNICAS 24 - Diospa Simin Qelqa bible

2 CRÓNICAS 24

¹Joasqa qanchis watayoqmi karqan kamachikuyta qallarishaspa, kamachikurqantaq Jerusalenmanta tawa chunka watata. Mamanqa Beersebamantan karqan Sibia sutiyoq.

²Sacerdote Joiadaq tukuy kawsasqan tiempopin Joasqa Señor Diospa munayninman hina chaninta ruwarqan.

³Joiadaqa iskay warmitan Joaspaq horqopurqan, hinan payqa churiyarqan qhari wawakunata warmi wawakunatawan.

⁴Chay qhepatataq Joasqa Señor Dios yupaychana wasita allichayta yuyaykurqan.

⁵Hinan sacerdotekunata Leví runakunatawan huñuykuspa nirqan: — Judá suyuq llapan llaqtankunata puririychis, hinaspa chaypi tiyaq runakunamanta sapa wata qonanku qolqeta huñumuychis Señor Diosninchispa wasinta allichanapaq. Usqhayllapunin chaytaqa ruwankichis, nispa. Leví runakunataq ichaqa mana usqharqankuchu.

⁶Chaymi reyqa uma sacerdote Joiadata waqyachispa nirqan: — ¿Imanaqtinmi Leví runakunata mana usqhachinkichu Judá suyuntinmanta Jerusalén llaqtamantawan pagananku qolqeta apamunankupaq? Chaytaqa Señor Diospa kamachin Moisesmi llapan huñuykusqa Israel runakunata kamachisqa, kamachikuy simi qelqasqa p'alta rumikunaq kasqan karpapaq qonankupaq, nispa.

⁷(Chay mana chanin Atalian churinkunapiwan Dios yupaychana wasita llat'anaq haykusqaku, hinaspa chaypi Diospaq llapan t'aqasqa kaqkunatapas Baal diosninkunata servispa tukupusqaku).

⁸Hinan reyqa kamachikurqan huk cajata ruwanankupaq, chaytan churarqanku yupaychana wasiq punkun hawaman.

⁹Hinallataq Jerusalenpi Judá suyuntinpiwan tiyaq runakunaman willarqanku pagananku qolqeta apanankupaq, Diospa kamachin Moisés ch'inneqpi Israel runakunata kamachisqanman hina.

¹⁰Chaymi llapan umallikunapas runakunapas pagananku qolqeta kusisqa aparqanku, hinaspa cajaman churarqanku hunt'achinankukama.

¹¹Qolqe churana cajatan Leví runakunaqa reypa oficialninkunaman apaqku, chay oficialkuna askha qolqeyoqña caja kashasqanta reparaqtintaq, reypa qelqaqninpiwan uma sacerdote oficialninpiwan hamuqku, paykunan chay cajata qasichispa kaqta churananman kutichipuqku. Ahinatan sapa kuti ruwarqanku, chaymi askha qolqeta huñurqanku.

¹²Reytaq Joiadapiwan chay qolqeta qorqanku Señor Dios yupaychana wasipi llank'achiqkunaman, hinan paykunaqa mink'arqanku rumi thupaqkunata, k'ullu llaqllaqkunata, fierropi, broncepi llank'aqkunatawan, Señor Dios yupaychana wasita allichanankupaq.

¹³Chay llank'aqkunaqa kusatan llank'aspanku usachirqanku, chaymi Dios yupaychana wasita allicharqanku, hinan imaynachus ñawpaq karqan ahina sumaq allichasqa kapurqan.

¹⁴Llank'ay tukukuqtintaq puchu qolqeta reyman sacerdote Joiadamanwan aparqanku, paykunataq chay qolqemanta ruwachirqanku Señor Dios yupaychana wasipi llank'anapaq herramientakunata, ruphachina sacrificiota haywanapaq serviciokunata, puruñakunata, qorimanta qolqemanta wak serviciokunatawan. Joiadaq kawsasqan tukuy p'unchaykunapiqa Señor Dios yupaychana wasipi haywashallarqankupunin ruphachina sacrificiokunata.

¹⁵Joiadaqa sinchi yuyaqllañan wañukapurqan, pachak kinsa chunka watayoq kashaspa.

¹⁶Hinan p'ampapurqanku Davidpa Llaqtan nisqapi reykuna p'ampanapi, Israel runakunapaqpas Señor Diospaqpas yupaychana wasipaqpas allinkunata ruwasqanrayku.

¹⁷Joiada wañupusqan qhepatataq, Judá suyu umallikunaqa reyman qayllaykuspa kasukunankupaq prometekurqanku, hinan reyqa sumaqta paykunata uyarirqan.

¹⁸Ñawpa taytankuq Diosnin Señorta yupaychana wasita saqerparispankutaq Asera diosata llaqllasqa rikch'aykunatawan yupaycharqanku. Chaymi Diosqa sinchita phiñakurqan Jerusalén runakuna, Judá suyu runakuna contra chay huchanku hawa.

¹⁹Hinaña Señor Diosqa profetakunata kacharqan payman kutirikunankupaq, profetakunaña runakunata anyarqan chaypas, paykunaqa manapunin kasukurqankuchu.

²⁰Sacerdote Joiadaq churin Zacariastan Diospa Espiritun hunt'aykurqan, chaymi payqa llapa runakunaq qayllanpi alto patapi sayaykuspa nirqan: — Señor Diosmi nin: ¿Imanaqtinmi kamachikuy simiyta sarunchakunkichis? Mana allinkunan hamusunkichis. Saqerpariwasqaykichisraykun ñoqapas qankunata saqerparisqaykichis, nispa.

²¹Paykunataq ichaqa Zacarías contra yuyaykurqanku, hinaspan Señor Dios yupaychana wasi patiopi rumiwan ch'aqespa wañuchirqanku reypa kamachisqanman hina.

²²Rey Joasqa manan yuyarikurqanchu Zacariaspa taytan Joiada payta khuyapayasqanta, aswanpas churinta wañuchirqan. Zacariasmi wañunan patapi nirqan: Señor Diospuni rikuchun kay ruwasqaykita, paymi cuentata mañasunki, nispa.

²³Cosecha tukuy tiempotataq Siria ejercitoqa Joás contra hamurqan, hinaspa Jerusalenman Judá suyuntinman ch'eqeykurqanku, wañuchirqankutaq suyu llaqtakunapi kashaq llapan umallikunata, hinaspa llapan llat'anasqankuta Damasco llaqtapi tiyaq reykunaman apachirqanku.

²⁴Siria ejercitoqa pisillan hamurqanpas, ichaqa Señor Diospunin hap'ichirqan ancha askha Judá ejercitota. Ñawpa taytankuq Diosnin Señorta Judá runakunaq saqerparisqanku hawan Señor Diosqa Joasta muchuchirqan.

²⁵Siria soldadokuna ripuqtinkun Joasqa sinchi k'irisqa qhepapurqan, hinan puñunapi onqoshaqtin kikinpa oficialninkuna sacerdote Joiadaq churinta wañuchisqan hawa pay contra rimanakuspanku puñunanpi kashaqta wañuchirqanku. Chaymantataq Davidpa Llaqtan nisqapi p'ampapurqanku, ichaqa manan reykunata p'ampanapichu.

²⁶Joás contra sayariqkunan karqan Amón llaqtayoq warmi Simeatpa churin Zabad, Moab llaqtayoq warmi Simritpa churin Jozabadpiwan.

²⁷Joaspa churinkunamantapas, pay contra askha willakuykunamantapas, Señor Dios yupaychana wasi allichasqanmantapas Reykunaq Willakuynin Qelqata t'aqwisqanku qelqapi qelqasqan kashan. Rantinpitaq churin Amasías kamachikurqan.