Read Diospa Simin Qelqa 2 CRÓNICAS 26 Bible Online

2 CRÓNICAS 26 - Diospa Simin Qelqa bible

2 CRÓNICAS 26

¹Chaymantataq llapan Judá suyu runakunaqa Uziasta reyta churarqanku taytan Amasiaspa rantinpi, Uziasqa chunka soqtayoq watallayoqmi karqan.

²Payqa taytan wañukapusqan qhepatan Elat llaqtata Judá suyuman kutichipuspa wakmanta sayarichirqan.

³Uziasqa chunka soqtayoq watayoq kashaspanmi kamachikuyta qallarirqan, Jerusalenmantataq phisqa chunka iskayniyoq watata kamachikurqan. Maman Jecoliasqa Jerusalén llaqtayoqmi karqan.

⁴Uziasqa Señor Diospa munayninman hinan ruwarqan, imaynatachus taytan Amasías ruwarqan hinata.

⁵Payqa Zacariaspa tukuy kawsasqan p'unchaykunapin Diosta servirqan, Zacariasmi Uziasmanqa Dios manchakuyta yachachirqan. Señor Diosta Uzías servishallaqtinqa, allintan Señor Diosqa payta yanaparqan.

⁶Uziasmi Filistea runakunawan maqanakuq rirqan, hinaspan Gat llaqta perqata, Jabnia llaqta perqata, Asdod llaqta perqatawan thunirqan. Chaymantataq Filistea suyupi Asdod hap'iypi llaqtakunata wakin llaqtakunatapas wakmanta sayarichirqan.

⁷Diosmi payta yanaparqan Filistea runakunata, Gur-baalpi tiyaq Arabe runakunata, Meún runakunatapas atipananpaq.

⁸Amón runakunataq contribucionta Uziasman pagarqanku. Chaymi Uziasqa ancha hatun atiyniyoq kapurqan, mentasqa kasqanpas Egipto qorpakamaraqmi uyarikurqan.

⁹Uziasqa allin perqasqa torrekunatan sayarichirqan Jerusalenpi Esquina Punku patapi, Wayq'o Punku patapi, llaqta perqa muyurina patapi ima.

¹⁰Hinallataq campopipas torrekunata sayarichirqan. Shefela moqo-moqopi pampakunapiwanmi askha uywan karqan, chaymi unu p'uytukunata askhata t'oqorqan. Uziasmanqa chakra llank'anan gustarqan, chaymi orqo-orqokunapi allin hallp'akunapi runankunaqa uvas chakrakunapi wak chakrakunapipas llank'arqanku.

¹¹Uziaspaqa kallarqantaqmi allin wakichisqa awqa-tinkuyman riq ejerciton. Reypa yuyaychaqnin Hananiaspa kamachisqan ruwaq reypa qelqaqnin Jeielpiwan oficialnin Maasiaspiwanmi soldadokunata t'aqa-t'aqata huñuqku.

¹²Llapan ayllukunaq umallinkunan karqan iskay waranqa soqta pachak allin maqanakuq qharikuna.

¹³Paykunan kamachirqan kinsa pachak qanchis waranqa phisqa pachaknin allin maqanakuq soldadokunata. Ahinapin allin atiyniyoq ejército karqan rey Uziaspa awqankunawan maqanakunankupaq.

¹⁴Uziasqa chay llapa ejercitomanmi qorqan escudokunata, lanzakunata, cascokunata, qhasqo unkukunata, wach'inakunata, warak'akunatawan.

¹⁵Jerusalenpitaq wach'ina maquinakunata ruwachirqan, chay maquinakunataqa allin yachaysapakunan chayllaraq kamarirqanku. Churarqankutaq torre patakunaman, perqa muyurina patakunamanwan wach'ina wach'iqpaq, hatun rumikuna warak'aqpaq ima. Uziastaqa Diosmi anchatapuni yanaparqan ancha atiyniyoq kanankama, chaymi hinantinpi mentasqa kapurqan.

¹⁶Allin atiyniyoq kaspantaq Uziasqa sinchitapuni hatunchakurqan, chay hinapin waqllipurqan. Diosnin Señor Dios contra sayarispanmi, payqa yupaychana wasita haykurqan incienso altarpi inciensota q'apachiq.

¹⁷Chaymi sacerdote Azariasqa Señor Diospa pusaq chunka sacerdotenkunapiwan qhepanta haykurqanku, paykunaqa mana manchakuq allin qharikunan karqanku.

¹⁸Hinaspan rey Uziasta sut'inta nirqanku: — ¡Yaw, Uzías! Señor Diosman incienso q'apachiyqa manan qanmanchu tupasunki, aswanpas Aaronpa miraynin sacerdotekunallamanmi, paykunan Señor Diosman inciensota q'apachinanpaq t'aqasqaqa. ¡Lloqsiy kaymanta! Huchallikunkin chayta ruwaspa, Señor Diosqa manañan saminchasunkimanchu, nispa.

¹⁹Hinan Uziasqa incienso q'apachina hap'intin phiñakuspa rawrarirqanraq. Incienso q'apachina altar qayllapi sacerdotekunapaq phiñakushaqtintaq, mat'inpi lepra onqoy rikhurirqorqan.

²⁰Uma sacerdote Azarías llapan sacerdotekunapiwan payta qhawariqtinkutaq, Uziasqa mat'inpi lepra onqoyniyoq kapushasqa, chaymi usqhaylla lloqsichimurqanku. Uzías kikinmi usqhaylla lloqsimurqan Señor Diospa muchuchisqanta reparakuspa.

²¹Ahinapin rey Uziasqa wañunankama lepra onqoyniyoq kapurqan, chaymi sapaq wasipi t'aqasqa tiyarqan, Señor Dios yupaychana wasiman haykuyninqa hark'asqan karqan. Rantinpiqa churin Jotammi palaciopi tiyarqan, kamachirqantaq Judá suyu runakunata.

²²Uziasmanta wakin willakuykunaqa qallariymanta tukukuykama Amozpa churin Profeta Isaiaspa Qelqanpi qelqasqan kashan.

²³Karqanmi reykunaq hallp'an ayakunata p'ampanapaq, Uzías wañupuqtintaq chaypi p'ampapurqanku, kay hinatan yuyaykurqanku: Payqa lepra onqoyniyoqmi karqan, nispanku. Chay cheqasmi kasharqan ñawpa taytankuq aya p'ampanan qayllapi. Chay qhepatataq churin Jotam rantinpi kamachikurqan.