Read Diospa Simin Qelqa 2 CRÓNICAS 28 Bible Online

2 CRÓNICAS 28 - Diospa Simin Qelqa bible

2 CRÓNICAS 28

¹Ahazqa iskay chunka watayoqmi karqan kamachikuyta qallarishaspa, kamachikurqantaq Jerusalenmanta chunka soqtayoq watata. Payqa manapunin Señor Diospa munayninman hinachu ruwarqan, manan ñawpa taytan David hinachu ruwarqan,

²aswanpas imatachus Israel reykuna ruwarqan chay hinatan paypas ruwallarqantaq. Baal diospa rikch'ayninkunatan unuyachispa yupaychanapaq ruwakurqan.

³Ben-hinom wayq'opin sacrificiokunata ruphachirqan, wawankunatapas sacrificiopi haywaspa ruphachirqan, mana iñiq runakunaq millay ruwasqanman hina, chay mana iñiq runakunatan Señor Diosqa wikch'usqa Israel runakunaq qayllanmanta.

⁴Hinallataq sacrificiokunata haywarqan, inciensotapas q'apachirqan wak'a dios yupaychana altarkunapi, moqo patakunapi, llapan k'allmasapa sach'a chakikunapi ima.

⁵Chaymi Diosnin Señor Diosqa Siria suyu reyman Ahazta hap'ichirqan, Siria runakunataq pasaqta atipaspanku, askha runata presota hap'ispa Damasco llaqtaman aparqanku. Chay hinallataq Israel reymanpas hap'ichirqan, hinaqtinmi paypas pasaqta atipallarqantaq.

⁶Remaliaspa churin Israel rey Pekaqa, Judá suyu runakunatan huk p'unchayllapi wañuchirqan pachak iskay chunka waranqa allin maqanakuq qharikunata, ñawpa taytankuq Diosnin Señorta Judá runakunaq saqerparisqan hawa.

⁷Efraín ayllumanta allin maqanakuq qhari Zicripas wañuchillarqantaqmi Judá reypa churin Maasiasta, reypa wasinpi kamachikuq Azricamta, reyman qatiq kaq Elcanatawan.

⁸Israel reykunaqa Judá suyu wawqenkunatan presota hap'ispa Samaria llaqtaman aparqanku iskay pachak waranqata, warmikunata, erqekunata ima. Apallarqankutaqmi llat'anasqanku askha kaqninkunatapas.

⁹Hinan Israel ejército Samaria llaqtaman kutiykapushaqtin, Señor Diospa huk profetan Oded sutiyoq paykunaman qayllaykuspa nirqan: — Ñawpa taytaykichispa Diosnin Señormi Judá contra phiñakuspa qankunaman hap'ichirqasunkichis, qankunataq ichaqa phiñakuypi rawrarisparaq mana khuyapayaykuspa paykunata wañuchirqankichis, chaytan Diosqa qhawarin mana allinniykichispaq.

¹⁰Kunantaq yuyaykunkichis Jerusalenpi tiyaq Judá suyupi tiyaq qharikunata warmikunatapas kamachiykichis kananpaq, ¿manachu qankunapas reparakunkichis Diosniykichis Señor Dios contra huchallikusqaykichista?

¹¹Chhaynaqa, uyariwaychis: Kutichipuychis preso apamusqaykichis wawqeykichista, Señor Diosmi qankuna contra sinchi phiñasqa kashan, nispa.

¹²Hinan Efraín ayllumanta wakin umalli qharikuna Johananpa churin Azarías, Mesilemotpa churin Berequías, Salumpa churin Ezequías, Hadlaipa churin Amasiaspiwan awqa-tinkuymanta kutipuq ejercitota anyaspa

¹³nirqanku: — Ama kayman presota apamuychischu, Señor Dios contra huchanchiskunaqa sinchi askhañan, chaymi payqa ñoqanchis contra sinchi phiñasqa kashan, qankunataq ichaqa chay huchawanpas yapaykukuyta munashallankichisraq, nispa.

¹⁴Hinan soldadokunaqa chay umallikunaqpas huñuykusqa runakunaqpas ñawpaqenkuman saqeykapurqanku preso apasqanku llapan runakunata, llat'anasqanku llapan kaqkunatapas.

¹⁵Hinan chay tawa umallikunaqa mana p'achayoq presokunata llat'anasqa p'achawan p'achachirqanku. Wakin presokunamantaq qorqanku usut'ata, p'achata, mikhunata, ukyanata ima, hinallataq k'irinkutapas hampiykurqanku. Chaymantataq presokunata Palmerakunayoq Llaqta nisqa Jericopi wawqenkunaman kutichipurqanku, pisi kallpakunatapas asnopi sillaykachispa. Hinaspan chay tawa qharikunaqa Samaria llaqtankuta kutipurqanku.

¹⁶Chay tiempokunapin Judá rey Ahazqa Asiria reyman willaqta kacharqan: Yanapaway, nispa niqta.

¹⁷Chaykamataq Edom suyu runakunaqa wakmanta Judá suyuman phawaykuspa wakin Judá runakunata presota aparqanku.

¹⁸Hinallataq Filistea suyu runakunapas Shefela moqo-moqopi kashaq llaqtakunata, Judá suyu Neguevpi kashaq llaqtakunata llat'anaq phawaykurqanku, hinaspa munaychakurqanku Bet-semesta, Aijalonta, Gederot-ta, Socota llaqtachakunantinta, Timnata llaqtachakunantinta, Gimzotawan llaqtachakunantinta, hinaspa chay llaqtakunapi tiyarqanku.

¹⁹Señor Diospunin Judá suyutaqa k'umuykachirqan rey Ahazpa huchan hawa, paymi Señor Dios contra sinchita huchallikuspa Judá runakunata waqllichirqan.

²⁰Asiria rey Tiglat-pilesertaq Ahazman hamurqan, ichaqa manan yanaparqanchu, aswanmi sasachaykunawan mat'iykurqan.

²¹Ahazqa Señor Dios yupaychana wasita, kamachikunan wasita, umallikunaq wasinkunatawan llat'anarqan, Asiria reyman chay llat'anasqanta qonanpaq, ichaqa manan chaywanpas paytaqa yanaparqanchu.

²²Chaywanpas rey Ahazqa sasachaykunawan mat'iykusqa kasqan tiempopin astawanraq Señor Dios contra huchallikurqan.

²³Damasco llaqta runakunan Ahazta atiparqan, chaymi payqa yuyaykurqan: Siria reykunaq diosninkunaqa yanapanmi paykunata, ñoqapas chay dioskunaman sacrificiota haywasaq yanapawananpaq, nispa. Hinaspa Damasco runakunaq diosninkunaman sacrificiota haywarqan, ichaqa chaykuna hawan paypas llapa Israelpas pasaqta urmaykapurqanku.

²⁴Hinallataq Ahazqa Dios yupaychana wasipi serviciokunata horqospa p'akirqan, hinaspa yupaychana wasi punkuta wisq'apuspa Jerusalén sapanka calle esquinakunapi altarta ruwarqan.

²⁵Wak'a dios yupaychana altarkunatapas sayarichirqan Judá suyuq llapan llaqtankunapi, wak'a dioskunaman sacrificiota ruphachinanpaq. Ahinapin ñawpa taytankuq Diosnin Señorta sinchita phiñachirqan.

²⁶Ahazmanta wakin willakuykuna qallariymanta p'uchukaykama ruwasqankunamantapas Judá Reykunaq Israel Reykunaq Willakuynin Qelqapi qelqasqan kashan.

²⁷Ahaz wañupuqtinmi Jerusalén llaqtapi p'ampapurqanku, manataq Israel reykunata p'ampanapichu p'amparqanku. Chay qhepatataq churin Ezequías rantinpi kamachikurqan.