Read Diospa Simin Qelqa 2 CRÓNICAS 3 Bible Online

2 CRÓNICAS 3 - Diospa Simin Qelqa bible

2 CRÓNICAS 3

¹Salomonqa Dios yupaychana wasi ruwaytan qallarirqan, chaytan taytan Davidman Señor Diosqa rikhurispa Jerusalenpi Moriah orqopi, Jebus llaqtayoq Ornanpa[1] eranpi rikuchirqan, hinan Davidqa huk cheqasta chaypi wakichirqan Señor Dios yupaychana wasipaq.

²Salomonqa tawakaq watapi kamachikushaspan, iskaykaq killaq iskay p'unchayninpi wasita sayarichiyta qallarirqan.

³Dios yupaychana wasi teqsita Salomonpa churasqanqa kay hinan karqan: wask'anman iskay chunka qanchisniyoq metro, anchonman isqon metro.

⁴Yupaychana wasiman haykuna wasitaq karqan anchonman isqon metro yupaychana wasiq anchon hina, sayayninmantaq isqon metro. Chay wasiq ukhuntan ch'uya qoriwan qatachirqan.

⁵Yupaychana wasi ukhutaqa pino tablawanmi llup'achirqan, chaytataq ch'uya qoriwan qatachirqan, tablawan k'askachisqa perqapitaq palmerakunata cadenakunata llaqllaspa thupachirqan.

⁶Wasi ukhutataq umiña rumiwan sumaqcharqan. Qatachisqan qoritaqa Parvaimmantan apachimurqan.

⁷Qoriwanmi qatachirqan wasiq kurkunkunata, perqankunata, punku chakankunata, punkunkunatapas. Perqankunapitaq querubinkunata llaqllaspa thupachirqan.

⁸Yupaychana wasipi Ch'uyay-ch'uya Cheqasta ruwachirqan, chaymi karqan wask'anpas anchonpas isqon metrokama, chay wasitan yaqa iskay chunka waranqa kilo ch'uya qoriwan qatachirqan.

⁹Qori clavokunataq pesarqan kuskan kilo yaparisqa. Altos wasikunatapas qoriwanmi qatachirqan.

¹⁰Ch'uyay-ch'uya Cheqas ukhupin k'ullumanta ruwachirqan iskay querubinkunata, hinaspa qoriwan qatachirqan.

¹¹Iskaynin querubinkunaq raphranmi isqon metro mast'arikurqan, sapanka raphran iskay metro iskay chunka phisqayoq centímetro karqan. Chaymi hukninpa huk raphran wasi perqata tuparqan, hukkaq raphrantaq hukninpa raphra puntanta tuparqan.

¹²Hukkaq querubinpas kaqllataq karqan, huk raphran perqata tuparqan, hukkaq raphrantaq raphrapura tuparqan.

¹³Chay querubinkunaqa wasi punku cheqas uyayoqmi kasharqanku, iskayninkuq raphran mast'arikuqtinmi isqon metro karqan.

¹⁴Awachillarqantaq huk cortinata sani-puka q'aytumanta, rawraq-puka q'aytumanta, llawlli-puka q'aytumanta, linomantawan, querubinkunaq rikch'aynin pallayniyoqta.

¹⁵Yupaychana wasiq ñawpaqenpin sayarichirqan iskay tusakunata, sapankata chunka soqtayoq metro sayayniyoqta, sapanka tusaq pillunmi iskay metro yaparisqa sayayniyoq karqan.

¹⁶Hinallataq cadenakunata awachirqan, hinaspa tusakunaq pillun pataman churarqan, ruwachillarqantaq pachak granadakunata, chaykunatan warkurqanku cadenakunawan.

¹⁷Chay tusakunatan sayarichirqanku yupaychana wasiq ñawpaqenpi, hukkaqta punku uray ladopi, hukkaqtataq punku wichay ladopi. Uray ladopi kaqtan Jaquinta suticharqan, wichay ladopi kaqtataq Boazta suticharqan.