Read Diospa Simin Qelqa 2 CRÓNICAS 35 Bible Online

2 CRÓNICAS 35 - Diospa Simin Qelqa bible

2 CRÓNICAS 35

¹Rey Josiasmi Jerusalén llaqtapi Señor Diospa sutinpi Pascua Fiestata ruwarqan, ñawpaqkaq killapi chunka tawayoq p'unchaypitaq Pascua Fiesta borregokunata nak'arqanku.

²Sacerdotekunatapas llank'ananku t'aqaman wakmanta churarqan, kallpacharqantaq Señor Dios yupaychana wasipi allinta llank'anankupaq.

³Israel runakunaman yachachiq Señor Diospaq t'aqasqa Leví runakunatataq nirqan: — Rimanakuy ch'uya arcata churaychis Israel rey Davidpa churin Salomonpa ruwasqan wasiman, amaña rikrapi wantuspa apanaykichispaq. Hinaspa Diosniykichis Señor Diosta Israel llaqtantawan serviychis.

⁴Llank'anaykichispaq wakichikuychis aylluykichisman tupaqnin t'aqaman hina, Israel rey Davidpas churin Salomonpas unancharqanku chayman hina.

⁵Yupaychana wasipi kashaspaqa t'aqakuychis, llaqta-masiykichiskuna hamuqtin wakinniykichis sapanka familiapaq yanapaqnin kanaykichispaq.

⁶Pascua Fiesta borregokunata nak'aychis, ch'uyanchakuychis, hinaspa llaqta-masiykichispaq borrego nak'asqata wakichiychis, Señor Diospa Moiseswan kamachikuynin simiman hina hunt'anankupaq, nispa.

⁷Rey Josiasmi Pascua Fiestapi nak'anankupaq llapan chaypi kashaq runakunaman qhapaq kayninmanta qorqan borregota cabratawan llapanta kinsa chunka waranqata, kinsa waranqa torotawan.

⁸Reypa oficialninkunapas paykuna kikillankumantan ofrendakunata qollarqankutaq runakunaman sacerdotekunaman, Leví runakunamanwan. Dios yupaychana wasipi umallikuna Hilcías, Zacarías, Jehielpiwan qorqanku sacerdotekunaman Pascua Fiestapi nak'anankupaq iskay waranqa soqta pachak borregota cabratawan, hinallataq qorqanku kinsa pachak torotapas.

⁹Leví ayllu umallikuna Conanías, Semaías, wawqen Natanael, Hasabías, Jeiel, Josabadpiwan Leví runakunaman qorqanku Pascua Fiestapi nak'anankupaq borregota cabratawan phisqa waranqata, hinallataq qorqanku phisqa pachak torotapas.

¹⁰Fiestapaq llank'ay wakichisqa kaqtintaq sacerdotekunapas t'aqankupi kaq Leví runakunapas llank'anankupi sayaykapurqanku, reypa kamachisqanman hina.

¹¹Hinan Pascua Fiesta borregokunata cabrakunata nak'arqanku, chay nak'asqankutaqa Leví runakunan ch'utirqanku, sacerdotekunataq paykunamanta yawarta chaskispa altarta ch'aqchurqanku.

¹²Chaymantataq Leví runakunaqa ruphachina sacrificiopaq t'aqasqankuta ayllu-ayllu familiakunaman qorqanku Señor Diosman haywanankupaq Moisespa kamachikusqan qelqaman hina. Chhaynallatataq toro aychatapas ruwarqanku.

¹³Hinaspa Pascua sacrificiota ninapi q'asparqanku kamachikuyman hina, ancha ch'uya ofrenda aychakunatataq mankakunapi, rakikunapi, perolkunapi ima t'impuchirqanku, hinaspa usqhaylla runakunaman rakirqanku.

¹⁴Chaymantataq Leví runakunaqa paykunapaqpas sacerdotekunapaqpas aycha mikhunata wakichirqanku, Aaronpa miraynin sacerdotekuna ruphachina sacrificiokunata wirakunata haywaspa tutakama llank'asqankurayku.

¹⁵Asafpa miraynin takiqkunapas llank'ananku cheqaspin kasharqanku Davidpa, Asafpa, Hemanpa, reypa profetan Jedutunpa kamachikusqanman hina. Punku qhawaqkunapas sapanka punkupin kasharqanku, manataq punku qhawasqankuta saqeykuspa imamanpas purinanku karqanchu, wawqenku Leví runakuna paykunapaq lliwta wakichipusqanrayku.

¹⁶Rey Josiaspa kamachikusqanman hinan haqay p'unchayqa Señor Diospa sutinpi lliwta wakichirqanku Pascua Fiestata ruwanankupaq, Señor Diospa altarninpi ruphachina sacrificiokunata haywanankupaq ima.

¹⁷Chaymi Jerusalenpi kashaq Israel runakunaqa Pascua Fiestata haqay p'unchay ruwarqanku, hinallataq Mana Qonchuyoq T'anta Fiestatapas qanchis p'unchay ruwarqanku.

¹⁸Israel suyupiqa manan hayk'aqpas profeta Samuelpa tiemponmantapacha chay kuti hina Pascua Fiestata ruwarqankuchu. Manallataq mayqen Israel reypas chhayna fiestataqa ruwarqanchu rey Josiaswan, sacerdotekunapiwan, Leví runakunapiwan, llapan chaypi kashaq Judá suyu runakunapiwan, Israel suyu runakunapiwan, llapan Jerusalén llaqtapi tiyaq runakunapiwan ruwarqanku chay hinataqa.

¹⁹Chay Pascua Fiestataqa ruwarqanku chunka pusaqniyoqkaq watapi rey Josías kamachikushaqtinmi.

²⁰Señor Dios yupaychana wasi allichayta rey Josiaspa tukusqan qhepatan Egipto rey Necao rirqan Eufrates mayu patapi kashaq Carquemis llaqtapi awqa-tinkuq, rey Josiastaq paywan maqanakuq rirqan.

²¹Hinan rey Necaoqa Josiasman willaqta kacharqan: Judá rey, ¿iman ñoqawan ruwanayki? Manan ñoqaqa qanwan maqanakuqchu hamuni, aswanpas awqaykunawan sapaqta maqanakuqmi hamuni. Diospunin kamachiwarqan usqhaylla hamunaypaq, chhaynaqa, ama Dios contra sayariychu, payqa ñoqawanmi kashan, paqtan wañuchisunkiman, nispa.

²²Rey Josiastaq ichaqa mana kutipurqanchu, aswanpas huk-hina p'achayoqmi maqanakuq rirqan, Diospa kamachisqan rey Necaoq nisqanta mana kasukuspa. Hinaspan Josiasqa Meguido qaylla pampapi rey Necaowan maqanakurqan.

²³Hinan wach'iqkunaqa Josiasta wach'irqorqanku, chaymi payqa oficialninkunata nirqan: — Horqopuwaychis maqanakuymanta, sinchi k'irisqan kashani, nispa.

²⁴Oficialninkunataq carretanmanta hukkaq carretaman churaykuspa Jerusalén llaqtaman apapurqanku, hinan chaypi wañupurqan, p'ampapurqankutaq ñawpa taytankunata p'ampanapi. Chaymi llapan Judá runakuna, Jerusalén llaqta runakunapas Josiasmanta waqarqanku.

²⁵Jeremiastaq Josiaspa wañupusqanmanta huk harawita kamarirqan, chaytan Israel suyupi warmi takiqkunapas qhari takiqkunapas kunankama Josiasmanta yuyarispa takinku. Chay hina harawitaqa wañuqkuna kaqtinmi takillaqkupuni, Harawi Qelqapi qelqasqataq kashanpas.

²⁶Josiasmanta wakin willakuykuna, Señor Diospa kamachikuy siminman hina chanin ruwasqankuna,

²⁷qallariymanta tukukuykama ruwasqankunapas Israel Reykunaq Judá Reykunaq Willakuynin Qelqapi qelqasqan kashan.