Read Diospa Simin Qelqa 2 CRÓNICAS 6 Bible Online

2 CRÓNICAS 6 - Diospa Simin Qelqa bible

2 CRÓNICAS 6

¹Hinan Salomonqa nirqan: — Señor Diosníy, qanqa ati-phuyu ukhupi tiyaqmi kanki,

²ñoqataqmi sumaq qhapaq wasita ruwapuyki, chaypi wiñayta tiyanaykipaq, nispa.

³Chaymantataq rey Salomonqa huñuykusqa sayashaq llapan Israel runakunaman kutirispa paykunata samincharqan.

⁴Nillarqantaq: Saminchasqa kachun Israelpa Diosnin Señorqa, pay kikinmi taytay Davidman prometesqanta hunt'arqan, paymi nisqa:

⁵Egipto suyumanta llaqtayta horqomusqay p'unchaymantapacha manan Israel suyupi mayqen llaqtatapas akllakurqanichu, chaypi wasita sayarichipuwaspaykichis ñoqata yupaychawanaykichispaq, manallataq mayqen qharitapas akllakurqanichu Israel llaqtayta kamachinanpaq.

⁶Aswanpas kunanmi Jerusalén llaqtata akllakuni chaypi ñoqa yupaychasqa kanaypaq, qantataq David akllakuyki Israel llaqtayta kamachinaykipaq, nispa.

⁷Chaymi David taytayqa sonqonpi yuyaykukusqa Israelpa Diosnin Señorta yupaychanapaq wasita sayarichiyta.

⁸Señor Diostaq ichaqa taytay Davidta nisqa: Allinmi huk wasita sayarichipuwanaykipaq yuyaykukusqaykiqa,

⁹ichaqa manan qanqa sayarichiwaqchu, aswanpas churiykin ñoqapaq huk wasita sayarichipuwanqa, nispa.

¹⁰Chay hinaqa, hunt'arqanmi Señor Diosqa prometesqanta, chaymi kunan nisqanman hina David taytaypa rantinpi Israel suyu kamachikuy tiyanapi tiyaykuni, hinaspa Israelpa Diosnin Señorpaq huk wasita sayarichipurqani.

¹¹Chaypin churaykuni Israel llaqtawan Señor Diospa rimanakusqan arcata, nispa.

¹²Chaymantataq llapan Israel runakuna qayllapi Salomonqa Señor Diospa altarnin ñawpaqenpi sayaykuspa makinta altoman haywarirqan.

¹³Salomonqa chawpi patiopin broncemanta sayana patata ruwachisqa, chaymi wask'anpas anchonpas iskay metro iskay chunka centímetro karqan, sayayninmantaq huk metro kinsa chunka phisqayoq centímetro karqan. Salomonqa chay pataman seqaspanmi qonqoriykukurqan llapan Israel runakunaq rikushasqan, altoman makinta haywarispataq mañakurqan:

¹⁴Israelpa Diosnin Señor, manan kanchu hanaq pachapipas kay pachapipas qan hina Diosqa. Qanqa rimanakusqaykita hunt'aqmi kanki, munakushallankipunin tukuy sonqo serviqniykikunataqa.

¹⁵Kamachiyki taytay Davidman prometesqaykitapas hunt'arqankin, simiykiwan rimarisqaykitapas kunanmi hunt'anki.

¹⁶Chay hinaqa, Israelpa Diosnin Señor, hunt'allaytaq taytayman prometesqaykita, qanmi nisqanki: Churiykikunachus allinta kawsanqaku, imaynan qan ñawpaqeypi kawsarqanki hinata chayqa, mirayniykiqa Israel suyupi kamachishallanqapunin, nispa.

¹⁷Chay hinaqa, Israelpa Diosnin Señor, kamachiyki taytay Davidman prometesqaykita hunt'allaypuni.

¹⁸Ichaqa, ¿cheqaqtachu qan Diosqa kay pachapi runakunawan tiyawaq? Hanaq pachapas ancha hatun kashaspa manan chaskiyta atisunkichu, ¿chaychu qanqa kay huch'uy wasi sayarichisqaypi tiyawaq?

¹⁹Chaywanpas, Diosníy Señor Dios, uyariykuway mañakusqayta khuyapayawanaykipaq valekusqaytapas. Uyariykuway, kunanmi kay kamachiyki mañakamuyki waqyakamuyki.

²⁰Tuta-p'unchay kay wasita qhawashallaypuni, qanqa nirqankin: Chaypin kashasaq, nispa. Maypiña kashaspaypas kay wasi qhawarisqa mañakuqtiyqa uyariykullawankipuni.

²¹Hinallataq Israel llaqtaykitapas ñoqatapas kay wasi qhawarisqa mañakuqtiykuqa, uyariykullawankikupuni, hanaq pacha tiyanaykimanta uyariykamullawankiku, pampachaykuwankikutaq.

²²Pipas runamasinpa huchachasqan kaspa, kay wasipi altarniykipi jurachinkuman mana huchayoq kasqanta chayqa,

²³hanaq pachaykimanta uyariykamuy, hinaspa juzgay kamachiykikunata. Huchayoqtaqa wanachiy mana chanin ruwasqanmanta muchuchispayki, mana huchayoqtataq chaninchayman hina sut'inchay chanin kasqanta.

²⁴Qan contra huchallikusqan hawa Israel llaqtaykita awqanku atipanman, hinataq paykuna qanman kutirikuspa yupaychasunkiman, kay wasipi mañakuspataq pampachayta valekusunkiman chayqa,

²⁵uyariykamuy hanaq pachaykimanta, huchankutapas pampachaykuy hinaspa ñawpa taytankuman qosqayki hallp'aman kutichimpuy.

²⁶Llaqtaykiq qan contra huchallikusqan hawa ch'akirinman manataq paramunmanchu, ichaqa kay wasi kutirisqataq mañakunkuman, yupaychasunkikuman, muchuchiqtiykitaq huchankuta wikch'unkuman chayqa,

²⁷uyariykamuy hanaq pachaykimanta, pampachaykuy Israel llaqta kamachiykikunaq huchanta, hinaspa yachachiy allin chanin ñanta purinankupaq, hinallataq llaqtaykiman herenciapaq qosqayki hallp'amanpas parachiy.

²⁸Yarqaypas, millay onqoypas, ruphashaq wayrapas, polvillopas, langostapas, yura mikhuq kurupas, llaqtaykuta muyuykuspa phawaykuq awqaykupas, ima onqoypas, sasachakuypas kay suyupi kanman chayqa,

²⁹uyariykamuy mañakusqankuta. Llaqtaykimanta mayqen runapas, mana chayqa llapan llaqtapas sonqonpi llakikuspa makinta kay wasi ladoman haywarispa mañakusunkiman chayqa,

³⁰uyariykamuy hanaq pacha tiyanaykimanta, huchankutataq pampachaykuy, juzgaspaykitaq sapankaman ruwasqanman hina qopuy. Qan sapallaykin runakunaq sonqontapas yuyaykuynintapas reqsinki.

³¹Ahinapin ñawpa taytaykuman qosqayki hallp'api tiyaspanku tukuy tiempo paykunaqa manchakuywan yupaychasunki, munayniykitataq ruwanqaku.

³²Mayqen wak llaqtayoqpas mentasqa kasqaykita uyarispa, musphana ruwasqaykita yachaspa karu llaqtamanta hamunman, hinaspa kay wasiykipi mañakusunkiman chayqa,

³³uyariykamuy hanaq pacha tiyanaykimanta, hinaspa tukuy mañakusqasuykita qoykuy, llapan kay pacha suyukuna reqsinasuykipaq, hinaspa Israel llaqtayki hina manchakuywan yupaychanasuykipaq. Ahinapin yachanqaku kay ruwapusqay wasipi sutiyki yupaychasqa kasqanta.

³⁴Llaqtaykita awqa-tinkuyman kachaqtiyki, maypi kasqankupitaq akllakusqayki llaqta lado kutirisqa, kay ruwapusqay wasiyki lado kutirisqa mañakunkuman chayqa,

³⁵mañakusqantapas valekusqantapas hanaq pachamanta uyariykamuy, hinaspa awqankuta atipachiy.

³⁶Manan pipas mana huchallikuqqa kanchu, chayrayku llaqtayki qan contra huchallikuqtin, k'arakta phiñakuspayki awqankuman hap'iykachiwaq suyunkuman presota apanankupaq, karumanpas qayllamanpas,

³⁷hinataq preso apasqa kasqanku suyupi qanman kutirikuspa valeykukusunkikuman: Huchallikurqaykun, mana chanintan ruwarqayku, huchachasqan kayku, nispanku,

³⁸chaypitaq tukuy sonqo tukuy alma qanman kutirikunkuman, hinaspataq ñawpa taytaykuman qosqayki suyu ladoman, akllakusqayki llaqta ladoman, ruwapusqay wasi ladoman kutirispa mañakusunkikuman chayqa,

³⁹mañakusqankutapas valekusqankutapas hanaq pacha tiyanaykimanta uyariykamuy, hinaspa qespichiy. Llaqtaykiq qan contra huchallikusqantapas pampachaykuy.

⁴⁰Kunanqa, Diosníy, qhawarimuwayku, uyariykullawaykupuni kay cheqasmanta llaqtayki qanman mañakamuqtin.

⁴¹Diosníy Señor Dios, sayariy, kay samakunayki cheqasman hamuy, qanpas atiyniykita rikuchiq arcapas. Señor Diosníy, sacerdoteykikunata saminchashallaypuni, qan sonqo runaykikunapas munakuyniykipi kusikuchunku.

⁴²Señor Diosníy, amapuni wikch'uwaychu, akllakusqayki reymi kani, yuyarikuy kamachiyki Davidman khuyapayanaykipaq prometesqaykita, nispa.