Read Diospa Simin Qelqa ESDRAS 1 Bible Online

ESDRAS 1 - Diospa Simin Qelqa bible

ESDRAS 1

¹Persia suyu rey Ciro kamachikuyta qallarisqan watapin Señor Diosqa siminta hunt'achirqan Jeremiaswan ñawpaqña willachisqanman hina. Señor Diosqa Ciroq sonqontan kuyurichirqan, chaymi Ciroqa kamachikurqan simipiwan qelqapiwan suyuntinpi kay hinata willanankupaq.

²Persia suyu rey Ciron nin: Hanaq pacha Señor Diosmi llapan kay pacha suyukunata qowan, kamachiwantaq Judá suyupi Jerusalén llaqtapi yupaychana wasita paypaq sayarichipunaypaq.

³Chhaynaqa, hayk'an Señor Diospa llaqtanmanta kaqkunata Dios yanapasunkichis. Judá suyupi Jerusalén llaqtaman riychis Señor Diospa wasinta sayarichiq. Paymi Israelpa Diosnin, Jerusalenpitaq kashan.

⁴Mayneqpipas Señor Diospa llaqtanmanta runakuna qhepanmanraq chayqa, wasimasinkuna paykunata yanapachunku qoriwan, qolqewan, uywawan, kawsaykunapiwan, hinallataq sumaq sonqo ofrendakunatapas qochunku Jerusalenpi kashaq Diospa wasinpi haywanankupaq, nispa.

⁵Chaymi Judá aylluq Benjamín aylluq umalli runankuna, sacerdotekuna, Leví runakuna, Diospa llapan sonqonta kuyurichisqan runakunapiwan wakichikurqanku Jerusalenta Señor Dios yupaychana wasita sayarichiq rinankupaq.

⁶Hinan llapa wasi-masinkunaqa yanaparqanku qolqewan, qoriwan, kawsaykunawan, uywakunawan, valorniyoq sumaq qokuykunawanpas, hinallataq tukuy imaymana sumaq sonqo ofrendankutapas qorqanku.

⁷Nabucodonosormi Jerusalenpi Señor Dios yupaychana wasimanta serviciokunata apamusqa, hinaspa diosninku yupaychana wasiman churasqa. Chaykunatan rey Ciroqa horqochimuspa,

⁸tesorero Mitridatesman qorqan. Mitridatestaq chay serviciokunata yupaspa Judapi kamachikuq Sesbasarman hap'ichirqan.

⁹Kaymi chay yupasqankuna: Kinsa chunka qori puruña, waranqa qolqe puruña, iskay chunka isqonniyoq cuchillokunapiwan.

¹⁰Kinsa chunka qori tazakuna, tawa pachak chunkayoq qolqe tazakuna, waranqa serviciokunapiwan.

¹¹Llapan chay qorimanta qolqemanta serviciokunan phisqa waranqa tawa pachak karqan. Llapan chaykunatan Sesbasarqa Babilonia suyumanta apapurqan, kamachipaq apasqa kasqankumanta Israel runakuna Jerusalenman kutipuqtinku.