Read Diospa Simin Qelqa ESDRAS 4 Bible Online

ESDRAS 4 - Diospa Simin Qelqa bible

ESDRAS 4

¹Kamachi kasqankumanta kutimpuqkuna Israelpa Diosnin Señor yupaychana wasita sayarichishaqtinkun, Judá aylluq Benjamín aylluq awqankuna uyarirqanku.

²Chaymi Zorobabelman ayllu umalli runakunamanwan rispa nirqanku: — Asiria suyu rey Esar-hadonpa kayman apamuwasqanku p'unchaymantapachan ñoqaykuqa Diosninchista yupaychashayku, paymanmi sacrificiotapas haywashayku, chayrayku, wasi sayarichiypi yanapayta munaykiku, nispa.

³Hinan Zorobabel, Jesúa, Israel ayllu umalli runakunapiwan kutichirqanku: — Qankunaqa manan Diosniykuq wasinta sayarichiypi yanapawankikumanchu, aswanpas ñoqaykukamallan Israelpa Diosnin Señor yupaychana wasitaqa sayarichisaqku, Persia suyu rey Ciroq niwasqankuman hina, nispa.

⁴Chaymi muyuriqninkupi tiyaq runakunaqa Judá runakunata manchachispa iskayyachirqan mana llank'anankupaq.

⁵Reypa wakin yuyaychaqninkunamantaq qolqeta lluk'iykurqanku Dios yupaychana wasi sayarichiy yuyaykusqankuta qolluchinanpaq. Ahinapin chay llank'anata qolluchirqanku rey Ciroq kamachikusqan tiempopi rey Darioq kamachikunan tiempokama.

⁶Rey Asuero[2] kamachikuyta qallarishaqtintaq chay awqa runakunaqa Judapi tiyaq Jerusalenpi tiyaq runakunata huchachaspa qelqarqanku.

⁷Hinallataq rey Artajerjespas Persiapi kamachikushaqtinña, Bislam, Mitridates, Tabeel, wakin llank'aq-masinkunapiwan Artajerjesman arameo rimaypi qelqamurqanku.

⁸Kamachikuq Rehummi qelqaq Simsaipiwan huk cartata Jerusalén contra Artajerjesman qelqallarqankutaq. Chay qelqaqkunataq kaykuna:

⁹Kamachikuq Rehum, qelqaq Simsai, llank'aqmasin juezkuna, Erec llaqtayoq, Babilonia llaqtayoq, Elampi Susa llaqtayoq llapan oficialkuna,

¹⁰Eufrates mayu inti haykuy lado hap'iypi wakin tiyaqkunapiwan. Paykunatan ancha hatun yupa mentasqa rey Asnaparqa llaqtankumanta apamuspa, Samaria llaqtakunapi Eufrates mayu inti haykuy lado hap'iy wakin llaqtakunapipas tiyachisqa.

¹¹Kay hinan karqan apachisqanku qelqaqa: Rey Artajerjes, Eufrates mayu inti haykuy lado hap'iypi kamachiykikunan napaykamuykiku.

¹²Reyniyku, kaytan willamuykiku: Babilonia suyumanta hamuq judío runakunan Jerusalenman chayamuspanku, chay mana allin mana kasukuq llaqtata wakmanta sayarichishanku. Teqsitan allichankuña, perqaytapas qallarillankutaqmi.

¹³Reyniyku, yachanaykin, kay llaqta wakmanta hatarinqa muyuriq perqanpas sayarillanqataq chayqa, manan impuestota imamantapas paganqakuchu, chaskinayki qolqepas pisiyapunqan.

¹⁴Kamachiykipitaq kashayku chayqa, manan pisichasqa kanaykita munaykuchu, chaymi willamuykiku,

¹⁵ñawpa taytaykikunaq willakuynin qelqakunata t'aqwichinaykipaq. Chaypin tarinki kay llaqtaqa sinchi mana kasukuq kasqanta, reykunapaqpas huk hap'iykunapaqpas mana chanin kasqanta, ñawpaqmantapacha rey contra hatariq kasqantawan, chayraykun thunisqapas karqan.

¹⁶Reyniyku, chay llaqtachus wakmanta sayarinqa, muyuriq perqapas perqasqa kanqa chayqa, Eufrates mayu inti haykuy lado hap'iyqa manan kamachisqaykiñachu kanqa, nispa.

¹⁷Rey Artajerjestaq kutichirqan: Kamachikuq Rehumta, qelqaq Simsaita, Samaria llaqtapi tiyaq Eufrates mayu inti haykuy lado wakin llaqtakunapi tiyaq llank'aq-masiykichiskunatawanmi napaykamuykichis.

¹⁸Apachimuwasqaykichis cartataqa sut'ita t'ikrachispan leechirqani.

¹⁹Chaymi kamachirqani willakuy qelqata t'aqwinankupaq. Hinan tarinku chay llaqtaqa ñawpaqmantapacha mana chanin, mana kasukuq llaqta kasqanta, reykuna contra sayariq kasqantawan.

²⁰Jerusalenpipas atiyniyoq reykunan kasqa, llapan chay Eufrates mayu inti haykuy lado hap'iyta kamachisqaku, chay reykunamanmi tukuy imamanta impuestota pagasqaku.

²¹Chay hinaqa, chay runakunata kamachiy ama llank'anankupaq, chay llaqtatapas ama wakmanta sayarichinankupaq ñoqaq kamachinaykama.

²²Allintapuni chay runakunataqa qhawaychis, paqtan ñoqapaq mana allinkuna astawan yapakunman, nispa.

²³Chay cartata Rehumpa, qelqaq Simsaipa, llank'aq-masinkunaq ñawpaqenpi leekuqtinmi, kaqrato Jerusalenpi judío runakunaman phawaspanku llank'asqankuta ancha kallpawan qolluchirqanku.

²⁴Chaymi Jerusalenpi Dios yupaychana wasi llank'ayqa qollupurqan, qhepapurqantaq Persia suyu rey Darioq kamachikusqan iskaykaq watakama.