Read Diospa Simin Qelqa ESDRAS 5 Bible Online

ESDRAS 5 - Diospa Simin Qelqa bible

ESDRAS 5

¹Profeta Hageowan Iddoq churin profeta Zacariaspiwanmi Judapi tiyaq Jerusalenpi tiyaq judío runakunaman Israelpa Diosnin Señorpa sutinpi willarqanku.

²Chaymi Salatielpa churin Zorobabelqa, Josadacpa churin Jesuapiwan wakmanta Jerusalenpi Diospa wasin llank'ayta qallarirqanku, Diospa profetankunapas llank'aysillarqantaq.

³Ichaqa Eufrates mayu inti haykuy lado hap'iypi kamachikuq Tatnai, Setar-boznai, llank'aq-masinkunapiwanmi kaqrato paykunaman rispa nirqanku: — ¿Pin qankunata kamachirqasunkichis kay wasita sayarichispa tukunaykichispaq?

⁴¿Iman sutin kay sayarichiq runakunaq? nispa.

⁵Ichaqa Diosmi waqaycharqan judío umalli runakunata, chaymi kamachikuqkunaqa llank'ayta mana hark'arqankuchu, rey Darioman willaspanku paymanta cartata chaskinankukama.

⁶Rey Darioman qelqaqkunan kaykuna: Eufrates mayu inti haykuy lado hap'iypi kamachikuq Tatnai, Setar-boznai, chay hap'iypi kamachikuq-masinkunapiwan.

⁷Chay qelqasqanku cartan kay hina karqan: Reyniyku, tukuypin allillan kanaykita munayku.

⁸Kunanmi reyníy, willamuykiku, Judea hap'iytan rirqayku hatun Dios yupaychana wasita, hinaspan rikumurqayku hatun thupasqa rumikunawan Dios yupaychana wasita perqashaqta. Judío runakunan perqata kurkuwan chakashankuña, usqhayllan llank'ashanku, allintataqmi usachishankupas.

⁹Umalli runakunatataq tapurqayku: — ¿Pin kamachirqasunkichis kay wasita sayarichispa tukunaykichispaq? nispa.

¹⁰Tapullarqaykutaq umalli runakunaq sutintapas qelqanaykupaq, hinaspa qanman willamunaykupaq.

¹¹Hinan paykunaqa kutichiwarqanku: — Ñoqaykuqa Hanaq Pacha Kay Pacha Diospa kamachinkunan kayku, askha watakunañan Israelpa hatun reynin kay wasita sayarichispa tukuchisqa, chaytan wakmanta sayarichishayku.

¹²Ñawpa taytayku Hanaq Pacha Diosta phiñachiqtinmi, Babilonia suyu rey Caldea runa Nabucodonosorman hap'iykachirqan, chaymi reyqa kay wasita thunirqan, runakunatataq Babiloniaman presota aparqan.

¹³Chaywanpas Babilonia rey Ciroqa ñawpaq wata kamachikushaspan, huk kamachikuyta unancharqan Diospa wasin wakmanta sayarichisqa kananpaq.

¹⁴Nabucodonosormi Jerusalenpi Diospa wasinmanta qorimanta qolqemanta serviciokunata horqospa, Babiloniapi yupaychana wasiman churasqa. Chaykunatan rey Ciroqa horqochimurqan, hinaspan Sesbasar sutiyoq runaman hap'ichirqan. Paytan churarqan kamachikuq kananpaq.

¹⁵Rey Ciron Sesbasarta nirqan: — Kay serviciokunata Jerusalenpi kashaq yupaychana wasiman apay, hinaspa Diospa wasin ñawpaq kasqan cheqaspi wakmanta sayarichimuy, nispa.

¹⁶Chaymi Sesbasarqa Jerusalenman hamuspa Dios yupaychana wasi teqsita churaykurqan, chaymantapachan llank'ashayku ichaqa manaraqmi tukuykuraqchu, nispanku.

¹⁷Chhaynaqa, reyniyku, munawaqtaq chayqa, kamachiy reypa qelqa k'uyu waqaychanan wasita maskhanankupaq cheqaqpunichus rey Ciro, Dios yupaychana wasita Jerusalenpi sayarichinankupaq kamachisqa chayta yachanaykipaq, chaymantataq imachus yuyaykusqaykita willamuwayku, nispa.