Read Diospa Simin Qelqa ESDRAS 7 Bible Online

ESDRAS 7 - Diospa Simin Qelqa bible

ESDRAS 7

¹Chay qhepataña Persia suyu rey Artajerjes kamachikushaqtinmi, huk qhari Esdras sutiyoq karqan. Paypa taytanmi karqan Seraías, ñawpa taytankunataq Azarías, Hilcías,

²Salum, Sadoc, Ahitob,

³Amarías, Azarías, Maraiot,

⁴Zeraías, Uzi, Buqui,

⁵Abisúa, Finees, Eleazar, Aaronpiwan, paymi karqan ñawpaqkaq sacerdote.

⁶Esdrasqa hamawt'an karqan, Moisesman Israelpa Diosnin Señorpa qosqan kamachikuy simitan allinta yacharqan. Señor Diosmi Esdrasta yanaparqan, chaymi rey Artajerjesqa tukuy mañakusqanta qorqan. Esdrasqa Babiloniamantan Jerusalenman rirqan.

⁷Rey Artajerjes qanchis wataña kamachikushaqtinmi, Esdraswan Jerusalenman rirqanku Israel wakin runakuna, sacerdotekuna, Leví runakuna, takiqkuna, punku qhawaqkuna, Diospa wasinpi llank'aqkunapiwan.

⁸Chay kikin wataq phisqakaq killanpin Esdrasqa Jerusalenman chayarqan.

⁹Babiloniamantan lloqsimurqanku wata qallariy killaq ñawpaqkaq p'unchayninta, Diostaq puriyninpi sumaqta payta yanapamurqan, chaymi chayamurqanku Jerusalenman phisqakaq killaq ñawpaqkaq p'unchayninta.

¹⁰Esdrasqa allintapunin sonqonta wakichikurqan Señor Diospa kamachikuy siminta allinta yachananpaq, hunt'ananpaq. Chay kamachikuykunatan unanchaykunatan llapallanta Israel runakunaman yachachirqan.

¹¹Señor Diospa kamachikuy siminta unanchayninta yachaq sacerdote Esdrasmanmi rey Artajerjesqa cartata qorqan, chaypin kay hinata nirqan:

¹²Reykunaq reynin Artajerjesmi Hanaq Pacha Diospa kamachikuy siminta yachaq sacerdote Esdrasta napaykuni.

¹³Israel runapas, sacerdotepas, Leví runapas Jerusalenman qanwan kuska riyta munaqkuna kay suyupi kanman chayqa, kamachinin rinankupaq.

¹⁴Qantaqa ñoqan qanchis yuyaychaqniykunapiwan kachashaykiku Diospa kamachikuy simin hap'isqaykita Jerusalenpi Judeapi chanintachus icha manachus hunt'ashanku chayta tapumunaykipaq.

¹⁵Ñoqaqpas yuyaychaqniykunaqpas tukuy sonqowan qosqayku qorita qolqeta Jerusalenpi kashaq Israelpa Diosninman apanki,

¹⁶hinallataq Babilonia suyuntinpi llapan huñusqayki qorita qolqeta apanki, kaqllataq runakunaq sacerdotekunaq tukuy sonqowan Jerusalenpi Diospa wasinpaq qosqankutapas.

¹⁷Chay qolqewanqa makillan rantinki torillokunata, ovejakunata, borregokunatawan, hinallataq ruru ofrendakunata hich'aykunapaq vino ofrendakunatapas, chaykunata Jerusalenpi Diosniykichispa wasin altarpi haywanki.

¹⁸Wakin qolqewan qoriwantaq mayqenchus allin rikch'akusunkichis qanmanpas llaqta-masiykikunamanpas chayta ruwankichis, Diosniykichispa munayninman hina.

¹⁹Ichaqa chaskisqayki serviciokunataqa qan kikiykin Jerusalenpa Diosninman qonki, chaykunan Dios yupaychana wasipi yupaychanapaq kanqa.

²⁰Diosniykiq wasinpaq tukuy imapas wak necesitakuqtinqa reypa qolqe waqaychananmantan horqospa rantinki.

²¹Ñoqa rey Artajerjesmi kamachini Eufrates mayu inti haykuy lado hap'iypi llapan qolqe waqaychaqkunata, Hanaq Pacha Diospa kamachikuy siminta yachaq sacerdote Esdrasman tukuy mañakusqanta usqhaylla qonankupaq.

²²Kaykunatan qonkichis: Kinsa waranqa kinsa pachak kilo qolqeta, iskay pachak phisqa chunka costal trigota, iskay waranqa iskay pachak litro vinota, iskay waranqa iskay pachak litro aceiteta, kachitataq hayk'an munasqankuta.

²³Hanaq Pacha Diospa tukuy ima kamachikusqanta pay yupaychana wasipaq usqhayllata ruwankichis, kamachikusqay suyupaqpas churiykunapaqpas Dios ama phiñakunanpaq.

²⁴Kamachiykichismi, aman cobrankichischu llapan sacerdotekunamanta, Leví runakunamanta, takiqkunamanta, punku qhawaqkunamanta, Diospa wasinpi llank'aqkunamanta, Dios yupaychana wasipi wak kamachikunamantapas ima rikch'aq impuestotapas.

²⁵Qantaq Esdras, Diosniykimanta yachayta chaskisqaykiman hina, llapan Eufrates mayu inti haykuy lado hap'iypi tiyaq runakunapaq, juezkunata kamachikuqkunata churay chaninta kamachinankupaq. Llapankun yachananku Diospa kamachikuy simintaqa, chayraykun mana yachaqkunamanpas yachachinki.

²⁶Pipas Diosniykiq kamachikuy siminta ñoqaq kamachikusqaytapas mana kasukuqqa, usqhaylla muchuchisqa kachun, wañuchisqapas, wikch'usqapas kaqninkuna qechusqapas, carcelman wisq'asqapas, nispa.

²⁷Chaymi Esdrasqa Diosta yupaycharqan: ¡Saminchasqa kachun taytaykuq Diosnin Señorqa! Paymi reypa sonqonta kuyurichirqan Jerusalenpi wasinta hatunchananpaq.

²⁸Paymi munakuwaspanku reywan yuyaychaqninkunawan umallikunapiwan allinta qhawarichiwarqanku, chaymi Diosniy Señor Diospa yanapasqan kaspa kallpachakurqani, hinaspa Israel umalli runakunata huñurqani ñoqawan kuska kutinankupaq, nispa.