Read Diospa Simin Qelqa ESDRAS 9 Bible Online

ESDRAS 9 - Diospa Simin Qelqa bible

ESDRAS 9

¹Chaykuna qhepatataq umalli runakuna asuykamuwaspa niwarqanku: Israel runakuna, sacerdotekuna, Leví runakunapas manan kay suyu runakunaq map'a millay ruwayninkunamanta t'aqakunkuchu. Canaán runakuna, Het runakuna, Ferez runakuna, Jebus runakuna, Amón runakuna, Moab runakuna, Egipto runakuna, Amor runakuna hinallataqmi ruwashanku.

²Chay runakunaq ususinwanmi paykunapas churinkupas casarakurqanku, ñawpaqtaqa umalli runakunan kamachiqkunan chay hinata huchallikurqanku. Chay hinapin Diospa ch'uya llaqtanqa chay runakunawan qhellichakapurqanku, nispa.

³Chayta uyarispaymi p'achayta capayta llik'ikurqani, chukchaytapas sunkhaytapas t'irakurqani, sinchi llakisqataq tiyaykurqani.

⁴Hinan Israel runakunaq Diosninpa nisqanta llapa manchakuqkuna ñoqaman huñukamuwarqanku, kamachi-kaymanta kutimuqkunaq huchallikusqan hawa. Ñoqataq sinchi llakisqa phutisqa tiyasharqani tarde sacrificio horaskama.

⁵Sacrificio horasña kaqtintaq, llakikusqaymanta sayarispa llik'isqa p'achantin qonqoriykukuspa, Diosniy Señor Diosman makiyta haywarispa

⁶mañakurqani: ¡Diosníy! P'enqasqan musphasqan kashani, manan imayna rimariyta atishanichu, huchaykun sinchita miraykun uma wasapayta, huchaykun hanaq pachakamaraq chayan.

⁷Ñawpa taytaykuq p'unchayninmantapacha kunankaman sinchi huchallapi kawsayku. Chay huchayku hawan ñoqaykutapas, reyniykutapas, sacerdoteykutapas wak llaqta reykunaman hap'ichiwarqankiku, chaymi k'irisqa, wikch'usqa, llat'anasqa, pisichasqa ima karqayku. Chay hinallataq kunanpas kashayku.

⁸Chaywanpas, Diosniyku Señor Dios, qanqa khuyapayariwarqankikun, chaymi kaypi kashayku pisilla puchuqkuna kay ch'uya hallp'api samilla tiyanaykupaq. Kamachi-kayniykumanta samarichiwaspaykiku, sonqoykutapas kawsarichiwarqankiku.

⁹Kamachiña karqayku chaypas, qanqa manan saqerpariwarqankikuchu. Qanmi khuyapayaspa Persia suyu reykunawan allinta qhawarichiwarqankiku. Chayraykun kawsayniyoqta kutichimuwarqankiku, wasiykita thunisqamanta wakmanta sayarichinaykupaq, Judapi Jerusalenpi samillata waqaychawanaykikupaq.

¹⁰Kunanqa Diosniyku, ¿ima nisaqkutaq, chhaynataña ruwashaqtiykipas? Kamachikusqaykitan p'akirqayku.

¹¹Qanmi kamachiyki profetakunawan kamachiwarqankiku: Hap'ikapuq haykunaykichis hallp'aqa qhellichasqan kapun chaypi tiyaq runakunaq map'a millay-kayninwan, suyuntintataq qhelli-kayninkuwan hunt'aykurqanku.

¹²Chayrayku, ususiykichista churinkuwanqa ama casarachinkichischu, amataq ususinkuwanpas churiykichista casarachinkichischu, amallataq paykunaq allin kanantapas qhapaqyanantapas munankichischu. Chay hinapin kallpayoq kankichis, hallp'aq allin poqochisqanta mikhunkichis, hinallataq churiykichispaq chay hallp'ata wiñaypaq saqenkichis, nispa.

¹³Tukuy imaymana sasakunataña muchurqayku mana allin ruwasqaykumanta huchaykumantawan chaypas, manan muchuchiwarqankiku huchaykumanta chaskinaykuta hinapunichu, aswanpas kay pisilla puchuq runakunatan qespichiwarqankiku.

¹⁴¿Imaynataq kamachikuyniykikunata wakmanta p'akiykuman, kay map'a millay runakunawan casarakuspayku? Chay hinata ruwaqtiykuqa, phiñakuspaykin llapallaykuta ch'usaqyachiwankiku.

¹⁵¡Ay! Israelpa Diosnin Señorniyku, chaninmi kanki. Qanmi kay pisilla puchuq runakunata kawsachiwankiku. Qanmanmi huchaykuta willakuykiku, ñawpaqeykipiqa manan huchantin kaykumanchu, nispa.