Read Diospa Simin Qelqa NEHEMÍAS 1 Bible Online

NEHEMÍAS 1 - Diospa Simin Qelqa bible

NEHEMÍAS 1

¹Hacaliaspa churin Nehemiasmanta[1] willakuykuna. Rey Artajerjes iskay chunkakaq watapi kamachikushaqtinmi, Quisleu killapi suyuq hatun llaqtan Susapi kasharqani.

²Hinan wawqey Hanani wakin qharikunapiwan Judamanta chayamuspa hamuwarqanku. Tapuykurqanitaq Jerusalén llaqtamanta, kamachi-kayman mana apasqa judío runakunamantawan.

³Hinan niwarqanku: Kamachi-kayman mana apasqakunaqa haqay hap'iypi sinchi wakchan pisichasqan kashanku. Jerusalenpa muyuriq perqanpas thunisqa, punkukunapas ninaq ruphasqanmi kashan, nispa.

⁴Chayta uyarispaymi tiyaykuspa waqarqani. Iskay-kinsa p'unchay ayunaspa Hanaq Pacha Diosmanta mañakuspa llakisqa nirqani:

⁵Señorníy, Hanaq Pacha Dios, qanqa hatunmi manchanan kanki. Munakuywan kamachikuyniykikunata kasukuqkunapaqmi, qanqa munakuywan rimanakusqaykita hunt'aqllapuni kanki.

⁶Señor Diosníy, qhawariway, uyariway. Tuta-p'unchaymi mañakamushayki Israel runa kamachiykikunapaq. Willakamuykin Israel runakunaqa contraykipi huchallikusqaykuta. Ñoqapas aylluypas huchallikullarqaykutaqmi.

⁷Manan kasukurqaykuchu kamachiyki Moiseswan willachiwasqaykiku kamachikuyniykikunata, unanchay simiykikunata, chaninchayniykikunatapas. Aswanpas sinchi mana allintan contraykipi ruwarqayku.

⁸Chaywanpas, yuyariy kamachiyki Moisesman nisqayki simita: Huchallikunkichis chayqa, wak suyukunamanmi ch'eqechisqaykichis.

⁹Ichaqa, ñoqamanchus kutirikamuwankichis, kamachikuyniykunatapas kasuwankichis chayqa, kay pachantinmanña ch'eqechisqa kankichis chaypas, ñoqan wakmanta huñumusqaykichis sutiyta yupaychanapaq akllakusqay cheqasman, nispa.

¹⁰Señor Diosníy, paykunaqa kamachiykikunan llaqtaykin kanku, hatun atiyniykiwanmi kallpaykiwanmi paykunata qespichirqanki.

¹¹Chay hinaqa, Señor Diosníy, uyariykuway mañakusqayta, uyarillaytaq qanta hatunchay munaq kamachiykikunaq mañakusqantapas. Yanapaykuway kunan p'unchay reypa allinta qhawariwananpaq, nispa. Ñoqaqa chay tiempopi reypa vino haywaqninmi karqani.