Read Diospa Simin Qelqa ESTER 1 Bible Online

ESTER 1 - Diospa Simin Qelqa bible

ESTER 1

¹Rey Asueron India suyumanta Etiopía suyukama kamachirqan, kamachisqan suyupiqa pachak iskay chunka qanchisniyoq provinciakunan karqan.

²Chaykunatan kamachirqan suyuq hatun llaqtan Susamanta.

³Kinsakaq watapi kamachikushaspanmi rey Asueroqa hatun fiestata wakichirqan, chaymanmi waqyachirqan oficialninkunata, yuyaychaqninkunata, Mediamanta Persiamantawan ejército umallikunata, provinciakunapi kamachikuqkunatawan.

⁴Payqa munarqanmi qhapaq kayninta, suyuq ancha hatun kasqanta, atiyninpas ancha musphana kasqantawan paykunaman rikuchiyta. Chay fiestaqa soqta killantinmi karqan.

⁵Chaymantapas huk fiestatawanraqmi wakichirqan reypa kamachikunan wasi huerta patiopi, hinaspan hatun Susa llaqtapi llapan tiyaqkunata, qhapaqkunata, wakchakunatapas waqyachirqan. Chay fiestan qanchis p'unchaynintin karqan.

⁶Chay patiopin yuraq qespi rumi tusakuna karqan, tusakuna patapitaq qolqe argollakuna kanichisqa karqan, chay argollakunamanmi yuraqniyoq llawlli-puka algodón cortinakuna linomanta sani ñañu waskhapi warkusqa karqan. Pampantaq yuraq k'anchaq rumiwan, yuraq qespi rumiwan, perlawan, siwar umiñapiwan mast'aspa llusk'achasqa karqan. Chaypitaq qorimanta qolqemanta ruwasqa puñunakuna churasqa karqan.

⁷Allin runa rey kaqtinmi vinoqa unu hinaraq karqan, tukuy rikch'aq qori vasokunapin haywachirqan.

⁸Reymi vino haywaqnin umallikunata kamachirqan pipas mana munaqtaqa ama ukyachinanpaq, aswanpas sapanka ima munasqankuta ukyanankupaq.

⁹Hinallataq reina Vastipas rey Asueroq wasinpi warmikunapaq fiestata ruwallarqantaq.

¹⁰Fiesta tukukuy qanchiskaq p'unchaytaq reyqa vinota ukyaykuspa sonqopas-sonqo karqan. Chaymi sapaq kamachinpi kaq eunuco[1] qharikunata Mehumanta, Biztata, Harbonata, Bigtata, Abagtata, Zetarta, Carcastawan kamachirqan

¹¹reina Vastita qayllanman umanpi sumaq coronayoqta pusamunankupaq. Reyqa munarqan oficialninkunaman llapa runakunamanwan reinaq sumaq rikch'ayninta rikuchiyta, pay sumaq rikch'ayniyoq kasqanrayku.

¹²Reina Vastitaq ichaqa mana kasurqanchu eunuco qharikunawan reypa kamachisqanta. Chaymi reyqa sinchita phiñakuspa rawrarirqan.

¹³Yachasqañan karqan reypa sasachakuyninkunata kamachikuy simi allin yachaqkunaq chaninchanankuqa. Chaymi payqa chaninchay yachaqkunata waqyachimurqan.

¹⁴Reyta aswan yuyaychaqkunan karqan: Carsena, Setar, Admata, Tarsis, Meres, Marsena, Memucanpiwan. Paykunan karqan Persiapi Mediapi kamachikuqkuna. Reypa qayllanman haykunankutaqa manan pipas hark'aqchu, suyupipas ancha chaniyoq runakunan karqanku.

¹⁵Huñuykusqa kashaqtinkun reyqa tapurqan: — Kamachikuyman hina, ¿imatan ruwasunman reina Vastita eunucokunawan kamachisqayta mana kasuwasqanmanta? nispa.

¹⁶Hinan kamachikuqkunaq qayllanpi Memucanqa reyta nirqan: — Reina Vastiqa manan rey contrallachu huchallikun, payqa suyuykipi tukuy runakuna contran huchallikun, hinallataq llapa kamachikuqkuna contrapas.

¹⁷Chay hinaqa, llapan warmikunan reinaq ruwasqanta yachaspa kasqallantataq qosankuta pisichaspa ninqaku: Reina Vastipas manan kasurqanchu rey Asueroq kamachisqanta, ¿chaychu ñoqanchis kasusunman qosanchista? nispa.

¹⁸Reinaq ruwasqanta yachaspaqa Mediapi Persiapi oficialniykikunaq warminkunaqa kunanpachan qosankuta rimapakunqaku, ahinapitaq pisichaypas mana allin kawsaypas kanqa.

¹⁹Chay hinaqa, reyníy, allin rikch'akusunki chayqa, kay hina unanchayta willachiy, hinallataq Persia suyuqpas Media suyuqpas kamachikuynin qelqapi qelqay ama yanqayachisqa kananpaq: Reina Vastiqa manan hayk'aqpas rey Asueroman qayllaykunqañachu, nisqata. Chaymantapas paypa rantinpi huk aswan allin warmita reinata churanki.

²⁰Ahinapin ancha hatun suyuntinpi qanpa unanchasqayki willasqa kaqtin, llapan warmikuna qhapaqkunapas wakchakunapas qosankuta respetanqaku, nispa.

²¹Hinan reymanpas yuyaychaqkunamanpas Memucanpa yuyaychasqan allinpuni rikch'akurqan, chaymi reyqa nisqanta hina ruwarqan.

²²Suyupi llapan provinciakunamantaq qelqakunata apachirqan, sapankaq rimayninku rimaypi, qelqayninku qelqapi, llapan qharikuna wasinkupi kamachikunankupaq kamachispa.