Read Diospa Simin Qelqa ESTER 2 Bible Online

ESTER 2 - Diospa Simin Qelqa bible

ESTER 2

¹Phiñakuynin thaniykuqtintaq rey Asueroqa yuyarirqan reina Vastita, mana kasukusqanta, reina contra kamachisqantapas.

²Hinan reypa oficialninkuna payta nirqanku: — Allinmi kanman, reyníy, sumaq rikch'ayniyoq doncella sipaskunata qanpaq maskhamunkuman chayqa.

³Chaypaqtaq suyuntinpi sapanka provinciakunapi huk oficialta churawaq, chay sipaskunatataq Susa llaqtapi reypa warminkunaq wasinman apamunkuman. Chaypitaq warmikuna qhawaq reypa eunucon Hegai paykunata qhawanman, sapankamantaq q'apaq hawinakunata sumaqchakunankupaq qonman.

⁴Mayqenninkutachá aswanta munawaq, chay sipas reina Vastiq rantinpi kapunman, nispa. Hinan reyman chay yuyaychasqankuqa allin rikch'akurqan, chaymi ruwarqan nisqankuman hina.

⁵Susa llaqtapin huk judío runa tiyarqan Mardoqueo sutiyoq, payqa Benjamín ayllumantan karqan, taytanmi karqan Jair, Jairpa taytantaq Simei, Simeipa taytantaq Cis.

⁶Babilonia rey Nabucodonosormi askha judío runakunata Judá rey Jeconiasta ima Jerusalenmanta apasqa, Mardoqueopas chaywan kuska apasqallataq kasqa.

⁷Mardoqueoqmi huk priman karqan mana tayta-mamayoq, paypa sutinmi Hadasa karqan, huk sutintaq Ester karqan. Paytan wawachakapurqan tayta-maman wañukapuqtin. Esterqa munay siklla sumaq rikch'ayniyoq sipasmi karqan.

⁸Reypa unanchasqan kamachikuy willakuqtintaq askha sipaskuna huñusqa karqan, hinan Susa llaqtapi reypa wasinman aparqanku. Paykunatan Hegaiman saqerqanku cuidaspa yanapananpaq, Esterpas paykunawan apasqallataq karqan.

⁹Hegaiqa Estertan allinta qhawarirqan, anchatataq munarqan, chaymi payqa tukuy q'apaq hawinakunata qorqan sumaqchakunanpaq, hinallataq mikhunatapas aswan allinninta qorqan. Reypa wasinmantataq aswan allinnin qanchis sipaskunata Esterpa kamachinpaq qorqan, hinaspan chaykunatawan kuska reypa warminkunaq wasinpi huk sumaq wasipi tiyachirqan.

¹⁰Esterqa manan willakurqanchu mirayninmantapas ayllunmantapas, Mardoqueoq ama rimarinanpaq kamachisqanrayku.

¹¹Mardoqueotaq sapa p'unchay reypa warminkunaq wasin patio qayllapi puriykachasharqan, Esterpa imayna kashasqanta imaynatachus payta ruwashasqankutawan yachananpaq.

¹²Warmikunapaq kamachikuyman hinan llapan chay doncellakunaqa watantin sumaqchakurqanku, soqta killa cuerponkuta hawikurqanku mirra aceitewan, huk soqta killataq warmikunaq sumaq q'apaq hawinanwan llusinanpiwan hawikurqanku. Chaymantataq sapanka doncellakuna sutinkuq tupamusqanman hina reypa ñawpaqenman rirqanku.

¹³Tukuy ima munasqanta mañakusqanmi qosqa karqan, chaykunawan churaykukuspataq warmikunaq wasinmanta reypa wasinman rirqanku.

¹⁴Reypa wasinmanqa ch'isinmi rirqan, qhepantin paqartaq warmikunaq hukkaq wasinman rirqan, chaytan qhawarqan reypa eunucon Saasgaz, paymi karqan reypa tiyaqmasin warmikuna qhawaq. Chay qhepataqa manan hayk'aqpas reypa qayllanman kutirqanñachu, aswanpas rey munanman hinaspa waqyachinman chayllan.

¹⁵Mardoqueoq tion Abihailpa ususin Esterman tuparqan reyman qayllaykunan, hinan imatachus reypa eunucon warmikuna qhawaq Hegai qorqan chayllawan churakurqan. Esterwan llapan tupaqkunaqa ancha allintan payta qhawarirqanku.

¹⁶Rey Asuero qanchiskaq watapi kamachikushaqtinmi, chunkakaq Tebet killapi, reypa kamachikunan wasiman Esterta pusarqanku, hinan reyman qayllaykurqan.

¹⁷Reytaq Esterta rikurqospa anchatapuni munakurqan, payta hinaqa manan hayk'aqpas huk warmita munakurqanchu. Chay hinapin Esterqa rey Asueroq sonqonta suwarqan. Chaymi reyqa huk sipaskunamantapas aswan allinta qhawarirqan, hinaspan huk coronata umanman churarqan Vastiq rantinpi reina kananpaq.

¹⁸Chaymantataq reyqa hatun mikhuyta wakichirqan Esterpa sutinpi, hinaspan waqyachirqan llapan oficialninkunata suyupi yuyaychaqninkunatawan. Suyuntin provinciakunapi contribución paganata pisiyachirqan, hinallataq reykunaq qoykukuq kayninman hina askha qokuykunata rakirqan.

¹⁹Doncella sipaskuna iskaykaq kutipi huñuykusqa kasqanku p'unchaymi Mardoqueoqa reypa wasin punkupi tiyasharqan.

²⁰Esterqa Mardoqueoq yuyaychasqanman hinan mana willakurqanchu mirayninmantapas ayllunmantapas, aswanpas Mardoqueoq yachachisqantan kasukurqan imaynan wasinpi kashaspa kasukullaqpuni hinata.

²¹Reypa kamachinan wasi punkupi Mardoqueo tiyashaqtinmi, reypa wasi punku qhawaqnin eunucokunaqa Bigtanpiwan Terespiwan phiñasqa rimanakurqanku rey Asuerota wañuchinankupaq.

²²Chayta uyarispataq Mardoqueoqa reina Esterman willarqan, Estertaq reyman willarqan: Mardoqueon ahinata nin, nispa.

²³Hinan chayta allinta tapupakuspa hinapuni kasqanta yacharqan, iskaynin eunucokunatataq seq'osqa wañunankupaq kamachirqan. Chay ruwasqaqa suyuq willakuy qelqanpin qelqasqa karqan.