Read Diospa Simin Qelqa ÉXODO 1 Bible Online

ÉXODO 1 - Diospa Simin Qelqa bible

ÉXODO 1

¹Kaymi Israelpa churinkunaq sutin, paykunan haykurqanku Egipto suyuman, sapankapas warmintin wawantinkama. Sutinkutaq kaykuna:

²Rubén, Simeón, Leví, Judá,

³Isacar, Zabulón, Benjamín,

⁴Dan, Neftalí, Gad, Aserpiwan.

⁵Jacobpa llapa mirayninmi qanchis chunka runa karqan. Josetaq Egiptopiña kasharqan.

⁶Josepas wawqenkunapas Egiptoman riq llapa wiñay-masinkunapas wañukapurqankun.

⁷Chay qhepatan Israel runakunaqa miraspa askhayaspanku aswan kallpayoq karqanku, sinchitataq yapakurqanku Egipto suyuman hunt'aykunankukama.

⁸Qhepamantaq Joseta mana reqsiq huk rey Egipto suyupi kapurqan. Paymi llaqtanta nirqan:

⁹— Qhawariychis, Israel runakunan ñoqanchismantapas aswan askhaña kashanku, aswan kallpasapataq kashankupas.

¹⁰Kunanqa yuyaysapa kasun, ama miraqta hinallatachu qhawasun, paqtan awqa-tinkuy kaqtin awqanchiskunawan huñukuspa ñoqanchis contra maqanakunman, hinaspa kay suyumanta ripunkuman, nispa.

¹¹Chaymi Israel runakunapaq capatazkunata churarqanku sinchita llank'achispa muchuchinankupaq. Hinan rey Faraonpaq mikhuy taqena llaqtakunata perqachirqanku, Pitón llaqtata, Ramsés llaqtatawan.

¹²Paykunata astawan muchuchiqtinkuqa astawanraqmi suyuntinpi askhayarqanku. Chaymi Egipto runakunaqa Israel runakunata manchakurqanku,

¹³hinaspan sinchita ñak'arichispa Israel runakunawan servichikurqanku.

¹⁴Sonqo nanaytan ñak'arichirqanku, t'uruchachispa, adobechispa, imaymana chakra llank'anata llank'achispa, llapan chay llank'anawanmi sinchitapuni mat'irqanku.

¹⁵Hinallataq Egipto suyu reyqa Hebreo parterakunata Sifrata Fuatawan kamachirqan:

¹⁶— Hebreo warmikunata onqochispaykichisqa ima wawachus kasqantan qhawaykunkichis, qhari kaqtinqa wañuchinkichismi, warmi kaqtintaq ama wañuchinkichischu, nispa.

¹⁷Parterakunataq ichaqa Diosta manchakuspa, mana Egipto suyu reypa kamachikusqanman hinachu ruwarqanku, aswanmi qhari wawakunata kawsachirqanku.

¹⁸Chaymi Egipto suyu reyqa paykunata waqyachimuspa nirqan: — ¿Imanaqtintaq qhari wawakunatari kawsachinkichis? nispa.

¹⁹Parterakunataq rey Faraonta nirqanku: — Hebreo warmikunaqa manan Egipto warmikuna hinachu, manan sasatachu onqokunku, paykunaman manaraq chayashaqtiykun wachakunkuña, nispa.

²⁰Diosmi yanaparqan parterakunata, chaymi Israel runakunaqa aswan-aswanta askhayarqanku.

²¹Diosta parterakuna manchakuqtinkun, Diosqa paykunata sumaqta qhawarispa wawakunata qorqan.

²²Hinan rey Faraonqa llapa llaqtanta kamachirqan: — Llapa Hebreo runakunaq qhari wawan naceqtinqa Nilo mayumankama wikch'uykuychis, llapa warmi wawa naceqtintaq ama imanankichispaschu, nispa.