Read Diospa Simin Qelqa ÉXODO 10 Bible Online

ÉXODO 10 - Diospa Simin Qelqa bible

ÉXODO 10

¹Señor Diosmi Moisesta nirqan: — Rey Faraonpata riy, ñoqan sonqontapas oficialninkunaq sonqontapas rumiyaykachini, kay musphana ruwasqaykunata paykunaman rikuchinaypaq,

²ahinapin Egipto runakunata muchuchisqaytapas musphanakunata paykuna ukhupi ruwasqaytapas wawaykikunaman nietoykikunaman willanki. Chay ruwasqaywanmi yachankichis ñoqa Señor Diosqa kasqayta, nispa.

³Hinan Moiseswan Aaronwan rey Faraonman rispa nirqanku, Hebreo runakunaq Diosnin Señormi nin: — ¿Hayk'aqkamataq mana k'umuykamuwayta munankichu? Llaqtayta kachariy yupaychamuwananpaq.

⁴Manataq rinankuta munankichu chayqa, ñoqan paqarin suyuykiman langostata chayachimusaq.

⁵Chay langostan pampaman wakwaykunqa, chhaynapin pampaqa mana rikhurinqachu. Langostan chikchiq puchunta mikhunqa, mikhullanqataqmi campopi llapa sach'akunatapas.

⁶Hunt'aykunqan wasiykikunaman, llapa oficialniykikunaq wasinmanpas, llapa Egipto runakunaq wasinmanpas, manan chay hinataqa taytaykikunapas machulaykikunapas hayk'aqpas rikurqankuchu, paykunaq kay suyupi tiyasqankumanta kunankama, nispa. Rimayta tukuspataq, Moisesqa rey Faraonpa qayllanmanta lloqsirqan.

⁷Chaymi rey Faraonpa oficialninkunaqa reyta nirqanku: — ¿Hayk'aqkamataq kay runari umanchista nanachiwasun? Kachariy chay runakunata, Diosninku Señor Diosta yupaychamunankupaq. Icha, ¿manaraqchu yachanki Egipto suyuqa purunyachisqaña kashasqanta? nispa.

⁸Chaymi Moisestawan Aarontawan wakmanta rey Faraonqa waqyachispa nirqan: — Riychis, Diosniykichis Señor Diosta yupaychamuychis. Ichaqa willawaychis, ¿pikunataq rinqakuri? nispa.

⁹Moisestaq kutichirqan: — Ñoqaykuqa Señor Diospa sutinpin fiestata ruwasaqku, chaymi llapayku ripusaqku wawantin, yuyaqnintin, churintin, ususintin, ovejantin, wakantin, nispa.

¹⁰Rey Faraontaq paykunata nirqan: — Qankunaqa mana allintapunin yuyaykushankichis. Señor Diosña qankunawan kashanman chaypas, warmiykichista wawaykichistawanqa manan kacharisaqchu.

¹¹¡Manan chhaynachu kanqa! Qharikunalla riychis Señor Diosta yupaychamunaykichispaq, chaytan riki qankunaqa munarqankichis, nispa. Hinaspanmi rey Faraonqa qayllanmanta paykunata qarqochirqan.

¹²Señor Diostaq Moisesta nirqan: — Egipto suyuman makiykita haywariy langostata chayachimunaypaq, hinaspa chikchimanta puchuqta lliwta mikhunanpaq, nispa.

¹³Chaymi Moisesqa tawnanta Egipto suyuman haywarirqan, hinan Señor Diosqa suyuman wayrachimurqan inti lloqsimuy lado wayrata chay p'unchaynintin tutantin. Pacha illarimuytataq inti lloqsimuy lado wayraqa langostata apamurqan.

¹⁴Langostataq sinchi askhapuni Egipto suyuntinman wakwaykurqan, manan chay hinaqa hayk'aqpas kasqachu, manataqmi kanqapaschu.

¹⁵Suyuntintan p'ampaykurqan, pampapas yanayaykurqanmi. Chikchimanta puchuq llapa q'achutan sach'akunaq llapa ruruntan mikhurqapurqan. Manan ima q'omerllapas Egipto suyuntinpi kapurqanchu, sach'akunapas qorakunapas.

¹⁶Hinan rey Faraonqa usqhaylla Moisestawan Aarontawan waqyachispa nirqan: — Huchallikunin Diosniykichis Señor Dios contra, qankuna contra ima.

¹⁷Valekuykichismi kay kutillatawan huchayta pampachaykuwanaykichispaq. Diosniykichis Señor Diosmanta mañaykapuwaychis kay millay muchuchiyta ñoqamanta karunchawananpaq, nispa.

¹⁸Chaymi Moisesqa rey Faraonpa qayllanmanta lloqsispa Señor Diosmanta mañakurqan.

¹⁹Hinan Señor Diosqa inti haykuy ladomanta sinchi kallpayoq wayrata wayrachimuspa langostata Puka Qochaman qatiykurqan. Manan Egipto suyuntinpi ima langostapas qheparqanchu.

²⁰Señor Diosmi ichaqa rey Faraonpa sonqonta rumiyaykachirqan, chaymi payqa Israel runakunata mana kacharirqanchu.

²¹Señor Diosmi Moisesta nirqan: — Altoman makiykita haywariy, Egipto suyuntinta sinchitapuni laqhayaykunanpaq, nispa.

²²Chaymi Moisesqa altoman haywarirqan, hinan Egipto suyuntinta sinchitapuni laqhayaykurqan kinsa p'unchaynintinta.

²³Kinsa p'unchaynintinmi mana pipas runamasinta rikurqanchu, manallataq tiyasqanmanta pipas lloqsirqanchu, Israel runakunaq tiyasqallanmanmi k'anchamurqan.

²⁴Hinan rey Faraonqa Moisesta waqyachimuspa nirqan: — Riychis, Señor Diosta yupaychamuychis, wawaykichiskunatapas pusarikuychis. Ovejaykichiskunawan wakaykichiskunallawan kaypi qhepachun, nispa.

²⁵Moisestaq kutichirqan: — Diosniyku Señor Diosman sacrificiotapas ruphachina ofrendatapas haywamunaykupaq uywakunataqa qanmi qowanaykiku.

²⁶Hinallataq uywaykutapas apakapusaqku, manan ch'ullapas qhepanqachu. Chaykunamantan akllasaqku Señor Diosniykuta yupaychanaykupaq, haqayman chayanaykukama manan yachaykuchu ima uywawanchus Señor Diosta yupaychanaykuta, nispa.

²⁷Señor Diostaq ichaqa rey Faraonpa sonqonta rumiyaykachirqan, chaymi paykunata mana kacharirqanchu.

²⁸Rey Faraontaq Moisesta nirqan: — ¡Lloqsiy kaymanta! Amañan kutimuwankichu, mana chayqa kutimuwasqayki p'unchaymi wañunki, nispa.

²⁹Moisestaq kutichirqan: — Allinmi chay nisqayki, manañan kutimusqaykichu, nispa.