Read Diospa Simin Qelqa ÉXODO 12 Bible Online

ÉXODO 12 - Diospa Simin Qelqa bible

ÉXODO 12

¹Moisestawan Aarontawanmi Señor Diosqa Egipto suyupi nirqan:

²— Kay killaqa qankunapaq kanqa wata qallariy killan.

³Llapan Israel huñusqata nimuychis: Kay killaq chunkakaq p'unchayninpi sapankaykichis familiaykichispaq huk borregotapas orqo cabratapas hap'inkichis.

⁴Familiataqchus pisilla kanqa animalta mikhuspa mana tukuq hina chayqa, wasiyoqpas wasi-masinpiwan chay animalta rakinakunqaku hayk'a runachus kasqankuman hina, sapankaq may chhikatachus mikhunanman hina.

⁵Ovejamantapas cabramantapas watayoq orqo animalta akllankichis, chay animalqa mana imanasqan kanqa.

⁶Hinaspan waqaychankichis kay killa chunka tawayoq p'unchaykama, hinaspataq llapa Israel llaqtantin runa chayta nak'ankichis rasphiyaykuyta.

⁷Yawarnintan chaskinkichis, hinaspan chaywan ch'aqchunkichis mayqen wasipichus mikhunkichis chay wasi punkuq iskaynin sayaq k'aspinta chakantawan.

⁸Chay tutapachan ninapi kankasqa aychata mikhunkichis, mana qonchuyoq t'antatawan haya qorakunatawan.

⁹Aman chay aychamantaqa imallantapas hankutapas t'impusqatapas mikhunkichischu, aswanpas umantin chakintin wiksantin ninapi kankasqallatan.

¹⁰Aman chay uywamantaqa imallantapas puchuchinkichischu paqarisninkamaqa, puchuqtaqa ninapin ruphachipunkichis.

¹¹Hinallataq puririnaykichispaq p'achasqallaña usut'asqallaña, tawna hap'illantinña mikhunkichis. Usqhayllatan chayta mikhunkichis, chay animalqa ñoqa Señor Diospa Pascuaymi.

¹²Ñoqan chay tuta llapa Egipto suyunta pasasaq, hinaspan Egipto suyupi llapa phiwita wañuchisaq, runakunaq phiwi wawantapas uywakunaq ñawpaq wachasqantapas. Egiptopi llapa dioskunatapas juzgasaqmi. Ñoqan Señor Diosqa kani.

¹³Yawarmi señalniykichis kanqa tiyashasqaykichis wasikunapi, yawarta rikuspaymi alqarparisqaykichis, chaymi Egipto runakunata wañuchiqtiy mana mayqenniykichispas wañunkichischu.

¹⁴Chay p'unchaytan yuyarinkichis, sapanka mirayniykichispi ñoqapaq hatun fiestata ruwankichis. Ñoqan kayta kamachiykichis wiñaypaq ruwanaykichispaq.

¹⁵Qanchisnintin p'unchaymi mana qonchuyoq t'antata mikhunkichis. Ñawpaqkaq p'unchaymantañan wasiykichispi qonchutaqa wikch'upunkichis, pipas qonchuyoqta mikhunqa ñawpaqkaq p'unchaymanta qanchiskaq p'unchaykama chayqa, Israel llaqtaymantan wikch'usqa kanqa.

¹⁶Ñawpaqkaq p'unchaypipas qanchiskaq p'unchaypipas yupaychawanaykichispaqmi huñukunkichis. Aman chay p'unchaykunapiqa imatapas llank'ankichischu, sapankapas mikhunallaykichistan wayk'ukunkichis.

¹⁷Chay p'unchaymi Egipto suyumanta llapaykichista horqosqaykichis, chayrayku kunan p'unchay Mana Qonchuyoq T'anta Fiestata ruwankichis, sapanka mirayniykichispipas kay fiestataqa ruwashallankichispunin.

¹⁸Ñawpaqkaq killaq chunka tawayoq p'unchaynin ch'isimanta iskay chunka hukniyoq p'unchaynin ch'isikaman mana qonchuyoq t'antata mikhunkichis.

¹⁹Qanchisnintin p'unchaymi wasiykichispi qonchu mana kanqachu. Pipas qonchuyoqta mikhuqqa, wak llaqtayoqpas Israel llaqtayoqpas kachun, Israel llaqtaymantaqa wikch'usqan kanqa.

²⁰Aman imatapas qonchuyoqtaqa mikhunkichischu, llapa wasiykichispin mana qonchuyoq t'antata mikhunkichis, nispa.

²¹Moisestaq huñuykurqan llapa Israel kurak runakunata, hinaspan paykunata nirqan: — Riychis familiaykichispaq borregota akllamuychis, hinaspa Pascua Fiestata ruwanaykichispaq nak'ankichis.

²²Huk mayt'u muña[5] k'allmata hap'ispan puruñapi yawarman challpunkichis, hinaspa chay yawarwan ch'aqchunkichis punku chakata iskaynin sayaq k'aspitawan. Amataq mayqenniykichispas wasi punkuykichismanta illarimunankama lloqsinkichischu.

²³Señor Diosmi Egipto runakunata wañuchispa pasanqa. Punkuq chakanpi iskaynin sayaq k'aspipiwan yawarta rikuspanmi, Señor Diosqa chay punkuta alqarparinqa, manataqmi wañuchinanpaq wasiykichisman sipiqta kachaykunqachu.

²⁴Kay ruwanataqa qankunapas wawaykichiskunapas wiñaypaqmi ruwankichis.

²⁵Señor Diospa qonasuykichispaq prometesqasuykichis hallp'aman haykuspaykichispas, chay ruwanataqa ruwashallankichismi.

²⁶Wawaykichischus tapusunkichis: ¿Imataq kay ruwayniykichisri? nispa chayqa,

²⁷ninkichis: Kayqa Señor Diospa uywa nak'asqa Pascuan. Paymi Egipto suyupi Israel runakunaq wasinta alqarparirqan. Egipto runakunata muchuchishaspanmi wasiykuta mana imanarqanpaschu, nispa. Chaymi Israel runakunaqa k'umuykukuspa Diosta yupaycharqanku.

²⁸Hinaspan rispanku Señor Diospa Moisesta Aarontawan kamachisqanman hina ruwarqanku.

²⁹Kuska tutataq Señor Diosqa Egipto suyupi llapa phiwita wañurachirqan, kamachikuy tiyananpi tiyaq rey Faraonpa phiwinmanta carcelpi tiyaqpa phiwinkama, hinallataq uywakunaq ñawpaq wachasqantapas.

³⁰Hinan chay tuta rey Faraonpas llapa oficialninkunapas, llapa Egipto runakunapas sayarirqan, sonqo nanay waqaytaq Egipto suyuntinpi karqan. Tukuy wasipin wañuqqa karqan.

³¹Chaymi chay tutapacha rey Faraonqa Moisestawan Aarontawan waqyachimuspa nirqan: — Runaykuna ukhumanta lloqsiychis, qankunapas Israel runakunapas, hinaspa ripuychis, Señor Diosta yupaychamuychis nisqaykichista hina.

³²Ovejaykichistapas wakaykichistapas nisqaykichista hina apaychis, hinaspa ripuychis. Ñoqapaqpas Diosmanta mañampullawaychistaq saminchawananpaq, nispa.

³³Egipto runakunapas Israel runakunata tanqarqan suyunkumanta usqhaylla ripunankupaq. Nirqankutaq: — Llapallaykun wañurasaqku, nispa.

³⁴Israel runakunan mana qonchuyoq masa chapusqankuta aparqanku, hinaspan chapunankutapas llapallanta p'achapi khipuykuspa rikrarikurqanku.

³⁵Paykunataq Moisespa kamachisqanta hina Egipto runakunamanta mañakurqanku qolqe alhajakunata, qori alhajakunata, p'achakunatawan.

³⁶Señor Diostaq Israel runakunata Egipto runakunawan sumaqta qhawarichirqan, chaymi paykunaman qorqanku hayk'an mañakusqankuta. Chay hinatan Egipto runakunata llat'anarqanku.

³⁷Israel runakunan puririrqanku Ramsesmanta Sucotman, soqta pachak waranqa qharikuna chakipikama, warmikunapas wawakunapas mana yupasqan karqan.

³⁸Paykunawanqa lloqsillarqantaqmi wak llaqta askhallaña runakuna, hinallataq ancha askha ovejakunapas wakakunapas.

³⁹Paykunata Egipto runakuna qarqoshaqtinqa, manan tiemponku karqanñachu mikhunata wayk'ukunallankupaqpas, chaymi Egipto suyumanta apamusqanku masamanta mana qonchuyoq t'antata ruwarqanku.

⁴⁰Israel runakunan Egipto suyupi tiyasqaku tawa pachak kinsa chunka watata.

⁴¹Tawa pachak kinsa chunka wata hunt'akuqtintaq, chay kikin p'unchaypi Señor Diospa llaqtanqa Egipto suyumanta t'aqa-t'aqa lloqsimpurqanku.

⁴²Chay tutan Señor Diosqa qhawasharqan Egipto suyumanta paykunata horqomunanpaq. Chaymi chay Pascua tutataqa llapa Israel runakuna sapanka mirayninkupi Señor Diosta yupaychanankupaq rikch'ashallanqakupuni.

⁴³Señor Diostaq Moisestawan Aarontawan nirqan: — Kaymi Pascua Fiestapaq kamachikuy: Manan pipas wak llaqtayoqqa chay nak'asqa uywataqa mikhunqachu.

⁴⁴Aswanpas qolqewan rantisqa kamachi runallan chaytaqa mikhunqa, qhari-kayninpi señalasqa kasqanmantaña.

⁴⁵Purikuq wak llaqtayoqwan, wak llaqtayoq llank'apakuqwanmi ichaqa chayta mana mikhunqachu.

⁴⁶Ch'ulla wasillapin mikhunkichis, aman chay aychataqa hawaman horqonkichischu, amataq tulluntapas p'akinkichischu.

⁴⁷Lliw Israel llaqtan chay fiestata ruwanqa.

⁴⁸Qanwan tiyaq pipas wak llaqtayoqqa Pascua Fiestata Señor Diospaq ruwayta munanqa chayqa, familianpi llapa qhari señalasqa kachun, hinaspaña fiestata ruwanqa, Israel suyupi suyumasiykichis hinataq kapunqa, ichaqa manan pi mana señalasqapas chayta mikhunqachu.

⁴⁹Kasqan kamachikuyllan kanqa llaqtayoqpaqpas, qankuna ukhupi tiyaq wak llaqtayoqpaqpas, nispa.

⁵⁰Llapa Israel runakunan Moisesta Aarontawan Señor Diospa kamachisqanman hina ruwarqanku.

⁵¹Chay kikin p'unchaymi Señor Diosqa Israel runakunata Egipto suyumanta t'aqa-t'aqata horqomurqan.