Read Diospa Simin Qelqa ÉXODO 13 Bible Online

ÉXODO 13 - Diospa Simin Qelqa bible

ÉXODO 13

¹Señor Diosmi Moisesta nirqan:

²— Llapa phiwikunata t'aqapuway. Israel runakuna ukhupi ñawpaqkaq naceqqa, runakunapas uywakunapas ñoqaqmi, nispa.

³Hinan Moisesqa runakunata nirqan: — Kamachi kashaspa Egipto suyumanta lloqsimusqanchis p'unchayta yuyarinkichis, chay p'unchaypin Señor Diosqa ancha atiyninwan horqomurqasunkichis. Aman qonchuyoq t'antata mikhunkichischu.

⁴Qankunaqa Abib killapin lloqsishankichis.

⁵Señor Diosmi ñawpa taytaykichisman jurarqan Canaán runakunaq, Het runakunaq, Amor runakunaq, Hev runakunaq, Jebus runakunaq hallp'ankuta qonanpaq, chay hallp'aqa lecheq, miel misk'iq askha kasqanmi. Chayman Señor Dios pusaykusuqtiykichismi kay killapi chay fiestata ruwankichis.

⁶Qanchisnintin p'unchaymi mana qonchuyoq t'antata mikhunkichis, qanchiskaq p'unchaypitaq Señor Diosta yupaychana fiesta kanqa.

⁷Chay p'unchaykunapin mana qonchuyoq t'antata mikhunkichis, suyuntinpin qonchuyoq t'antataqa ama hap'inkichischu, aman ima qonchullapas kanqachu.

⁸Chay p'unchaypin churiykichisman willankichis: Kaytaqa ruwashanchis Egipto suyumanta Señor Diospa horqomuwasqanchista yuyarispan, nispa.

⁹Chay fiestaqa Señor Diospa kamachikuy siminta rimarinapaqmi yuyarichisunkichis, imaynan makiykichispi khipusqapas mat'iykichispi watasqapas yuyarichisunkichis hina, Señor Diosmi ancha atiyninwan Egipto suyumanta horqomurqasunkichis.

¹⁰Chaymi chay fiestata sapa wata Abib killallapipuni ruwankichis.

¹¹Señor Diosmi Canaán runakunaq hallp'anman pusaykusunkichis qankunamanpas ñawpa taytaykichiskunamanpas prometesqanman hina, chayta qosuqtiykichismi

¹²llapa phiwi churita payman qopunkichis, hinallataq ñawpaq wachay llapa orqo uñakunatapas. Chaykunaqa Señor Diosmanmi tupan.

¹³Llapa ñawpaqkaq wachay asnotataq cambiankichis huk borregowan Señor Diosman haywanaykichispaq, manataq cambiankichischu chayqa wañuchipunkichismi. Phiwi churiykichiskunatapas cambiallankichistaqmi.

¹⁴Qhepamantaq churiykichis tapusunkichis: ¿Imatataq ruwashankichis? nispa chayqa, paykunata ninkichis: Kamachi kashaqtiykun, Señor Diosqa ancha atiyninwan Egipto suyumanta horqomuwarqanku.

¹⁵Sonqonta rumiyaykachikuspa rey Faraón ripunaykuta hark'awaqtinkutaq, Señor Diosqa Egipto suyupi llapan phiwita wañuchirqan, runa phiwimanta uywaq ñawpaqkaq wachasqankama. Chaymi ñoqanchisqa llapa ñawpaq wachay orqo uñataqa Señor Diosman haywanchis, phiwi churinchiskunatataq cambiapunchis, nispaykichis.

¹⁶Chay fiestan makiykipi khipusqa hina kanqa, mat'iykichispipas watasqa hinallataq, Egipto suyumanta Señor Diospa ancha atiyninwan horqomuwasqankuta yuyarinanchispaq, nispa.

¹⁷Rey Faraón Israel runakunata kachariqtintaq, Diosqa mana paykunata Filistea runakunaq llaqtanman riq ñannintachu pusarqan, hinaña chay ñan sispalla kashaqtinpas. Diosmi nirqan: “Paqtan hatun maqanakuypi rikukuspa llaqta ñakapakunman, hinaspa Egipto suyuman kutirikapunkuman”, nispa.

¹⁸Chaymi Diosqa Puka Qochaman riq ch'inneq ñanninta muyuchirqan. Israel runakunaqa Egipto suyumanta armantinkaman lloqsirqanku.

¹⁹Moisesqa Josepa tullunkunatan apapurqan Israel runakunata Josepa jurachisqanman hina. Joseqa paykunatan nisqa: — Diosqa yanapasunkichispunin, chaypachan tulluykunata kaymanta apapunkichis, nispa.

²⁰Sucotmantan puririrqanku, hinaspanmi ch'inneqwan tupay Etampi karpakurqanku.

²¹Señor Diostaq ñanninta pusananpaq ñawpaqenkuta sayaq phuyupi p'unchay rirqan, tutataq paykunata k'anchaspa sayaq ninapi rirqan, chhaynapin tutantin p'unchaynintin purirqanku.

²²P'unchaymi sayaq phuyuqa ñawpaqenkuta rishallaqpuni, tutapas sayaq nina rishallaqpuni.