Read Diospa Simin Qelqa ÉXODO 15 Bible Online

ÉXODO 15 - Diospa Simin Qelqa bible

ÉXODO 15

¹Hinaqtinmi Moisespas Israel runakunapas kay takita Señor Diosman takirqanku: — Señor Diosman takisaq, payqa hatun atiynintan rikuchiwanchis. Caballotapas sillakuqtapas Puka Qochamanmi wikch'uykurqan.

²Señor Diosmi kallpachaqniyqa, chaymi takipuni. Paymi qespichikuwarqan, paymi Diosniy, yupaychasaqmi, paymi taytaypa Diosnin, hatunchasaqmi.

³Señor Diosqa maqanakuqmi, Señor Diosmi sutinqa.

⁴Puka Qochamanmi wikch'uykurqan rey Faraonpa carretankunatapas ejercitontapas. Allinnin capitanninkunapas Puka Qochapin heq'eparqanku.

⁵Rumi hinan pampakama chinkaykurqanku, ukhullaña qochan paykunata millp'uykurqan.

⁶Señor Diosnilláy, paña makiykin ancha atiyniyoq, Señor Diosnilláy, paña makiykin awqata ñut'urqan.

⁷Manchana atiyniykiwanmi contrayki sayariqkunata atipanki. K'arakta phiñakuspaykin paykunata ichhuta hina rupharparinki.

⁸Kallpawan phukuykuqtiykin unuqa huñuykukurqan, phoqchiqeqkunan perqa hina sayarirqan, ukhullaña qochan rumiyaykurqan.

⁹Awqaqa nirqanmi: Qatisaqmi, hap'isaqmi, qechusqakunatan rakisaq, chaykunawanqa amikusaqraqmi. Espadaytan horqokusaq, makiymi paykunata chinkachipunqa, nispa.

¹⁰Ichaqa phukuykurqankin, hinan qochaqa paykunata p'ampaykurqan, titi hinan ati-musphay unuman chinkaykurqanku.

¹¹Señor Diosnilláy, ¿mayqen diostaq qan hinari? Manan mayqenpas qan hinaqa qhapaq ch'uya kanchu, musphanakunata manchanakunata ruwaqqa.

¹²Paña makiykitan haywarirqanki, hallp'ataq awqakunata oqoykurqan.

¹³Mana tukukuq munakuyniykiwanmi qespichisqayki llaqtata pusanki, atiyniykiwanmi ch'uya tiyanaykiman pusanki.

¹⁴Hatun suyukunan chayta yachaspa chukchunqaku, Filistea runakunan manchapakunqaku.

¹⁵Edom kamachikuqkunan mancharikunqaku, Moab umallikunan manchasqa khatatatanqaku, Canaán llapa runakunan chiriyanqaku.

¹⁶Señor Diosnilláy, anchatapuni manchapakuchunku, ancha atiyniykiwan rumi hina kachunku ama kuyurichunkuchu llaqtayki pasanankama, kay rantikamusqayki llaqta pasanankama.

¹⁷Señor Diosnilláy, qanmi orqoykipi tiyachinaykipaq pusanki, tiyanaykipaq akllakusqaykiman pusanki, wakichisqayki ch'uya pachaman pusanki.

¹⁸Señor Diosmi wiñay-wiñaypaq kamachikunqa, nispa.

¹⁹Rey Faraonpa carretankunan caballopi soldadonkunan Puka Qochaman haykurqan, hinan Señor Diosqa unuta paykunaman kutiykachirqan. Israel runakunataq ichaqa qocha ukhunta ch'akinta chimparqanku.

²⁰Chaymi Aaronpa panan profetisa Mariaqa panderetata hap'irqan, llapa warmikunataq paypa qhepanta puririrqanku pandereta hap'intin tusukuspa.

²¹Mariataq takispa nirqan: — Señor Diosman takiychis, payqa hatun atiynintan rikuchiwanchis. Caballotapas sillakuqtapas Puka Qochamanmi wikch'uykurqan, nispa.

²²Moisesmi Israel runakunata Puka Qochamanta pusarqan, chaymi Shur ch'inneqman ripurqanku, chaypitaq kinsa p'unchay mana unuta tarispa purirqanku.

²³Chaymantataq Maraman chayarqanku, manataq chaypi kaq unuta ukyayta atirqankuchu p'osqo kasqanrayku. Chaymi chayneqta Mara[6] sutiwan suticharqanku.

²⁴Chaypachan runakunaqa Moisés contra chhuchupakuspa tapurqanku: — ¿Imatan ukyasun? nispa.

²⁵Hinan Moisesqa Señor Diosta waqyakurqan, Señor Diostaq payman huk sach'ata rikuchirqan. Chaymi chay sach'ata unuman wikch'uykurqan, unutaq misk'i kapurqan. Chaypin Señor Diosqa paykunata probarqan, chayllapitaqmi paykunapaq kamachikuytapas chaninchaytapas churarqan.

²⁶Nirqanmi: Ñoqa Diosniykichis Señor Diospa simiytachus makilla uyarinkichis, chanin kaqtachus qayllaypi ruwankichis, kamachikuyniykunatapas kasukunkichis, tukuy unanchay simiykunatapas hunt'ankichis chayqa, manan Egipto runakunata hap'ichisqay onqoykunawanqa hap'ichisqaykichischu, ñoqaqa qhaliyachiqniykichis Señor Diosmi kani, nispa.

²⁷Chaymantataq Elimman chayarqanku, chaypin qanchis pukyu karqan, qanchis chunka palmerapiwan. Chaypin unu patapi karpakurqanku.