Read Diospa Simin Qelqa ÉXODO 18 Bible Online

ÉXODO 18 - Diospa Simin Qelqa bible

ÉXODO 18

¹Moisespa suegron Madián suyupi sacerdote Jetron uyarirqan Diospa tukuy imaymanata Moisespaqpas llaqtan Israelpaqpas ruwasqanta, uyarillarqantaq imaynatachus Señor Diosqa Israel runakunata Egipto suyumanta pusamusqantapas.

²Moisesqa warmin Seforatan kacharqan suegron Jetroqta paytaq chaskiykurqan,

³iskaynin churinkunantinta. Hukninpa sutinmi Gersón karqan, Moisesmi nisqa: Wak runaq llaqtanpin forastero kani, nispa.

⁴Hukninpa sutintaq Eliezer[10] karqan, Moisesmi nisqa: Taytaypa Diosninmi yanapaykuwarqan, hinaspan rey Faraonpa wañuchiwananmanta qespichiwarqan, nispa.

⁵Diospa orqon qaylla ch'inneqpin Moisesqa tiyasharqan, chaymanmi Jetroqa Moisespa churinkunapiwan warminpiwan rirqan.

⁶Hinaspanmi Moisesman kacharqan: — Ñoqa suegroyki Jetron watukamushayki warmiykipiwan churiykikunapiwan, nispa, nimuqta.

⁷Chaymi Moisesqa suegron chaskiykuq lloqsirqan, hinaspataq ñawpaqenpi k'umuykukuspa payta much'aykurqan. Chaymantataq tapunakurqanku imaynachus kashasqankuta, hinaspan karpaman haykurqanku.

⁸Chaypin Moisesqa suegronman willarqan Señor Diosqa Israel runakunarayku rey Faraontapas Egipto runakunatapas imaymana ruwasqanta, willallarqantaq imaynatachus ñanpipas muchumusqankuta, imaynatataqchus Señor Diosqa paykunata qespichimusqantapas.

⁹Hinaqtinmi Jetroqa Señor Diospa Egipto runakunaq munaychakuyninmanta qespichimusqanta yachaspa, Israel runakunapaq allinkunata ruwasqanmanta kusikurqan.

¹⁰Nirqantaq: — Saminchasqa Señor Diosqa kachun, rey Faraonpapas Egipto runakunaqpas munaychakuyninmanta qespichimusqasuykichismanta. Saminchasqa Señor Diosqa kachun, llaqtatapas Egipto runakunaq munaychakuyninmanta qespichimusqanmanta.

¹¹Umankuta hoqarishaqtinkun, paykunata atiparqan. Kunanqa yachanin Señor Diosqa llapan dioskunamantapas aswan atiyniyoq kasqanta, nispa.

¹²Hinaspan Jetroqa Diospaq ruphachina sacrificiotapas huk ofrendakunatapas haywarqan. Aarontaq llapa Israel kurak runakunapiwan Diospa qayllanpi Moisespa suegronwan mikhunankupaq rirqan.

¹³Qhepantin p'unchaytaq Moisesqa Israel runakunata chaninchaq tiyaykurqan, paykunan Moisespa qayllanpi tutamanta ch'isiyaykuykama sayasharqanku.

¹⁴Jetrotaq runakunapaq tukuyta qatayninpa ruwasqanta rikuspa, payta nirqan: — ¿Imatataq kaytari ruwanki? ¿Imanaqtintaq sapallaykiri tiyaykunki, lliw runataq p'unchay-ch'isiyaq sayarayaspa suyaykushasunki? nispa.

¹⁵Moisestaq suegronta nirqan: — Runakunaqa Diosta tapunaypaqmi hamuwanku.

¹⁶Ima sasachaypas paykuna ukhupi kan chayqa, ñoqamanmi hamunku mayqentapas chaninchanaypaq, hinaspa paykunaman willani Diospa yachachikuyninkunata kamachikuyninkunatawan, nispa.

¹⁷Hinan suegronqa payta nirqan: — Manan allinchu chay ruwasqaykiqa.

¹⁸Sinchitan sayk'unki, suyaqniyki runakunapas sayk'ullantaqmi. Qan sapallaykipaqqa sinchin, manan sapallaykiqa ruwayta atiwaqchu.

¹⁹Kunan yuyaychaykusqayki, uyariykuway, Diosmi yanapaykusunki. Runakunaq Diosman qayllaykunantan qan qayllaykunki, sasachayninkutapas Diosman willanki.

²⁰Yachachikuykunatapas kamachikuykunatapas paykunaman yachachinki, yachachillankitaq imaynatachus kawsanankuta, imatachus ruwanankutapas.

²¹Chaymantapas akllallaytaq allin reparaq qharikunata, Diosta manchakuqkunata, mana llullakuqkunata, confiakunapaq hina qharikunata, lluk'iykuyta mana chaskikuqkunata, hinaspa paykunata churay waranqa runapi, pachak runapi, phisqa chunka runapi, chunka runapiwan kamachikunankupaq.

²²Paykunan runakunata tukuy tiempo chaninchanqaku, llapa sasa kaqtataq apamusunkiku, llapa mana sinchi sasa kaqtataq paykuna chaninchanqaku. Chay hinatan llank'ayniykita pisiyachikunki, paykunataq yanapasunkiku.

²³Diosmi chayta kamachishasunki, chay hinatachus ruwanki chayqa, atinkin aguantayta, kay llapallan runakunapas kusisqan karpankuman ripunqaku, nispa.

²⁴Hinan Moisesqa suegronpa siminta hap'ikurqan, hinaspan tukuy nisqanta ruwarqan.

²⁵Moisesmi lliw Israel runakunamanta allin reparaq chaypaq hina qharikunata akllarqan, hinaspan runakunata kamachinankupaq churarqan: Waranqaman, pachakman, phisqa chunkaman, chunkamanwan.

²⁶Paykunaqa tukuy tiempon runakunata chanincharqanku. Sasa kaqtataq Moisesman aparqanku, paykunataq llapa mana sinchi sasa kaqta chanincharqanku.

²⁷Chaymantataq Moisesqa suegronta kacharparipurqan, chaymi payqa llaqtanman kutipurqan.