Read Diospa Simin Qelqa ÉXODO 2 Bible Online

ÉXODO 2 - Diospa Simin Qelqa bible

ÉXODO 2

¹Leví ayllu runan kikin ayllun warmiwan casarakurqan.

²Warminmi wiksallikuspa qhari wawata wachakurqan. Munayllaña kasqanta qhawaykuspataq mamanqa kinsa killantin pakarqan.

³Manaña astawan pakayta atispataq t'otora canastata llink'i t'uruwan breapiwan llut'aspa chayman wawata churaykurqan, hinaspataq mayu pata t'otora-t'otoraman churaykamurqan.

⁴Wawaq panantaq karumanta qhawasharqan, imachus wawata sucedenanta rikunanpaq.

⁵Rey Faraonpa ususintaq mayuta bañakuq uraykurqan, kamachin sipaskuna mayu patapi purishanankukamataq payqa t'otora-t'otorapi canastata rikuspa huknin kamachin sipasta kacharqan horqomunanpaq.

⁶Chayta kicharispa qhawaykuqtintaq qhari wawa waqaykushasqa, hinan rey Faraonpa ususinqa khuyapayaykuspa nirqan: — Hebreo runakunaq wawanmi kayqa, nispa.

⁷Wawaq panantaq rey Faraonpa ususinta nirqan: — ¿Waqyampusqaykichu huk Hebreo warmita kay wawata ñuñupunasuykipaq? nispa.

⁸Rey Faraonpa ususintaq: — Phaway, nirqan. Chaymi sipasqa rispa wawaq mamanta waqyamurqan.

⁹Chay warmitan rey Faraonpa ususinqa nirqan: — Kay wawata apaspa uywampuway, ñoqataq pagapusqayki, nispa. Warmitaq wawata apaspa uywampurqan.

¹⁰Hatunña wawa kaqtintaq, warmiqa rey Faraonpa ususinman apampurqan, paytaq wawachakapurqan, suticharqantaq Moisesta:[1] Unumantan horqomurqani, nispa.

¹¹Moisesqa yuyayniyoq runaña kaspanmi wawqenkunaman watukuq rirqan, hinaspan paykunata rikurqan sinchi khuyay llank'ashaqta, rikullarqantaq huknin Hebreo llaqtamasinta Egipto runaq maqashasqanta.

¹²Chaymi hinantinta qhawarqarikurqan, mana pitapas rikuspataq Egipto runata wañurqochispa aqoman p'amparqorqan.

¹³Paqarisninta rispataq iskay Hebreo runakuna maqanakushaqta rikurqan. Chaymi maqaqkaqta nirqan: — ¿Imanaqtinmi wawqeykita maqashanki? nispa.

¹⁴Paytaq kutichikurqan: — ¿Pin qanta churarqasunki kamachiwanaykikupaq anyawanaykikupaqpas? ¿Egipto runata wañuchisqaykita hinachu wañuchiwayta munanki? nispa. Hinaqtinmi Moisesqa manchapakurqan, repararqantaq Egipto runata wañuchisqanqa sut'i yachakusqanta.

¹⁵Moisespa Egipto runata wañuchisqanta yachaspanmi, rey Faraonqa payta wañuchiyta yuyaykurqan. Moisestaq ichaqa rey Faraonpa qayllanmanta ayqekapuspa Madián suyuman ripurqan. Unu p'uytu qayllapi tiyashaqtintaq,

¹⁶Madián suyupi sacerdoteq qanchis ususinkuna unu wisiq hamurqanku uywa ukyanakunaman hunt'achinankupaq, hinaspa taytankuq ovejanta unuchinankupaq.

¹⁷Ichaqa michiqkuna hamuspanmi sipaskunata chaymanta qatirirqanku. Chaymi Moisesqa sipaskunamanta sayarikuspa michiqkunamanta hark'akurqan, hinaspan ovejakunata unuchirqan.

¹⁸Taytanku Reuelman kutipuqtinkutaq, taytankuqa paykunata tapurqan: — ¿Imanaqtintaq kunanri usqhaylla kutirqamunkichis? nispa.

¹⁹Paykunataq nirqanku: — Egipto runan michiqkunamanta hark'akuwanku, unutapas wisipullawankutaq, hinaspan ovejanchiskunata unuchin, nispa.

²⁰Chaymi ususinkunata nirqan: — ¿Maypitaq chay runari kashan? ¿Imanaqtinmi saqemunkichis? Waqyamuychis, mikhunata qonanchispaq, nispa.

²¹Moisestaq Reuelpapi tiyananpaq uyakurqan, chaymantataq Reuelqa Séfora ususinwan Moisesta casarachipurqan.

²²Paymi huk qhari wawata wachakurqan, Moisestaq Gersonta[2] suticharqan, nirqanmi: Karu llaqtayoqmi kani wak runaq hallp'anpi, nispa.

²³Unaymantataq Egipto suyu reyqa wañukapurqan, chaywanpas Israel runakunaqa sinchita llank'achiqtinkun waqasharqanku, waqyakusharqanku. Hinan sinchi llank'asqankumanta paykunaq waqyakusqankuta Diosqa uyarispa,

²⁴Abrahamwan, Isaacwan, Jacobpiwan rimanakusqanta yuyarirqan.

²⁵Chaymi Diosqa Israel runakunata qhawarispa, paykunamanta llakikurqan.