Read Diospa Simin Qelqa ÉXODO 21 Bible Online

ÉXODO 21 - Diospa Simin Qelqa bible

ÉXODO 21

¹Kay kamachikuykunatan paykunapaq churapunki:

²Hebreo kamachi runata rantinki chayqa, soqta watan llank'apusunki, qanchiskaq watapitaqmi mana qolqellapaq kacharipusqa kanqa.

³Sapallanchus kamachi haykurqan chayqa, sapallanmi lloqsipunqa, warmiyoqchus karqan chayqa, warmintinmi lloqsipunqa.

⁴Patronninchus casarachirqan, warmintaq qhari wawakunatapas paypaq wachakurqan chayqa, warmipas wawakunapas patronninpaqmi kanqa, paytaqmi sapallan lloqsipunqa.

⁵Kamachitaqchus ninqa: Ñoqaqa munakunin patronniyta, warmiyta, wawaykunatapas, kamachilla kakusaq, nispa chayqa,

⁶patronninmi Dios yupaychana wasiman pusaspa, payta punkumanpas otaq punku k'aspimanpas sayaykachispa t'oqonawan ninri ura puntanta t'oqonqa, hinan wiñaypaq kamachin kapunqa.

⁷Pipas ususinta kamachi kananpaq vendenqa chayqa, manan payqa kamachi kasqanmanta qhari kamachikuna hinachu lloqsipunqa.

⁸Patronninchus paywan casarakunanpaq yuyaykushaspa, sipasta mana munasqanrayku mana casarakapunqachu chayqa, taytanmi rantikapunqa, patronnin wikch'upushaspanqa manan wak llaqtayoqmanqa vendeyta atinqachu.

⁹Churinwanchus casarachinqa chayqa, ususinta hinan payta rikunqa.

¹⁰Huk warmiwantaqchus patronqa casarakullanqataq chayqa, manan ñawpaqkaq warmipaqqa pisiyachinqachu mikhunantapas, p'achantapas, paywan puñunantapas.

¹¹Manataqchus chay kinsantinta hunt'anqa chayqa, mana qolqellapaqmi warmiqa kacharisqa kanqa.

¹²Pipas pitapas maqaspa wañuchin chayqa, wañuchiqqa wañuchisqapunin kanqa.

¹³Manataqchus yuyaypi wañuchirqan, aswanpas Dios munarqan makinpi wañunanta chayqa, ñoqañan willasqayki maymanchus pakakamuq ayqenanpaq.

¹⁴Ichaqa pipas runamasin contra hatarispa mana khuyapayaykuspa wañuchin chayqa, altarniyman pakaykukuqtawanpas wikch'unkin wañuchinapaq.

¹⁵Pipas taytantapas mamantapas maqaqqa wañuchisqapunin kanqa.

¹⁶Pipas runata suwakun vendenanpaq otaq kamachin kananpaq chayqa, wañuchisqapunin kanqa.

¹⁷Pipas taytantapas mamantapas ñakaqqa, wañuchisqapunin kanqa.

¹⁸Maqanakushaspa huknin hukkaqta rumiwan takaspapas saqmaspapas k'irinqa, ichaqa manataq wañunqachu, aswanpas puñunallapi kanqa,

¹⁹hinaspa tawnallayoq hawaman lloqsinqa chayqa, k'iriqqa mana huchachasqan kanqa. Chaywanpas k'irisqa kaqmanqa qopunqan mana llank'asqan p'unchaykunamanta, alliyanankamataqmi hampichipunqapas.

²⁰Pichus qhari kamachintapas warmi kamachintapas k'aspiwan p'anaspa wañuchinqa chayqa, muchuchisqapunin kanqa.

²¹Huk iskay p'unchaytachus kawsanqa chayqa, manan muchuchisqachu kanqa, rantisqan kamachi kasqanrayku.

²²Qharikunachus maqanakushaspa wiksayoq warmita k'irinqaku, hinataq payqa malparinqa, manataq huk k'iripiwanchu rikhurinqa chayqa, warmiq qosanpa mañakusqantan k'iriqqa juezkunaq nisqanta hina multata paganqa.

²³Huk k'iripiwantaqchus rikhurinqa chayqa, k'iriqqa muchunqan, kawsaymanta kawsayta,

²⁴ñawimanta ñawita, kirumanta kiruta, makimanta makita, chakimanta chakita,

²⁵ruphasqamanta ruphasqata, k'irimanta k'irita, q'oyumanta q'oyuta.

²⁶Pipas qhari kamachinpa ñawinpipas warmi kamachinpa ñawinpipas saqmaspa churchuyachipunqa chayqa, ñawinmantan kacharipunqa.

²⁷Qhari kamachinpa warmi kamachinpa kiruntapas phawachinqa chayqa, kirumantan kacharipullanqataq.

²⁸Torochus qharitapas warmitapas waqraspa wañuchinqa chayqa, chay toron rumiwan ch'aqesqa wañunqa, manan aychanta mikhunqakuchu, toroyoqqa manataqmi huchachasqachu kanqa.

²⁹Torotaqchus waqrakuqpuniña karqan, toroyoqpas yachashaspataq mana wisq'arqanchu, hinataq pitapas wañuchinqa chayqa, chay toron ch'aqesqa wañunqa, toroyoqpas wañuchisqallataqmi kanqa.

³⁰Toroyoqpa wañunan kashaqtinchus kacharipunapaq pagachinqaku chayqa, pay kikinta kacharipunapaqmi hayk'atachus nisqanta paganqa.

³¹Waynatapas sipastapas waqraqtinqa, kay kamachikuyman hinallataqmi chaninchasqa kanqa.

³²Torochus huk qhari kamachitapas warmi kamachitapas waqranqa chayqa, toroyoqmi kamachiyoqman kinsa chunka qolqeta qopunqa, torotaqmi rumiwan ch'aqesqa wañunqa.

³³Pitaqchus huk p'uytuta kicharparinqa, otaq p'uytuta t'oqonqa, manataq wisq'anqachu hinataq toropas asnopas chayman urmaykunqa chayqa,

³⁴p'uytuyoqmi chay wañusqamanta toroyoqman pagapunqa, wañusqataq p'uytuyoqpaq kapunqa.

³⁵Piqpa toronchus llaqta-masinpa toronta waqraspa wañuchinqa chayqa, kawsashaq torotan vendenqaku hinaspan qolqeta rakinakunqaku, wañusqa toro aychatapas rakinakullanqakutaq.

³⁶Torotaqchus hina waqrakuqpuniña karqan, toroyoqqa manataq wisq'arqanchu chayqa, llaqta-masinmanmi kawsashaq torota qopunqa, wañusqa torotataq hap'ikapunqa.