Read Diospa Simin Qelqa ÉXODO 23 Bible Online

ÉXODO 23 - Diospa Simin Qelqa bible

ÉXODO 23

¹Aman llullakuspa rimarinkichu, amallataq huchallikuqwanpas llulla testigo kanaykipaq rimanakunkichu.

²Aman askha runata qatikunkichu mana allinta ruwanapaq, amallataq quejanakuypi askhawan aysachikunkichu chaninchaymanta t'aqakuspayki,

³amallataq wakchamanpas sayapakunkichu.

⁴Awqaykiq chinkasqa torontapas asnontapas tarinki chayqa, kutichipunkin.

⁵Cheqnikuqniykiq asnontachus cargaq ñit'isqanta rikunki chayqa, yanapaykunkipunin sayariysichinkipunin.

⁶Wakcha runaq quejakuspa uyarichikusqantaqa chaninchankipunin.

⁷Aman yanqa tumpaytaqa kasunkichu, amataqmi wañuchinkichu mana huchayoqtapas chanintapas, chay hinata chaninchayta q'ewiqtaqa huchachasaqpunin.

⁸Aman lluk'iykusqata chaskikunkichu, lluk'iykuyqa runatan qhawaq ñawsaman tukuchin, chaninkunaq rimasqantapas waqllichintaqmi.

⁹Aman wak llaqtayoqtaqa sarunchankichu, qankunaqa yachankichisñan wak suyupi tiyayta, Egipto suyupin wak llaqtayoq runa kamurqankichis.

¹⁰Soqta watan chakraykita tarpunki, rurusqantapas hoqarinki.

¹¹Qanchiskaq watapitaqmi samachinki, chay chakramanta llaqtayki wakcha runakuna mikhunanpaq, puchuqtataq salqa animalkuna mikhunqa. Chay hinallataqmi saqenki uvas chakraykikunatapas olivo sach'aykikunatapas.

¹²Soqta p'unchaymi llank'anki, qanchiskaq p'unchaytaqmi samakunki, toroykipas asnoykipas samananpaq, wasiykipi naceq qhari kamachiykipas wak llaqtayoqpas samakunanpaq.

¹³Tukuy ima qankunaman kamachisqaytan kasukunkichis. Aman wak dioskunaq sutinta hoqarinkichischu, amallataqmi rimarinkichispaschu.

¹⁴Kinsa kutitan watapi fiestata ruwapuwanki.

¹⁵Mana Qonchuyoq T'anta Fiestata ruwanki. Qanta kamachisqayman hinan qanchisnintin p'unchayta mana qonchuyoq t'antata mikhunki Abib killapi churasqa p'unchaykunapi, chay killapin Egipto suyumanta lloqsimpurqanki. Manan pipas mana ima apantinqa qayllaykamuwanqachu.

¹⁶Tarpusqayki ñawpaqkaq rurusqan Cosecha Fiestatapas ruwallankitaqmi. Hinallataq tukuy tarpusqaykita cosechaspayki, Cosecha Tukukuy Fiestatapas ruwanki.

¹⁷Watapi kinsantin fiestapin llapa qhari ñoqa Apu Señor Diosman qayllaykamuwanqa.

¹⁸Aman sacrificapuwasqayki animalpa yawarninta qonchuyoq t'antatawan haywawankichu, amallataqmi wirantapas paqarisninkama waqaychankichu.

¹⁹Chakraykiq allinnin ñawpaq rurusqantan ñoqa Señor Diosniykiq wasiyman apamunki. Aman uña cabrata mamanpa lechenpi t'impuchinkichu.

²⁰Ñoqan angelniyta ñawpaqeykita kachasaq ñanpi waqaychanasuykipaq, qanpaq wakichisqay suyuman pusaykunasuykipaqwan.

²¹Makilla payta uyariy, simintapas kasukuy. Ama mana kasukuqchu kay, payqa manan mana kasusqaykitaqa pampachanqachu, payqa sutiypin kamachikushan.

²²Simintachus maki uyarinki, hinaspa lliw ima nisqaytapas ruwanki chayqa, awqaykikunaq awqanmi kasaq, contrayki kaqkunaq contranmi kasaq.

²³Angelniymi ñawpaqeykita rinqa, hinaspan Amor runakunaq, Het runakunaq, Ferez runakunaq, Canaán runakunaq, Hev runakunaq, Jebus runakunaq suyunkuman pusaykusunki, paykunatan ñoqa chinkachipusaq.

²⁴Aman diosninkuman k'umuykukunkichu, amallataq chaykunata yupaychankipaschu. Aman chay runakuna hina yupaychankichu, aswanpas llapan diosninkutan ch'usaqyachinki, yupaychana saywa ruminkutapas llapallantan p'akirqarinki.

²⁵Ñoqa Diosniyki Señor Diostan yupaychawanki, ñoqan t'antaykitapas unuykitapas saminchasaq, manataqmi ima onqoywanpas hap'ichisqaykichu.

²⁶Manan llaqtaykipi malpariq warmi kanqachu, manallataq mana wachakuqpas. Ñoqan unayta kawsachisqayki.

²⁷Ñoqan ñawpaqeykipi kaq runakunata manchapachisaq, hinallataq mayqen haykusqayki llaqtatapas sinchitapuni llakichisaq, llapa awqaykitapas qayllaykimantan qatirisaq.

²⁸Hev runakunata, Canaán runakunata, Het runakunata q'aqchasaq qayllaykimanta ayqenankupaq.

²⁹Manan huk watallapichu suyumanta paykunata wikch'usaq ama hallp'a purunyananpaq, ama salqa animalkunapas mana allinniykipaq askhayananpaq.

³⁰Pisi-pisimantan qayllaykimanta wikch'usaq askhayanaykikama, hinaspa hallp'aman hunt'aykunaykikama.

³¹Qorpaykikunatan señalasaq Puka Qochamanta Filistea runakunaq suyun lamar-qochakama, ch'inneqmanta Eufrates mayukama. Qanmanmi hap'ichisqayki chay suyupi tiyaqkunata, qantaqmi qayllaykimanta paykunata wikch'unki.

³²Aman paykunawan rimanakunkichu, amallataq diosninkuwanpas.

³³Aman hallp'aykipi tiyanqakuchu, contrayta mana huchallichinasuykipaq, diosninkutachus yupaychanki chayqa, waqllinkipunin, nispa.