Read Diospa Simin Qelqa ÉXODO 27 Bible Online

ÉXODO 27 - Diospa Simin Qelqa bible

ÉXODO 27

¹Ruwallankitaqmi acacia kurkumanta altartapas tawa esquinayoqta, tawa ladoyoqta, sapanka ladon iskay metro iskay chunka phisqayoq centímetro kanqa, sayaynintaq huk metro iskay chunka phisqayoq centímetro kanqa.

²Tawantin esquinapin huk waqratakama ruwanki, tawantinmi altarwan kuskalla kanqa. Altartataq bronce llaphllawan qatanki.

³Tukuy imaymanatapas altarpaqqa broncemantan ruwanki: Uspha mankakunata, palakunata, puruñakunata, trinchekunata, sansa apanakunata,

⁴bronce rejillatapas. Rejillaq tawantin esquinanpaqtaq tawa bronce argollakunata ruwanki.

⁵Hinaspa chay rejillata altar ukhupi chakanki, chay hinapin rejillaqa altar chawpipi chakarayanqa.

⁶Ruwallankitaqmi altarpaqqa acacia kurkumanta wantuna k'aspikunata, chaykunatan bronce llaphllakunawan k'uyunki.

⁷Wantuna k'aspikunaqa argollakunantan suskhunqa, hinan chay wantuna k'aspikunaqa altarpa iskaynin ladonpi kashanqa wantuqtinku.

⁸Altartaqa tablamantan ch'usaq ukhuyoqta ruwanki, kay orqopi qhawachirqayki chay kikillantan ruwanki.

⁹Ruwallankitaqmi karpapaq kanchatapas. Uray lado kanchaqa ñañuy-ñañu lino cortinakunayoqmi kanqa, tawa chunka phisqayoq metroman chutarikuq.

¹⁰Iskay chunka postenkunaqa bronce sayanayoqkaman kanqa, postekunaq ganchonkunapas umankunapas qolqemantan kanqa.

¹¹Hinallataqmi wichay ladoqa tawa chunka phisqayoq metroman chutarikuq cortinakunayoq kanqa, iskay chunka postekunaqa bronce sayanayoqkaman kanqa, postekunaq ganchonkunapas umankunapas qolqemantan kanqa.

¹²Inti haykuy ladoqa iskay chunka kinsayoq metro cortinakunayoqmi kanqa, kanchaq anchonman chutasqa, chunka postekuna sayanantinkama.

¹³Inti lloqsimuy ladopipas, kanchaq anchonpiqa, iskay chunka kinsayoq metro cortinakunan kallanqataq.

¹⁴Punkuq huknin ladopiqa qanchis metro cortinakunan kanqa, kinsa postekuna sayanantinkama.

¹⁵Hukkaqnin ladopipas qanchis metro cortinakunan kallanqataq, kinsa postekuna sayanantinkama.

¹⁶Kancha punkupitaq isqon metro cortina kanqa, ñañuy-ñañu linomanta, llawlli-puka, sani-puka, rawraq-puka q'aytumantawan munay pallayniyoq awasqa. Tawa postekunan sayanantinkama kanqa.

¹⁷Kancha muyuriq llapa posteqa qolqewan chumpisqan kanqa, ganchonkuna qolqemanta, sayanankunataq broncemanta.

¹⁸Kanchaq wask'anqa tawa chunka phisqayoq metron kanqa, huknin lado ancho iskay chunka kinsayoq metro, hukkaqnin ladopas iskay chunka kinsayoq metrollataq, sayaynintaq iskay metro iskay chunka phisqayoq centímetro. Cortinakunaqa ñañuy-ñañu linomantan kanqa, sayanankunataq broncemanta.

¹⁹Karpapi yupaychanapaq tukuy imaymanapas broncemantakaman kanqa, hinallataq llapa takarpupas, kancha chutanapaq takarpukunapas.

²⁰Israel runakunata kamachiy olivo ch'irwasqa ch'uya aceiteta k'anchaqpaq apamunasuykikupaq, lámpara k'anchashanallanpaqpuni.

²¹Chay lamparan huñunakuy karpapi kashanqa, kamachikuy simiyoq arcaq ñawpaqen cortinaq huk ladonpi, chaytan Aaronwan churinkunawan ñoqa Señor Diospa ñawpaqeypi tutantin qhawanqaku. Chayqa Israel runakunapaq mirayninkunapaqwan wiñaypaq kamachikuy simin.