Read Diospa Simin Qelqa ÉXODO 29 Bible Online

ÉXODO 29 - Diospa Simin Qelqa bible

ÉXODO 29

¹Sacerdotey kanankupaq paykunata t'aqanapaqqa kay hinatan ruwanki: Mana imanasqalla torillota iskay anejotawan hap'iy.

²Trigo ñut'u hak'umantan ruwanki mana qonchuyoq t'antata, aceitewan q'apisqa mana qonchuyoq tortillata, hinallataq aceitewan ch'aqchuykusqa mana qonchuyoq llaphllallaña t'antatapas,

³chaykunatan huk canastaman churanki. Canastaman churaykusqatataq torillotawan iskay anejotawan kuskata haywanki.

⁴Hinaspa Aarontawan churinkunatawan Dioswan Tupana Karpa punkuman pusaspayki unuwan bañanki.

⁵Hinamantataq p'achakunata hoqarispayki Aaronman churaykunki sotanata, unku capata, unkuta, qhasqo-ch'uspatawan, unku chumpitapas wataykunkin.

⁶Umanmanmi uma k'uyunatapas churaykunki, uma k'uyunamantaq qorimanta ch'uya llaphllata churanki.

⁷Hinaspataq hawina aceiteta hoqarispayki umanman hich'aykuspa payta hawiykunki.

⁸Churinkunapas asuykamullasunkitaq, hinan paykunamanpas sotanata churaykunki,

⁹chumpiykachinki, churaykullankitaqmi uma chukutapas. Ahinatan Aarontapas churinkunatapas sacerdotey kanankupaq churanki. Paypa ayllunqa kamachikuyman hinan sacerdotellapuni kanqaku.

¹⁰Chaymantataq Dioswan Tupana Karpaq ñawpaqenman torillota apanki, Aaronwan churinkunawantaq makinkuta torilloq uman pataman churaykunqaku.

¹¹Ñoqa Señor Diospa ñawpaqeypin chay torillota karpa punkupi nak'anki.

¹²Hinaspataq yawarta hoqarispayki dedoykiwan altar waqrakunata llusiykunki, chay puchuq yawartataq llapallanta altar chakiman hich'aykunki.

¹³Hoqarillankitaqmi wiksa llika wiratapas sullk'a k'ipchantapas, iskaynin ruruntapas chaykuna qayllapi kaq wirantinta, hinaspan chaykunata altarpi ruphachinki.

¹⁴Torillo aychatan ichaqa qarantinta phusnuntinta karpa-karpa hawapi kanaykunki, chayqa hucha pampachaypaq haywasqan.

¹⁵Hap'illankitaqmi huknin anejotapas, Aaronwan churinkunawantaq chaypa uman pataman makinkuta churaykunqaku.

¹⁶Chaymantataq chay anejota nak'anki, yawarnintataq altarman altar muyuriqmanwan hich'aykunki.

¹⁷Hinaspataq chay anejota kuchurqarinki, ch'unchulninkunatapas chakinkunatapas maqchinki, chaymantataq chaykunata kuchurqarisqakunatawan umantawan kuskata churanki.

¹⁸Hinaspan anejota llapanta altar patapi kananki, chayqa ruphachina sacrificion, ñoqa Señor Diospaq mikhuna ofrendan, sumaq q'apaynintaq sonqoyman chayamun.

¹⁹Hinan hukkaq anejota hap'inki, Aaronwan churinkunawantaq chaypa uman pataman makinkuta churaykunqaku.

²⁰Chaymantataq chay anejota nak'anki, yawarninta hoqarispaykitaq Aaronpa paña ninrin ura puntata llusiykunki, hinallataq churinkunaq paña ninrin ura puntatapas, kaqllataq paña makinkuq paña chakinkuq mama dedontapas, puchuq yawartataq altarman altar muyuriqmanwan hich'aykunki.

²¹Altarpi kaq yawarmanta, hawina aceitemantawan hoqarispataq ch'aqchuykunki Aaronta, p'achantawan churinkunatawan, paykunaq p'achantawan. Chay hina ch'uyachasqan payqa kanqa, p'achanpas, churinkunapas, churinkunaq p'achanpas paywan kuska.

²²Chaymantataq hap'inki sacerdote kanankupaq churana anejoq wiranta, chupanta, wiksa llika wiranta, sullk'a k'ipchanta, iskaynin rurunta, chaykuna qayllapi kaq wirata, paña chakantawan.

²³Canastapi ñoqaman haywasqa mana qonchuyoq t'antakunamantapas hoqarillankitaq huk t'antata, aceitewan q'apisqa tortillata, llaphllallaña t'antatawan.

²⁴Hinaspan chay llapallanta Aaronman churinkunamanwan qonki, paykunataq maywinqaku, chay ofrendatataq ñoqa Señor Diosman haywawanki.

²⁵Hinamantataq chayta makinkumanta chaskispa ruphachina sacrificio patapi ruphachinki, sonqoyman chayaq sumaq q'apay kananpaq. Chayqa ñoqapaq mikhuna ofrendan.

²⁶Hoqarillankitaqmi Aarón sacerdote churana anejoq pechontapas, hinaspa chayta maywinki ñoqa Señor Diospa ñawpaqeypi, chaytaqmi qanpaq kanqa.

²⁷Sumaq sonqo allinnin ofrenda t'aqasqa anejoq pechonpas chakanpas Aaronpaq churinkunapaqwanmi kanqa.

²⁸Chay hinaqa, Israel runakuna sumaq kawsay sacrificiota haywaqtinkuqa, pechonwan chakanwanqa Aaronpaq churinkunapaqwanmi kanqa, ñoqan chayta kamachikuni chay hinallapuni kananpaq, chay hinatan haywawanqaku.

²⁹Aaronpa wañukapusqan qhepataqa churinkunan ch'uya p'achankunata chaskinqaku, chaykunawanmi p'achaykukunqaku hawisqapas churasqapas kanankupaq.

³⁰Aaronpa rantinpi sacerdote kapuq churinqa qanchisnintin p'unchaymi chaykunawan p'achakunqa, Dioswan Tupana Karpaman haykuspa Ch'uya Cheqaspi servinanpaq.

³¹Sacerdote churanapaq anejo aychatan chaypaq t'aqasqa ch'uya cheqaspi t'impuchinki.

³²Aaronwan churinkunawantaq Dioswan Tupana Karpa punkupi anejo aychata canastapi kaq t'antatawan mikhunqaku.

³³Sacerdote churasqa kashaqtinku ch'uyanchasqa kashaqtinku huchanku pampachanapaq sacrificio haywasqa karqan, chaykunatan mikhunqaku, wak runan ichaqa mana chaykunata mikhunqachu, ch'uya kasqanrayku.

³⁴Sacerdote churanapaq aychamantachus, t'antamantachus paqarisninkama imallapas puchunqa chayqa, ninawanmi puchuqtaqa ruphachipunki, manataqmi pipas chaytaqa mikhunqachu, chayqa ch'uya kasqanrayku.

³⁵Tukuy imaymanata qanman kamachisqayta hinan Aaronpaqwan churinkunapaqwan qanchisnintin p'unchay ruwanki sacerdote kanankupaq.

³⁶Sapa p'unchaymi huk torillota haywanki huchata pampachanapaq, altartan ch'uyanchanki huchata pampachanapaq ofrendata chay patapi haywaspayki, hinaspa aceiteta patanman hich'aykunki ch'uyanchanapaq.

³⁷Qanchisnintin p'unchaymi altar ch'uyanchanapaq ofrendata haywanki. Chhaynatan chayta Diospaq ch'uyanchanki, chaymi ch'uyallaña altar kanqa, imallapas altarta tupaykuqqa Diospaq t'aqasqan kapunqa.

³⁸Sapa p'unchaymi mana saqespa watayoq iskay borregota altarpi haywanki.

³⁹Huknin borregotan tutamanta haywanki, hukkaq borregotataq rasphiyaykuyta haywanki.

⁴⁰Ñawpaqkaq borregota haywaspaykiqa iskay kilo ñut'u hak'uwan huk litro ch'irwasqa olivo aceitewan chapusqata haywanki, hinallataq huk litro vinotapas hich'aykunki.

⁴¹Hukkaq borregotataq rasphiyaykuyta haywanki, tutamanta hak'u ofrendatawan vino hich'aykusqatawan haywasqankuta hina, chayqa ñoqa Señor Diospaq mikhuna ofrendan, sumaq q'apaynintaq sonqoyman chayan.

⁴²Chay hina ruphachina ofrendakunatan mirayniykichiskunaqa ñawpaqeypi Karpa punkupi haywallawanqakupuni, chaypin qanwan tupasaq rimaykunaypaq.

⁴³Chaypin Israel runakunawan tupasaq, chay cheqastataqmi lliphlli-kayniy ch'uyanchapunqa.

⁴⁴Ch'uyanchasaqmi Karpatapas altartapas, ch'uyanchallasaqtaqmi Aarontapas churinkunatapas sacerdotey kanankupaq.

⁴⁵Israel runakunawanmi tiyasaq, Diosninkutaq kasaq.

⁴⁶Ahinapin paykunaqa ñoqa Diosninku Señor Dios kasqayta yachanqaku, paykuna ukhupi tiyanaypaqmi Egipto suyumanta horqomurqani. Ñoqan Señor Diosninku kani.