Read Diospa Simin Qelqa ÉXODO 32 Bible Online

ÉXODO 32 - Diospa Simin Qelqa bible

ÉXODO 32

¹Moisesmi orqomanta mana usqhaytachu uraykamurqan, chaymi runakunaqa Aaronman muyuykuspa nirqanku: — Sayariy, pusawaqniyku dioskunata ruwapuwayku, manan yachaykuchu Egipto suyumanta pusamuwaqniyku Moisesta imachus sucedesqanta, nispa.

²Hinan Aaronqa paykunata nirqan: — Warmiykichispa, churiykichispa, ususiykichispa ninrinpi kaq qori aretekunata horqoychis, hinaspa apamuwaychis, nispa.

³Chaymi ninrinkupi kaq qori aretekunata llapallanku horqokurqanku, hinaspan Aaronman apamurqanku.

⁴Paytaq chaskirqan, hinaspan qorita unuyachispa moldeman hich'aykurqan, chaymantan qori torillota horqospa thuparqan. Hinaqtinmi nirqanku: — ¡Israel, kaymi diosniykiqa, Egipto suyumanta pusamuqniyki! nispa.

⁵Chayta rikuspataq Aaronqa torilloq ñawpaqenpi altarta perqarqan, hinaspan qaparirqan: — ¡Paqarinmi Señor Diospaq fiestata ruwasunchis! nispa.

⁶Paqarisnintaq tutallamanta sayarispa ruphachina sacrificiokunatapas, sumaq kawsay sacrificiokunatapas haywarqanku, hinaspan llaqtaqa mikhuq ukyaq tiyaykurqan, chaymantataq runakunaqa aychanku kusichiypi rawrarirqanku.

⁷Chaymi Señor Diosqa Moisesta nirqan: — Uraykuy, Egipto suyumanta pusamusqayki llaqtaykin waqllipun.

⁸Usqhayllan t'aqakunku kamachisqay purinanku ñanmanta, unuyachisqa qori torillotan ruwakunku, hinaspan yupaychanku, sacrificiokunatapas haywanku, ninkutaq: — ¡Israel, kaymi diosniykiqa, Egipto suyumanta horqomuqniyki! nispanku.

⁹Yacharqaniñan kay llaqtaqa rumi sonqopuni kasqanta.

¹⁰¡Kunanqa ama hark'awaychu, paykunapaqmi anchatapuni phiñakushani, wañurqarichisaqmi! Qanmantan ichaqa huk hatun suyuta paqarichisaq, nispa.

¹¹Hinaqtinmi Moisesqa Señor Diosninmanta tukuy sonqo mañakurqan: — Señornilláy, ¿imanaqtintaq llaqtaykipaq anchatapuni phiñakunki, Egipto suyumanta hatun atiyniykiwan kallpaykiwan pusamusqaykipaq?

¹²Egipto runakunachá ninkuman: Mana allinninkunapaqmi pusasqa, orqo-orqopi wañuchinanpaq, hallp'a pachamanta paykunata chinkachinanpaq, nispa. Amaña k'arakta phiñakuychu, amaña: Llaqtayta muchuchisaq, niyñachu.

¹³Yuyarikuy kamachiyki Abrahamta, Isaacta, Israeltawan. Paykunamanmi sutiykipi juraspayki nirqanki: Ñoqan mirayniykichista hanaq pacha ch'askakunata hina askhayachisaq, mirayniykichismantaq kay llapan qankunaman prometesqay hallp'ata qosaq, hinan chayqa wiñaypaq herencianku kanqa, nispa.

¹⁴Chaymi Señor Diosqa llaqtanta mana allin ruwananpaq yuyaykusqanta manaña hunt'apurqanchu.

¹⁵Moisestaq kutimuspa orqomanta uraykamurqan kamachikuy simiyoq iskay p'alta rumita aparikamuspa, chaykunan iskaynin uyanpi qelqasqa kasharqan.

¹⁶Kikin Diosmi chay p'alta rumikunata ruwasqa, Diosllataqmi chaykunapi qelqasqatapas qelqasqa.

¹⁷Josuetaq runakunaq qaparisqanta uyarispa Moisesta nirqan: — Maqanakuy qapariymi karpa-karpapi uyarikushan, nispa.

¹⁸Moisestaq kutichirqan: — Manan atipaqkunaq kusikusqanchu, manallataqmi atipasqakunaq waqasqanpaschu, takishasqankutan ñoqaqa uyarishani, nispa.

¹⁹Moisesqa karpa-karpaman qayllaykuspa hinan torillota tusuqkunatawan rikuspa k'araktapuni phiñakurqan, hinan chay p'alta rumikunata ch'aqerqan, chaymi orqo k'uchupi p'akikurqan.

²⁰Hinaspataq torillota hap'ispa ninaman wikch'uykurqan, chaymantataq ñut'uy-ñut'uta kutarqan, hinaspan unuman hach'iykurqan, chaytataq Israel runakunaman ukyachirqan.

²¹Hinaspanmi Moisesqa Aaronta nirqan: — ¿Imanarqasunkin kay llaqta, ancha hatuntapuni huchallichinaykipaq? nispa.

²²Aarontaq kutichirqan: — Wiraqocháy, ama phiñakuychu, qanqa yachankipunin kay llaqtaqa mana allinkaqman k'askakuq kasqanta.

²³Paykunan niwarqanku: Pusawaqniyku dioskunata ruwapuwayku, manan yachaykuchu Egipto suyumanta pusamuwaqniyku Moisesta imachus sucedesqanta, nispa.

²⁴Ñoqataq paykunaman kutichirqani: Pipas qoriyoqqa, horqokuchun, nispa. Hinan qowarqanku, chaytataq ninaman, wikch'uykurqani, kay torillotaq lloqsimurqan, nispa.

²⁵Moisestaq rikurqan llaqtaq waqllipusqanta, Aaronpas hinallata qhawasqanta, repararqantaq awqankuq asipayananpaq kasqankutapas.

²⁶Chaymi karpa-karpaman haykunapi sayaykuspa waqyakurqan: — ¿Pikunataq Señor Dioswan kashan? ¡Ñoqawan huñukuchun! nispa. Hinan Leví ayllu runakuna llapallanku payman huñuykukurqanku.

²⁷Hinaqtinmi Moisesqa paykunata nirqan, Israelpa Diosnin Señormi nin: Sapankaykichis espadaykichista teqniykichisman churaykukuychis, hinaspa karpa-karpata huk haykunamanta huk haykunakama hinantinta puriychis, sapankaykichistaq wawqeykichista, amigoykichista, llaqta-masiykichista wañuchiychis, nispa.

²⁸Leví ayllu runakunataq Moisespa kamachisqanta hunt'arqanku, hinan chay p'unchay kinsa waranqa hina runakuna wañurqan.

²⁹Hinaqtinmi Moisesqa nirqan: — Kay p'unchaymi qankunaqa Señor Diosta servinaykichispaq t'aqasqa kapunkichis, sapankaykichismi churiykichista wawqeykichista wañuchirqankichis, chaymi kay p'unchay Señor Diosqa saminchasunkichis, nispa.

³⁰Paqarisnintaq Moisesqa llaqtata nirqan: — Anchatapunin qankunaqa huchallikurqankichis, kunanmi Señor Diospa kasqanman wichasaq, ichapas kay huchaykichista pampachachiykichisman, nispa.

³¹Hinaspanmi Moisesqa Señor Diospa kasqanman kutispa, nirqan: — Arí, kay llaqtaqa anchatapunin huchallikun, qorimanta diosta ruwakuspanku.

³²Chaypas, kunan rogakuykin huchankuta pampachaykunaykipaq… mana chayqa, ¡qelqasqayki qelqaykimanta sutiyta horqopuway! nispa.

³³Señor Diostaq Moisesta nirqan: — Pichus contraypi huchallikunqa, chayllatan ñoqaqa qelqaymanta horqopusaq.

³⁴Kunanqa riy, hinaspa maymanchus pusanaykipaq kamachirqayki chayman kay llaqtata pusay, angelniymi pusasunki. Muchuchinay p'unchaypin ichaqa paykunata huchankumanta ñoqa muchuchisaq, nispa.

³⁵Hinaspan Señor Diosqa llaqtata muchuchirqan Aaronpa ruwasqan torillo hawa.