Read Diospa Simin Qelqa ÉXODO 33 Bible Online

ÉXODO 33 - Diospa Simin Qelqa bible

ÉXODO 33

¹Chaymantataq Señor Diosqa Moisesta nirqan: — Kaymanta ripuychis, qanpas Egipto suyumanta pusamusqayki llaqtapas. Abrahamman, Isaacman, Jacobmanwan: Mirayniykimanmi chayta qosaq, nispa jurasqay suyuman.

²Ñoqataq pusanasuykipaq angelta kachamusaq, hinaspan suyunkumanta wikch'usaq Canaán runakunata, Amor runakunata, Het runakunata, Ferez runakunata, Hev runakunata, Jebus runakunatawan.

³Riy, lecheq miel misk'iq askha kasqan hallp'aman. Manan ñoqaqa riysisqaykichischu, paqtan ñanpi wañurqarichiykichisman k'ullu kasqaykichisrayku, nispa.

⁴Llaqtataq chay k'arak simita uyarispa mayta llakikurqan, manataq pipas alhajakunawan sumaqchakurqanchu.

⁵Señor Diosmi Moisesta nirqan: — Israel runakunata nimuy: Qankunaqa k'ullu runakunan kankichis, asllatapas riysiykichisman chayqa, wañurqarichiykichismanmi. Kunanpacha alhajakunata horqokuychis, hinan qankunata ima ruwaytapas yuyaykusaq, nispa.

⁶Hinaqtinmi Israel runakunaqa alhajakunata Horeb orqopi horqokapurqanku, manañataq churakapurqankuchu.

⁷Sapa kuti Israel runakuna astakuspa karpakuqtinkun, Moisesqa karpata hoqarispa karpa-karpamanta chhikan karuniqpi sayarichiq, chaytan suticharqan “Dioswan Tupana Karpa” nispa. Pipas Diosta tapukuyta munaspaqa, karpa-karpa hawapi kashaq Dioswan Tupana Karpamanmi riq.

⁸Karpata Moisés riqtinmi llaqtallantin sayariqku, sapankankun karpanku punkupi sayaqku Moisesta qhawaspa Karpaman haykunankama.

⁹Karpaman Moisés haykuqtintaq, sayashaq phuyu uraykamuq hinaspa Karpa punkupi sayaykuq, Señor Diostaq Moiseswan rimaq.

¹⁰Sayashaq phuyu Karpa punkupi kashaqta llaqtallantin rikuspataq, sapanka karpanku punkupi pampakama k'umuykukuqku.

¹¹Señor Diosmi Moiseswan uya pura rimaq, imaynan pipas runamasinwan riman hinata. Chaymantataq payqa karpa-karpaman kutipuq. Nunpa churin Josué wayna kamachintaq ichaqa Dioswan Tupana Karpallapipuni kashaq.

¹²Moisesmi Señor Diosta nirqan: — Qanmi niwarqanki: Kay llaqtata pusay, nispa, manataqmi qanqa willawankichu pitawanchus kachawanaykita. Chaypas, qanmi niwarqanki: Ñoqaqa reqsiykipunin sumaqtan qhawarirqaykipas, nispayki.

¹³Kunanqa, sumaqtataq qhawariwankipas chayqa, rogakuykin yuyaykusqaykikunata yachachiwanaykipaq, qanta reqsinaypaq sumaqllatapuni qhawariwanaykipaqwan. Kay runakunaqa llaqtaykipunin, nispa.

¹⁴Señor Diostaq nirqan: — Ñoqaqa puriysisqaykipunin, hinaspan samachisqayki, nispa.

¹⁵Moisestaq kutichirqan: — Manataq puriysiwankichu chayqa, ama kaymanta pusawaykuchu.

¹⁶Manataq puriysiwankikuchu chayqa, manan pipas yachanqachu ñoqatapas llaqtaykitapas sumaqta rikuwasqaykikuta. Ñoqaykuwan purisqallaykiwanmi kay pachapi kashaq llapa wak llaqtakunamanta t'aqasqa kasqaykuqa yachakunqa, nispa.

¹⁷Hinan Señor Diosqa Moisesta nirqan: — Kay niwasqaykitapas ruwallasaqtaqmi sumaqta qanta rikusqayrayku, ñoqaqa reqsiykipunin, nispa.

¹⁸Chaymi Moisesqa nirqan: — Rogakuykin lliphlli-kayniykita rikuchiwanaykipaq, nispa.

¹⁹Señor Diostaq kutichirqan: — Ñoqan tukuy allin-kayniyta rikuchisqayki, hinaspan ñawpaqeykipi: Sutiyqa “Señor Diosmi”, nispa rimarisaq. Pitachus: “Sumaqta qhawarisaq”, nisqaytan sumaqta qhawarisaq. Pitachus: “Khuyapayasaq”, nisqaytan khuyapayasaq.

²⁰Ichaqa manan uyayta rikuyta atiwaqchu, manan pi runapas rikuwaspaqa kawsanmanchu.

²¹Qhawariy, kayqa qayllaypin huk cheqas kashan, kay qaqa patapin qanqa sayaykunki,

²²lliphlli-kayniy pasashaqtintaq ñoqaqa huk qaqa k'aktuman sayaykachisqayki, hinaspan makiywan pakaykusqayki pasanaykama.

²³Chay qhepatataq makiyta hoqaripusaq, hinan wasayta rikunki, ichaqa manan uyaytaqa rikunkichu, nispa.