Read Diospa Simin Qelqa ÉXODO 34 Bible Online

ÉXODO 34 - Diospa Simin Qelqa bible

ÉXODO 34

¹Señor Diosmi Moisesta nirqan: — Ñawpaq kuti hina iskay p'alta rumita thupay, chaykunapin qelqasaq p'akisqayki ñawpaq p'alta rumikunapi kasharqan chay simikunata.

²Tutallamanta wakichikuspan Sinaí orqoman wichamunki, chay orqo patapitaq qayllaykamuwanki.

³Aman pi runapas qanwan wichamunqachu, aman pipas orqontinpi rikhurillanqapaschu. Aman ovejapas wakapas orqo chimpapi mikhunqachu, nispa.

⁴Hinan Moisesqa iskay p'alta rumita thuparqan ñawpaq p'alta rumikunata hina. Hinaspan tutallamanta sayarispa, iskaynin p'alta rumita aparikuspa Sinaí orqota wicharqan, Señor Diospa kamachisqanman hina.

⁵Señor Diostaq phuyupi uraykamurqan, hinaspa chaypi Moiseswan kasharqan, paytaq: Sutiyqa “Señor Diosmi”, nispa rimarirqan.

⁶Moisespa ñawpaqenta pasashaspataq kunkayoqta nirqan: — ¡Señor Diosmi kani! ¡Señor Diosmi kani! ¡Khuyapayakuq sumaq sonqo Diosmi kani! Manan usqhaylla phiñakuqchu kani, tukuy tiempo munakuqmi cheqaqtaqmi kani.

⁷Waranqa miraykaman tukuy tiempo munakushallanipuni, huchallikusqatapas, mana kasukusqatapas, huchatapas pampachanin, huchallikuqtaqa manapunin hinallatachu qhawani, aswanpas tayta-mamakunaq huchallikusqanmantaqa muchuchinipunin wawankunata, nietonkunata, nietonpa wawankunakamaraq, nispa.

⁸Hinaqtinmi Moisesqa usqhaylla pampakama k'umuykukuspa Señor Diosta yupaycharqan.

⁹Nirqantaq: — Señor Diosnilláy, sumaqtapunichus qhawariwanki chayqa, puriysiwayku, kay llaqtaña k'ulluchakushan chaypas, huchallikusqaykuta, huchaykuta ima pampachaykuwayku, hinaspa qanpaq hap'ikapuwayku, nispa.

¹⁰Señor Diostaq nirqan: — Ñoqan qankunawan rimanakuni. Musphanakunatan qhawashasqaykichis ruwasaq, manan chay hinakunaqa kay pachantinpipas ruwasqachu karqan, mayqen suyupipas. Ñoqa Señor Diosmi qankunapaq musphanakunata ruwasaq, hinan maypichus tiyasqaykichis llaqta runakuna may musphana kasqanta rikunqaku.

¹¹Kunan qanman kamachisqayta hunt'ay. Ñoqaqa suyuman haykusqaykiman hinan wikch'usaq Amor runakunata, Canaán runakunata, Het runakunata, Ferez runakunata, Hev runakunata, Jebus runakunatawan.

¹²Aman maymanchus haykunki chay suyupi tiyaqkunawan imatapas rimanakunkichu, ama qankunapaq toqlla kanankupaq.

¹³Altarninkutan thuninkichis, yupaychana saywa ruminkutan p'akinkichis, Asera diosankutan thuninkichis.

¹⁴Aman mayqen diosmanpas k'umuykukunkichischu, Ñoqaqa Señor Diosmi kani, sutiypas “Sienteq” nisqan, Sienteq Diosmi kani.

¹⁵Aman imatapas chay suyupi tiyaqkunawan rimanakunkichischu. Paykunawanchus rimanakunkichis chayqa, diosninkuta yupaychaspanku qhelli huchata ruwaspa, diosninkumanpas sacrificiokunata haywaspa waqyasunkiku, hinan sacrificasqankuta mikhunkichis.

¹⁶Paqtataq ususinkuwan churiykichista casarachiwaqchis, ususinkuqa diosninkuta yupaychaspankun qhelli huchata ruwaspa, churiykichista chay qhelli huchallapitaq purichinkuman.

¹⁷Aman unuyachispa hich'asqa dioskunataqa ruwakunkichischu.

¹⁸Mana Qonchuyoq T'anta Fiestata ruwapuwanki. Qanta kamachisqayman hinan qanchisnintin p'unchayta mana qonchuyoq t'antata Abib killallapi mikhunki, chay killapin Egipto suyumanta lloqsimpurqanki.

¹⁹Llapa phiwi qhari naceqqa ñoqaqmi, hinallataq llapa ñawpaq wachay orqo uña wakapas, ovejapas.

²⁰Asnoq ñawpaq wachasqantan ichaqa huk borregowan cambiapunki, manataq cambiankichu chayqa, kunkantan q'ewipunki. Llapa phiwi churiykiq rantinpitaq ofrendata haywawanki. Manataqmi pipas mana ofrenda apantinqa qayllaykamuwanqachu.

²¹Soqtantin p'unchaymi llank'anki, qanchiskaq p'unchaypitaqmi samakunki. Yapuyña, cosechayña kaqtinpas qanchiskaq p'unchaypiqa samakunkin.

²²Ñawpaqkaq trigo rurusqata haywaspa Semanakuna nisqa Fiestatapas ruwallankitaqmi, hinallataq Cosecha Tukukuy Fiestatapas.

²³Chay hinapin watapi kinsa kutita llapa qhari qayllaykamuwanqa Israelpa Diosnin ñoqa Apu Señor Diospa ñawpaqeyman.

²⁴Ñoqan suyukunata qayllaykimanta wikch'usaq, hinaspa hallp'aykita hatunyachisaq. Manataqmi pipas hallp'aykiman suchuykamunqachu, ñoqa Señor Diosniykiq ñawpaqeyman kinsa kutita watapi qayllaykamuwanaykipaq hamuqtiyki.

²⁵Aman qonchuyoq t'antata sacrificio yawartawanqa haywawankichu. Aman Pascua Fiesta sacrificasqamantaqa imapas paqarisninkamaqa saqekunqachu.

²⁶Chakraykiq allinnin ñawpaq rurusqantan ñoqa Señor Diosniykiq wasiyman apamuwanki. Aman cabrachata mamanpa lechenpi t'impuchinkichu, nispa.

²⁷Señor Diosmi Moisesta nirqan: — Kay simikunata qelqay, kay simikunaman hinan qanwanpas Israelwanpas rimanakuni, nispa.

²⁸Moisestaq Señor Dioswan chaypi qhepakurqan tawa chunka p'unchayta tawa chunka tutatawan, manan mikhunatapas mikhurqanchu, manan unutapas ukyarqanchu. Chay p'alta rumikunapin qelqarqan rimanakuy simikunata, chunka kamachikuy simita.

²⁹Chaymantataq Moisesqa Sinaí orqomanta uraykamurqan kamachikuy simiyoq iskaynin p'alta rumikuna apantin. Orqomanta uraykamushaspanmi Moisesqa mana reparakurqanchu Dioswan rimasqan qhepata uyan k'anchashasqanta.

³⁰Aaronwan Israel llapa runakunawan Moisesta qhawarispankutaq uyan k'anchashasqanta rikurqanku, hinan manchakuspa mana payman asuykurqankuchu.

³¹Moisestaq ichaqa paykunata waqyarqan. Aaronwan llaqtapi llapan umalli runakunawan payman asuykuqtinkutaq, Moisesqa paykunata rimapayarqan.

³²Chaymantataq Israel llapa runakuna asuykurqanku, paykunatan Moisesqa kamachirqan tukuy imaymanata Sinaí orqopi Señor Diospa payman kamachimusqanta.

³³Paykunaman rimaykusqan qhepatataq Moisesqa uyanta huk qatawan qataykukurqan.

³⁴Señor Dioswan rimananpaq Dioswan Tupana Karpaman haykuspataq Moisesqa qatanta horqokuq Karpamanta lloqsinankama. Lloqsimuspataq Israel runakunaman willaq Señor Diospa kamachimusqanta.

³⁵Israel runakunaqa Moisespa uyanta qhawarispan, k'anchashaq uyayoqta rikuqku, chaymi Moisesqa uyanta qatawan qataykukuq, huktawan Señor Dioswan rimaq haykunankama.