Read Diospa Simin Qelqa ÉXODO 35 Bible Online

ÉXODO 35 - Diospa Simin Qelqa bible

ÉXODO 35

¹Moisesmi Israel llapan runakunata huñuykuspa nirqan: — Kaykunatan hunt'anaykichispaq Señor Diosqa kamachimuwarqan:

²Soqtantin p'unchaymi llank'ankichis, qanchiskaq p'unchaytaqmi samankichis ñoqa Señor Diospaq t'aqasqa hatun samana p'unchay kasqanrayku. Pipas chay p'unchaypi llank'aqqa wañuchisqapunin kanqa.

³May tiyasqaykichispipas aman samana p'unchaypiqa ninatapas hap'ichinkichischu, nispa.

⁴Moisesmi Israel llapan runakunata nirqan: — Señor Diosmi kamachikun:

⁵Ñoqapaq ofrendata apamuychis. Llapa qoykukuq sonqoyoq runa, ñoqa Señor Diosman ofrendata apamuchun: Qoritapas, qolqetapas, broncetapas,

⁶llawlli-puka millmatapas, sani-puka millmatapas, rawraq-puka millmatapas, yuraq rit'i linotapas, cabra suphutapas,

⁷puka teñisqa anejo qarakunatapas, llamp'uy-llamp'u qarakunatapas, acacia kurkutapas,

⁸lamparakunapaq olivo aceitetapas, hawina aceitepaq q'apaq inciensopaqwan q'apaqkunatapas,

⁹hinallataq yanayoq yuraq umiña rumikunatapas, umiña rumikunatapas uma sacerdoteq unkunman qhasqo-ch'uspanmanwan k'askachinapaq, nispa.

¹⁰Moisesmi nirqan: — Tukuy allin yachaq artesanoykichiskuna hamuchun, hinaspa Señor Diospa kamachikusqanta tukuy imaymanata ruwachun:

¹¹Señor Diospa tiyananta karpantinta, karpaq qatanta, ganchonkunata, marconkunata, suskhuq k'aspinkunata, postenkunata, sayanankunatawan,

¹²arcata, suskhuq k'aspinkunatawan, kirpanata, Ch'uyay-ch'uya Cheqasta t'aqaq cortinata,

¹³mesata, suskhuq k'aspinkunatawan, llapa imaymanantawan, Diospa ñawpaqenpi churana t'antatawan,

¹⁴k'anchaqpaq candelerota kaqninkunatawan, lamparachakunata aceitetawan.

¹⁵Incienso ruphachina altarta, suskhuq k'aspinkunatawan. Hawina aceiteta, q'apaq inciensota, karpa punku cortinata,

¹⁶ruphachina sacrificiopaq altarta, bronce rejillantawan, suskhuq k'aspinkunatawan, llapa imaymanantawan, tiyanayoq puruñatapas.

¹⁷Kanchapaq cortinakunata, postekunata, sayanankunatawan, kancha punku cortinata,

¹⁸karpapaq takarpukunata, kanchapaq takarpukunata, waskhankunatawan,

¹⁹karpapi servinapaq p'achata, sacerdote Aaronpaq ch'uya p'achata, churinkunapaq sacerdote p'achakunatawan, nispa.

²⁰Hinaqtinmi llapa Israel runakunaqa Moisespa qayllanmanta ripurqanku.

²¹Hinan llapan pichus sonqon kuyurichisqakuna, hinallataq pikunachus tukuy sonqoyoqkuna Señor Diospaq ofrendantin hamurqanku Dioswan Tupana Karpata ruwanapaq, lliw imaymana ruwanapaq, ch'uya p'achapaqwan.

²²Qharikunapas warmikunapas tukuy sonqonkuwanpunin apamurqanku tukuy imaymana rikch'aq qori alhajakunata: T'ipanakunata, aretekunata, anillokunata, walqanakunata. Llapallankun qorinkuta Señor Diospaq ofrendata t'aqamurqanku.

²³Llapa llawlli-puka millmayoqkunan, sani-puka millmayoqkunan, rawraq-puka millmayoqkunan, ñañuy-ñañu linoyoqkunan, cabra suphuyoqkunan, puka teñisqa anejo qarayoqkunan, llamp'uy-llamp'u qarayoqkunapas chaykunata apamurqanku.

²⁴Pipas qolqe ofrendata otaq bronceta hayway atiqqa Señor Diosmanmi chay ofrendata apamurqan. Pipas acacia kurkuyoqqa imaymana ruwanapaqmi apamurqan.

²⁵Hinallataq allin phuskay yachaq llapa warmikunapas phuskarqanku, hinaspan chay phuskasqankuta apamurqanku: Llawlli-puka q'aytuta, sani-puka q'aytuta, rawraq-puka q'aytuta, ñañuy-ñañu lino q'aytutawan.

²⁶Phuskayta munaq allin phuskay yachaq llapa warmipas cabra suphuta phuskarqanku.

²⁷Umalli runakunan apamurqanku yanayoq yuraq umiña rumikunata, hinallataq wak umiña rumikunatapas unkuman qhasqo-ch'uspamanwan k'askachinapaq.

²⁸Apamullarqankutaq q'apaqkunata, aceitetapas k'anchanapaq, hawina aceitepaq, q'apaq inciensopaqwan ima.

²⁹Israel qharikunapas warmikunapas, ruwanapaq hayk'an apamuytapuni munaqkunan Señor Diosman ofrendata tukuy sonqo apamurqanku, chaytan Señor Diosqa Moiseswan kamachirqan ruwanankupaq.

³⁰Hinan Moisesqa Israel runakunata nirqan: — Uyariychis, Señor Diosmi Judá ayllumanta akllarqan Hurpa churin Bezaleelta.

³¹Paytan Diosqa hunt'aykurqan Espiritunwan, yachaywan, yuyaywan, reqsiywan, tukuy ruway atiywan ima.

³²Chaymi seq'ekunata kamarinqa qoripipas qolqepipas broncepipas llank'ananpaq,

³³hinallataq umiña rumikunata thupaspa ch'olqochinqa, kurkutapas llaqllanqa, ima ruwaypipas llank'allanqataq.

³⁴Bezaleelmanmi Señor Diosqa yachachinanpaqpas atiyta qollarqantaq, hinallataq Dan ayllumanta Ahisamacpa churin Aholiabmanpas.

³⁵Paykunatan yachaywan hunt'aykurqan imaymana ruwayta atinankupaq, seq'ekunata kamarinankupaq, llawlli-puka q'aytutapas, sani-puka q'aytutapas, rawraq-puka q'aytutapas, ñañuy-ñañu linotapas pallayniyoqta awanankupaq. Paykunan tukuy imaymanata ruwayta atinqaku, seq'ekunatapas kamariyta atinqaku.