Read Diospa Simin Qelqa ÉXODO 36 Bible Online

ÉXODO 36 - Diospa Simin Qelqa bible

ÉXODO 36

¹Chay hinallataqmi Señor Diosqa allin yachaq artesanokunaman yachaytapas yuyaytapas qorqan karpatapas tukuy imaymanantinta ruwanankupaq. Chay hinaqa, Bezaleelpas, Aholiabpas, chay artesanokunapas Señor Diospa kamachikusqanta hinan ruwanqaku, nispa.

²Hinan Moisesqa waqyarqan Bezaleelta Aholiabtawan llank'ayta munaq llapa allin yachaq artesanokunatawan, paykunamanmi Señor Diosqa yachayta qorqan.

³Paykunan Moisesmanta chaskirqanku Israel runakunaq llapa ofrenda apamusqankuta, karpata ruwanankupaq. Israel runakunataq sapa paqar tukuy sonqo ofrendata apamusharqanku.

⁴Hinan karpapaq tukuy ruwaq llapa yachayniyoqkunaqa ruwasqankuta saqeykuspakama rirqanku,

⁵hinaspan Moisesta nirqanku: — Llaqtaqa aswan askhatan apamushan Señor Diospa kamachikusqanta ruwanapaq, nispa.

⁶Chaymi Moisesqa karpa-karpantinpi willachirqan: — Amaña pi qharipas warmipas karpapaq ofrendata apamuchunkuñachu, nispa. Chhaynatan llaqtata hark'arqan astawan ofrendata apamunankuta.

⁷Llapanta ruwanapaqqa tukuy imapas askhapunin karqan, puchurqanraqmi kanpas.

⁸Llank'aqkuna ukhupi kusa away yachaqkuna chunka cortinamanta karpata ruwarqanku, chaykunan awasqa karqan ñañuy-ñañu linomanta, llawlli-puka q'aytumanta, sani-puka q'aytumanta, rawraq-puka q'aytumantawan. Chaykunatan querubinkunaq rikch'aynin munay pallayniyoqta awarqanku.

⁹Sapanka cortinan chunka iskayniyoq metro phisqa chunka centímetro sayayniyoq karqan, iskay metro anchoyoqtaq. Llapa cortinan chay sayaykama karqan.

¹⁰Phisqa cortinatan ch'antaspa sirarqanku, kaqllatataqmi wakin phisqa cortinatapas ch'antaspa sirarqanku.

¹¹Hinaspan ñawpaq t'aqa tukukuy cortina puntapi llawlli-puka q'aytu ninrichasqakunata churarqanku, iskaykaq t'aqa cortina puntapipas churallarqankutaqmi.

¹²Phisqa chunka ninrichasqakunatan ñawpaqkaq t'aqa cortinapi ruwarqanku, phisqa chunka ninrichasqallatataq iskaykaq t'aqa cortina puntapipas. Ninrichasqakunaqa chimpapurantinmi karqan.

¹³Ruwallarqankutaqmi phisqa chunka qori ganchotapas, chaykunawanmi iskaynin t'aqa cortinata huñuykurqanku, chhaynapin ch'ulla karpalla kapurqan.

¹⁴Bezaleelqa karpata qatanapaq ruwallarqantaqmi cabra suphumanta chunka hukniyoq cortinakunatapas.

¹⁵Sapanka cortinan chunka kinsayoq metro phisqa chunka centímetro sayayniyoq karqan, iskay metro anchoyoqtaq. Llapa cortinan chay sayaykama karqan.

¹⁶Phisqa cortinatan ch'antaspa sirarqan, soqta cortinatapas ch'antaspallataq sirarqan.

¹⁷Ñawpaq t'aqa tukukuy cortina puntapipas ruwallarqantaqmi phisqa chunka ninrichasqakunata, iskaykaq t'aqa tukukuy cortina puntapipas phisqa chunka ninrichasqakunallatataq.

¹⁸Ruwallarqantaqmi phisqa chunka bronce ganchokunatapas qatata huñunapaq, ch'ullalla kananpaq.

¹⁹Karpapaqqa ruwallarqantaqmi qatata puka teñisqa anejo qarakunamanta, patanpaqpas llamp'uy-llamp'u qarakunamanta huk qatata.

²⁰Karpapaqqa ruwallarqantaqmi acacia tablamanta marcokunata, chaykunatan allinta sayachirqan.

²¹Sapanka marcon tawa metro phisqa chunka centímetro sayayniyoq karqan, soqta chunka phisqayoq centímetro anchoyoqtaq.

²²Sapanka marcon iskay chakiyoq karqan. Chay hinatan llapa marcota karpapaq ruwarqan.

²³Marcokunataqa kay hinatan karpapaq ruwarqan: Iskay chunka marcota uray ladopaq.

²⁴Ruwallarqantaqmi tawa chunka qolqe sayanata iskay chunka marcopaq, sapanka marcopaq iskay sayanata iskaynin chakipaq.

²⁵Hinallataq karpaq hukkaqnin ladopaqpas, wichay ladopaqpas, iskay chunka marcokunata ruwarqan,

²⁶tawa chunka qolqe sayanantinta ruwarqan, sapanka marco iskay sayanayoq kananpaq.

²⁷Karpaq qhepanpaqtaq, inti haykuy ladopaq, soqta marcota ruwarqan.

²⁸Iskay marcotawan karpaq qhepa esquinankunapaq ruwarqan.

²⁹Chay marcokunaq uranmi anchorisqa karqan, umantaq huk anillollaman suskhurqan, chhaynatan ruwarqan chay iskay marcotapas iskaynin esquinapaq.

³⁰Chay hinaqa, pusaq marcon karqan chunka soqtayoq qolqe sayanayoqkama, sapanka marco iskay sayanayoqkama.

³¹Ruwallarqantaqmi acacia kurkumanta phisqa suskhuq k'aspikunata karpaq huknin lado marcokunapaq,

³²hinallataq phisqa suskhuq k'aspikunata karpaq hukkaqnin lado marcokunapaqpas, phisqa suskhuq k'aspikunata karpaq qhepan lado marcokunapaqpas, inti haykuy ladopaq.

³³Ruwallarqantaq chawpinta puriq k'aspitapas huk esquinamanta huk esquinakama marcokunaq kuskanninta suskhunanpaq.

³⁴Hinamantataq chay marcokunata qori llaphllawan k'uyurqan, ruwallarqantaqmi qori argollakunatapas, chay argollakunanta k'aspikuna suskhunanpaq. Chay suskhuq k'aspikunatapas qori llaphllallawantaqmi k'uyurqan.

³⁵Ruwallarqantaqmi cortinatapas llawlli-puka q'aytumanta, sani-puka q'aytumanta, rawraq-puka q'aytumanta, ñañuy-ñañu linomantawan, chaytaqa querubinkunaq rikch'aynin munay pallayniyoqtan ruwarqan.

³⁶Hinaspan qori ganchokunawan chayta warkurqan qoriwan k'uyusqa tawa sayaq acacia k'aspikunaman, chaykunapaqmi tawa qolqe sayanakunata ruwarqan.

³⁷Huk cortinatapas karpa punkupaq ruwallarqantaqmi llawlli-puka q'aytumanta, sani-puka q'aytumanta, rawraq-puka q'aytumanta, ñañuy-ñañu linomantawan, munay pallayniyoqta.

³⁸Ruwallarqantaqmi phisqa sayaq k'aspikunatapas ganchoyoqtakama phisqa bronce sayanakunantintakama, sayaq k'aspikunaq umantataq suskhuq k'aspinkunatawan qoriwan k'uyurqan.