Read Diospa Simin Qelqa ÉXODO 37 Bible Online

ÉXODO 37 - Diospa Simin Qelqa bible

ÉXODO 37

¹Bezaleelqa ruwallarqantaqmi arcatapas acacia kurkumanta, wask'anmi huk metro chunka centimetroyoq karqan, anchonmi soqta chunka phisqayoq centímetro, sayaynintaq soqta chunka phisqayoq centímetro.

²Ukhuntawan hawantawanmi ch'uya qori llaphllawan qatarqan, ch'uya qoriwanmi chay patata muyuriqta ribeterqan.

³Ruwallarqantaqmi chaypaq qori tawa argollata tawantin chakinpaq, iskay argollata huknin qhatapaq iskay argollatataq hukkaqnin qhatapaq.

⁴Ruwallarqantaqmi acacia kurkumanta suskhuq k'aspikunata, chaykunatan qori llaphllawan k'uyurqan.

⁵Hinaspan arca qhatapi kaq argollakunanta chay suskhuq k'aspikunata suskhuchirqan, arcata wantunapaq.

⁶Ruwallarqantaqmi ch'uya qori kirpanatapas hucha pampachana cheqas kananpaq, wask'anmi huk metro chunka centímetro, anchontaq soqta chunka phisqayoq centímetro karqan.

⁷Ruwallarqantaqmi qorimanta iskay querubinkunatapas, kirpanaq iskaynin puntanpin takasqata ruwarqan.

⁸Huknin puntapi huk querubinta, hukkaqnin puntapitaq hukkaq querubinta, kirpanatawan kuskallataña iskaynin puntapi querubinkunata ruwarqan.

⁹Querubinkunaqa chimpapurantin qhawanakushaqmi karqan, hucha pampachana cheqastataq qhawasharqanku, raphrankunataq chay cheqas pataman mast'arikurqan llanthuykunanpaq.

¹⁰Hinallataqmi acacia kurkumanta huk mesata ruwarqan, wask'anmi huk metro karqan, anchontaq kuskan metro, sayaynintaq qanchis chunka centímetro.

¹¹Ch'uya qori llaphllawanmi chayta mast'arqan, qoriwanmi muyuriqta ribeterqan.

¹²Hinallataqmi chaypa puntanta qanchis centímetro anchoyoqta kanchacharqan, chaytataq qori ribetewan muyuchirqan.

¹³Ruwallarqantaqmi unuyachisqa qorimanta tawa argollatapas, hinaspan chaykunata churarqan tawantin esquina chakiman.

¹⁴Argollakunaqa puntawan kuskan karqan, mesa wantuna k'aspikuna chayninta suskhunanpaq.

¹⁵Mesa wantuna k'aspikunataqa acacia kurkumantan ruwarqan, hinaspan qori llaphllawan chaykunata k'uyurqan.

¹⁶Ch'uya qorillamantataqmi mesa patapi kananpaq ruwarqan qhata p'ukukunata, pocillokunata, hich'ana ofrendapaq vasokunata, p'uktu p'ukukunatawan.

¹⁷Ruwallarqantaqmi takasqa ch'uya qori candelerotapas. Tiyananpas, k'aspinpas, t'ikankunapas, mukmunkunapas, phanchisqankunapas kikillanmantan karqan.

¹⁸Soqta k'allman ladonkunapi karqan: Kinsa k'allma huknin ladopi, kinsa k'allmataq hukkaq ladopi.

¹⁹Candelero k'aspimanta p'alqariq soqtantin k'allman almendro t'ika hina kinsa t'ikayoqkama karqan, mukmuntin phanchisqantin.

²⁰Candeleroq chawpin k'aspipas almendro t'ika hina tawa t'ikayoqmi karqan, mukmukunantin phanchisqakunantin.

²¹Sapa iskay k'allman, chawpi k'aspipas huk mukmu patapi tiyarqan.

²²Mukmunkunapas k'allmankunapas kikillanmantan chawpi k'aspipi karqan, llapallanmi ch'uya qorimanta takasqa kikillanmanta karqan.

²³Ruwallarqantaqmi ch'uya qorimanta qanchis lamparachakunatapas, pábilo allichanankunatapas, uspha p'ukuchankunatapas.

²⁴Kinsa chunka kinsayoq kilo ch'uya qorimantan ruwarqan candelerota tukuy imaymanantinta.

²⁵Hinallataqmi acacia kurkumanta incienso ruphachina altartapas ruwarqan. Wask'anpas anchonpas kuskan metrokaman karqan, sayaynintaq huk metro. Esquina waqrankunaqa kikillanmantan karqan.

²⁶Hinamantataq patantapas, muyuriq qhatantapas waqrankunatapas ch'uya qoriwan qatarqan, muyuriq patantataq qoriwan ribeterqan.

²⁷Churallarqantaqmi iskay qori argollatapas ribeteq uranpi, huknin qhataman iskayta, hukkaqnin qhatamanpas iskayta, wantunapaq k'aspikunata chaykunanta suskhuchinapaq.

²⁸Suskhuq k'aspikunataqa acacia kurkumantan ruwarqan, hinaspan qoriwan k'uyurqan.

²⁹Ruwallarqantaqmi hawina ch'uya aceitetapas, q'apashaq ch'uya inciensotapas, sumaq q'apaqkunata ruwaqpa ruwasqanta hina.