Read Diospa Simin Qelqa ÉXODO 40 Bible Online

ÉXODO 40 - Diospa Simin Qelqa bible

ÉXODO 40

¹Señor Diostaq Moisesta nirqan:

²— Ñawpaqkaq killa qallariy p'unchaypin Ñoqawan Tupana Karpata sayarichinki.

³Chaymanmi kamachikuy simiyoq arcata churanki, hinaspan chay arcata Ch'uyay-ch'uya Cheqas t'aqaq cortinawan pakanki.

⁴Apaykunkin mesatapas, hinaspan chay patapi churanakunata churanki. Apaykullankitaqmi candelerotapas, hinaspan lamparachakunata churanki.

⁵Kamachikuy simiyoq arca chimpa cortinaq huk ladonpi incienso ruphachina qori altartapas churanki, cortinatapas karpa punkumanmi warkunki.

⁶Hinamantataqmi Ñoqawan Tupana Karpa punkuq ñawpaqen kanchapi sacrificio ruphachina altarta churanki.

⁷Chaymantataq puruñata churanki Ñoqawan Tupana Karpawan altarwan tupaypi, chay puruñamantaq unuta hich'aykunki.

⁸Hinaspataq kanchata cortinakunawan muyuchinki, kancha punku cortinatapas warkunki.

⁹Chaymantataq hawina aceiteta hap'ispa karpata ch'aqchunki tukuy imapas chaypi kashaqkunatawan. Chay hinatan ñoqapaq chayta t'aqapuwanki lliw imaymanantinta, hinan chayqa ch'uya kapunqa.

¹⁰Ch'aqchullankitaqmi sacrificio ruphachina altartapas tukuy imaymanantinta, chay hinatan altarta ñoqapaq t'aqapuwanki, chaymi Ch'uyay-ch'uya altar kapunqa.

¹¹Ch'aqchullankitaqmi tiyanayoq puruñatapas, chay hinatan chayta ñoqapaq t'aqapuwanki.

¹²Chaymantataq Aaronta churinkunatawan Ñoqawan Tupana Karpa punkuman pusanki, hinaspan unuwan paykunata bañanki.

¹³Aarontan ch'uya p'achawan p'achachinki, hinaspan payta hawiykunki, chay hinatan ñoqapaq t'aqapuwanki sacerdotey kananpaq.

¹⁴Hinaspataq churinkunata asuykachikuspa sotanakunata churanki.

¹⁵Hinamantataq paykunata hawiykunki, taytanku hawisqaykita hina, chaymi sacerdoteykuna kanqaku. Hawisqa kasqankuwantaq paykunapas churinkupas sacerdotellaypuni kashanqaku lliw mirayninkupi, nispa.

¹⁶Moisesmi ruwarqan Señor Diospa tukuy kamachisqanman hinapuni.

¹⁷Chhaynaqa, Egipto suyumanta lloqsimpusqanku iskaykaq wataq ñawpaqkaq killan qallariy p'unchaypi, karpaqa sayarichisqa karqan.

¹⁸Moisesmi karpata sayarichirqan, sayanakunatapas marconkunatapas suskhuq k'aspinkunatapas churarqan, sayaq k'aspinkunatapas sayachirqan.

¹⁹Chay patamanmi karpata mast'aykurqan, hinaspan chay patata qatawan qataykurqan, Moisesta Señor Diospa kamachisqanman hina.

²⁰Chaymantataq kamachikuy simiyoq p'alta rumikunata hoqarispa arca ukhuman churaykurqan, hinaspataq suskhuq k'aspikunata arcaman suskhuchirqan, hinallataq kirpanata arca pataman churarqan.

²¹Hinaspataq arcata karpaman apaykurqan, hinaspan Ch'uyay-ch'uya Cheqas t'aqaq cortinata warkuykuspa kamachikuy simiyoq arcata pakaykurqan, Moisesta Señor Diospa kamachisqanman hina.

²²Mesatan karpa ukhu Ch'uya Cheqasman churaykurqan wichay ladoneqman.

²³Chay mesa patamantaq Señor Diospa ñawpaqenpi churana t'antata tawqarqan, Moisesta Señor Diospa kamachisqanman hina.

²⁴Candelerotan karpa ukhu Ch'uya Cheqasman churaykurqan mesa chimpa uray ladoneqman,

²⁵hinaspan Señor Diospa ñawpaqenpi candeleroman lamparachakunata churarqan, Moisesta Señor Diospa kamachisqanman hina.

²⁶Qori altartapas churaykullarqantaqmi karpa ukhu Ch'uya Cheqasman, t'aqaq cortinaq ñawpaqenman,

²⁷hinaspan chay patapi q'apashaq inciensota ruphachirqan, Moisesta Señor Diospa kamachisqanman hina.

²⁸Hinallataqmi karpa punku cortinata warkurqan.

²⁹Hinaspan sacrificio ruphachina altarta karpa punkuq ñawpaqenpi churarqan, hinaspanmi altar patapi ruphachina sacrificiota ruru ofrendatapas haywarqan, Moisesta Señor Diospa kamachisqanman hina.

³⁰Puruñatan karpawan altarwan tupaypi churarqan, chay puruñamantaq unuta hich'aykurqan mayllikunapaq.

³¹Moiseswan Aaronwan churinkunawanmi chaypi makinkuta chakinkuta mayllikuqku.

³²Karpaman haykuspankun, altarmanpas qayllaykuspankun mayllikuqku, Moisesta Señor Diospa kamachisqanman hina.

³³Chaymantataq karpayoq altarniyoq kanchatapas cortinakunawan muyuchirqan, kancha punku cortinatapas warkuykurqan. Chhaynatan Moisesqa Dioswan Tupana Karpa ruwayta tukurqan.

³⁴Chaymantataq phuyuqa Dioswan Tupana Karpata pakaykurqan, Señor Diospa lliphlli-kayninpas karpata hunt'aykurqan.

³⁵Manataqmi Moisesqa karpaman haykuyta atiqchu, chay patapi phuyu kashasqanrayku. Señor Diospa lliphlli-kayninpas chayta hunt'aykusqanrayku.

³⁶Karpamanta phuyu wichariqtintaq, Israel runakunaqa karpankuta hoqarispa puririqku,

³⁷phuyu mana wichariqtinmi ichaqa, chay phuyu wicharinan p'unchaykama mana puririqkuchu.

³⁸Señor Diospa phuyunmi p'unchayqa karpa patapi kasharqan, tutataq chay patapi nina kasharqan, chay hinatan tukuy purisqankupi llapa Israel runakunaqa rikurqanku.