Read Diospa Simin Qelqa ÉXODO 6 Bible Online

ÉXODO 6 - Diospa Simin Qelqa bible

ÉXODO 6

¹Hinan Señor Diosqa Moisesta nirqan: — Kunanmi rikunki imatachus rey Faraonta ruwasaq chayta, ñoqan paytaqa astawan mat'isaq llaqtayta kacharinanpaq, manan kacharillasunkichischu, aswanpas pay kikinmi hallp'anmanta qarqosunkichis, nispa.

²Diosmi Moisesta nillarqantaq: — Ñoqan Señor Diosqa[4] kani.

³Abrahamman, Isaacman, Jacobmanwantaq rikhurirqani Tukuy-atiyniyoq Dios nisqa sutiwan, Señor Dios nisqa sutiwanmi ichaqa mana paykunaman reqsichikurqaniraqchu.

⁴Paykunawanqa rimanakullarqanitaqmi Canaán hallp'ata paykunaman qonaypaq, chay suyupin wak llaqtayoq hina tiyarqanku.

⁵Hinallataqmi ñoqa yachani Israel runakunaq anchisqanta, Egipto runakunaq paykunata sinchita llank'anaman qatisqantapas. Yuyarillanitaqmi rimanakusqaytapas.

⁶Chaymi Israel runakunata ninki: — Ñoqan Señor Diosqa kani, Egipto suyupi nanaq llank'anamantan horqosqaykichis, kamachi kasqaykichismantan kacharichisqaykichis, ancha atiyniywanmi qespichisqaykichis Egipto runakunata sinchita muchuchispa.

⁷Hinaspan llaqtay kanaykichispaq chaskikapusqaykichis, Diosniykichistaq kasaq. Qankunataq yachankichis ñoqa Diosniykichis Señor Dios kasqayta, Egipto suyupi nanaq llank'achisqasuykichismanta horqoqniykichis kasqayta.

⁸Abrahamman, Isaacman, Jacobmanwan qonaypaq prometesqay suyumanmi pusaykusqaykichis, ñoqan chayta herenciaykichis kananpaq qosqaykichis. Ñoqan kani Señor Diosqa, nispa.

⁹Chaytan Moisesqa Israel runakunaman willarqan, paykunataq ichaqa Moisesta mana kasurqankuchu sinchi llank'achisqawan sonqonku nanachisqa kasqankurayku.

¹⁰Señor Diostaq Moisesta nirqan:

¹¹— Rispayki Egipto suyu rey Faraonta nimuy: Israel runakunata suyuykimanta ripunanpaq kacharipuy, nispa.

¹²Hinan Moisesqa Señor Diosman kutichirqan: — Israel runakunaqa manan uyarillawankupaschu, ¿chaychu rey Faraonqa kasuwanman, ñoqa mana kusa rimaq kashaqtiy? nispa.

¹³Chaymi Señor Diosqa Moisestawan Aarontawan kamachirqan Israel runakunata rey Faraontawan kay hinata nimunankupaq: Señor Diosmi Israel runakunata Egipto suyumanta horqonaykupaq kamachimuwarqanku, nispa.

¹⁴Kaykunan ayllu taytakuna: Israelpa phiwin Rubenpa churinkuna: Hanoc, Falú, Jezrón, Carmipiwan. Chaykunan Rubenpa ayllunkuna.

¹⁵Simeonpa churinkuna: Jemuel, Jamín, Ohad, Jaquín, Zohar, Canaán warmiq churin Saulpiwan. Chaykunan Simeonpa ayllunkuna.

¹⁶Leviqa pachak kinsa chunka qanchisniyoq watatan kawsarqan. Kaykunan Levipa churinkunaq sutin, kurakmanta sullk'akama: Gersón, Cohat, Meraripiwan.

¹⁷Gersonpa churinkuna ayllunkuman hina: Libniwan Simeipiwan.

¹⁸Cohatmi pachak kinsa chunka kinsayoq watata kawsarqan, churinkunataq Amram, Izhar, Hebrón, Uzielpiwan karqan.

¹⁹Merariq churinkuna: Mahaliwan, Musiwan. Chaykunan Levipa ayllunkuna, kurakmanta sullk'akama.

²⁰Amrammi Jocabed tianwan casarakurqan, paymi wachakurqan Aarontawan Moisestawan. Amrammi pachak kinsa chunka qanchisniyoq watata kawsarqan.

²¹Izharpa churinkuna: Coré, Nefeg, Zicripiwan.

²²Uzielpa churinkuna: Misael, Elzafán, Sitripiwan.

²³Aaronmi Aminadabpa ususin Elisabetwan casarakurqan, paymi Naasonpa panan karqan, wachakurqantaq Nadabta, Abiuta, Eleazarta, Itamartawan.

²⁴Corepa churinkuna: Asir, Elcana, Abiasafpiwan. Chaykunan Coré runakunaq ayllunkuna.

²⁵Aaronpa churin Eleazartaq Futielpa huknin ususinwan casarakurqan, paymi Fineesta wachakurqan. Chaykunan Leví runakunaq taytankuna, ayllunkuman hina.

²⁶Aarontawan Moisestawanmi Señor Diosqa nirqan: — Egipto suyumanta Israel runakunata t'aqa-t'aqata horqomuychis, nispa.

²⁷Paykunan Egipto suyu rey Faraonta rimapayarqanku, chay suyumanta Israel runakunata horqomunankupaq.

²⁸Señor Diosqa Egipto suyupi Moisesta rimaykuspan

²⁹nirqan: — Ñoqan Señor Diosqa kani, Egipto suyu rey Faraonman nimuy lliw imaymanata qanman nisqayta, nispa.

³⁰Moisestaq Señor Diosman kutichirqan: — Manan ñoqaqa kusa rimaqchu kani, ¿chaychu rey Faraonqa kasuwanman? nispa.