Read Diospa Simin Qelqa ÉXODO 9 Bible Online

ÉXODO 9 - Diospa Simin Qelqa bible

ÉXODO 9

¹Chaymi Señor Diosqa Moisesta nirqan: — Rey Faraonpata riy hinaspa nimuy, Hebreo runakunaq Diosnin Señormi nin: Llaqtayta kachariy yupaychamuwanankupaq.

²Manataq kachariyta munankichu, hark'akunkiraqtaq chayqa,

³ñoqan manchay onqoywan muchuchisaq campo uywaykikunata, caballokunata, asnokunata, camellokunata, wakakunata, ovejakunatapas.

⁴Ichaqa Israelpa uywankunatan Egipto runakunamanta t'aqasaq, ahinapi Israel runakunaq mayqen uywanpas ama wañunanpaq, nispa.

⁵Hinaspataq Señor Diosqa horata señalarqan: — Paqarinmi chayta kay suyupi ruwasaq, nispa.

⁶Paqarisnintataq Señor Diosqa chayta ruwarqan, chaymi Egipto suyu llapa uywa wañurarqan, Israel runakunaq uywantaq ichaqa mana hukllapas wañurqanchu.

⁷Hinan rey Faraonqa yachaqta kacharqan, chaymi willarqanku: Israel runakunaq uywanqa manan hukllapas wañusqachu, nispa. Chaywanpas rey Faraonqa sonqontan rumiyaykachirqan, manataq Israel runakunata kacharirqanchu.

⁸Señor Diosmi Moisestawan Aarontawan nirqan: — Hornomanta hapt'ay usphata horqoychis. Qanmi Moisés, rey Faraonpa qayllanpi chayta wichayman hach'inki.

⁹Ñut'u hallp'amanmi uspha tukunqa, hinaspan Egipto suyuntinman chayaspa lleq-nishaq ch'upuwan hap'ichinqa runakunatapas uywakunatapas, nispa.

¹⁰Chaymi horno usphata horqospa, rey Faraonpa qayllanpi sayaykurqanku, hinaspan Moisesqa wichayman hach'irqan. Hinan lleq-nishaq ch'upu hap'irqan runakunatapas uywakunatapas.

¹¹Ch'upuqa hap'irqan layqakunata llapan Egipto runakunatapas, chaymi layqakunaqa mana Moisesman qayllaykuyta atirqankuchu.

¹²Señor Diostaq ichaqa rey Faraonpa sonqonta rumiyaykachirqan, chaymi mana paykunata kasurqanchu, Señor Diospa Moisesta nisqanman hina.

¹³Señor Diosmi Moisesta nirqan: — Tutallamanta sayariy, rey Faraonpa ñawpaqenpi sayaykuspa nimuy, Hebreo runakunaq Diosnin Señormi nin: Llaqtayta kachariy yupaychamuwanankupaq.

¹⁴Kay kutiqa llapa muchuchiyniytan qanman chayachimusaq, oficialniykikunamanpas, runaykikunamanpas, chaywanmi yachanki kay pachantinpi mana ñoqa hina wak diosqa kasqanta.

¹⁵Ñoqachus qantapas llaqtayki runakunatapas onqoywan hap'ichiyman karqan chayqa, ñan kay pachamanta chinkapuwaqña karqan.

¹⁶Chaywanpas ñoqan kawsachishayki, atiyniyta rikunaykipaq, kay pachantinpi reqsichikunaypaqwan.

¹⁷Chaywanpas llaqtay contraraqmi sayarishanki, ripunanpaq mana kacharispayki.

¹⁸Kayqa paqarinmi kunan hina horasta sinchi llasa chikchita chikchichimusaq, chay hina llasaqa manan hayk'aqpas Egipto suyuq qallarisqan p'unchaymantapacha kunankama karqanchu.

¹⁹Kamachiy, campopi hayk'an kaq uywaykita wasiman huñunankupaq, chikchiqa chayanqa campopi kaq llapa runamanmi animalkunamanwan, hayk'an wasi ukhuman mana huñusqaqa wañunqan, nispa.

²⁰Rey Faraonpa wakin oficialninkunamanta, Señor Diospa siminta manchakuqllan wasinman ayqechirqan kamachinkunatapas, uywankunatapas.

²¹Señor Diospa siminta mana kasuqmi ichaqa, campopi saqerqan kamachinkunatapas uywankunatapas.

²²Señor Diostaq Moisesta nirqan: — Altoman makiykita haywariy, Egipto suyuntinman chikchimunanpaq runakunamanpas, uywakunamanpas, campopi llapa wiñaqkunamanpas, nispa.

²³Hinan Moisesqa tawnanta altoman haywarirqan, chaymi Señor Diosqa q'aqyaqechispa chikchichirqan, suyuntinmanmi lliphllikirqan. Chay hinatan Señor Diosqa Egiptoman chikchichimurqan.

²⁴Chikchiqa mana thanispan lliphllikispa chayarqan. Manan hayk'aqpas Egipto suyuq qallarisqamantapacha chay hina sinchitaqa chikchirqanchu.

²⁵Chay chikchin k'irirqan Egipto suyuntinpi hayk'an campopi kaqta, runatapas uywatapas. Hinallataq campopi llapan qoratapas saqtarqan, chay suyupi llapa sach'atapas chaqorqan.

²⁶Ichaqa Israel runakunaq tiyasqan Gosén hap'iyllatan mana chikchirqanchu.

²⁷Chaymi rey Faraonqa Moisesta Aarontawan waqyachimuspa nirqan: — Reqsikunin huchallikusqayta, Señor Diosqa chaninmi, ñoqawan llaqtaywantaq mana chanin kayku.

²⁸Señor Diosmanta mañakuychis q'aqyaqeypas chikchipas thanipunanpaq, ñoqataq kacharisqaykichis, manañan hark'asqaykichisñachu, nispa.

²⁹Moisestaq payta nirqan: — Llaqtamanta lloqsispa hinan Señor Diosman makiyta mast'arispa mañakusaq, chaymi q'aqyaqeykunaqa thaninqa, manañataq chikchinqañachu, ahinapin yachanki kay pachaqa Señor Diospa kasqanta.

³⁰Chaypas yachanin qanpas oficialniykikunapas Señor Diostaqa manaraq manchakusqaykichista, nispa.

³¹Linopas cebadapas saqtasqan karqan, cebadaqa chukchasharqanñan, linopas t'ikasharqanñan.

³²Trigotawan centenotawanqa manan imanarqanpaschu qhepa t'akayña kasqanrayku.

³³Rey Faraonpa qayllanmanta llaqta hawaman lloqsispataq Moisesqa Señor Diosman makinta mast'arispa mañakurqan, hinan q'aqyaqeypas chikchipas thanirqan, parapas manañataq chayarqanñachu.

³⁴Parapas, chikchipas, q'aqyaqeykunapas thanipuqtintaq rey Faraonqa yapamanta huchallikurqan, hinaspan paypas oficialninkunapas sonqonkuta rumiyaykachirqanku.

³⁵Rey Faraonpa sonqonqa rumiyasqan karqan, chaymi Israel runakunataqa mana kacharirqanchu, Señor Diospa Moisesta nisqanman hina.