Read Diospa Simin Qelqa JOB 1 Bible Online

JOB 1 - Diospa Simin Qelqa bible

JOB 1

¹Uz suyupin Job sutiyoq runa tiyarqan, paymi hunt'aq runa, chanin runa karqan, tukuy sonqonwan Diosta servikuq, mana allin ruwaymantapas t'aqakuq.

²Paymi karqan kinsa ususiyoq qanchis churiyoq.

³Uywankunataq karqan qanchis waranqa oveja, kinsa waranqa camello, phisqa pachak masa toro, phisqa pachak china asnopas. Kamachin runakunapas ancha askhan karqan. Jobqa inti lloqsimuy lado suyukunapi runakunamanta aswan qhapaqmi karqan.

⁴Jobpa churinkunaqa wasinkumankama waqyachinakuspan qati-qatilla fiestata ruwaqku, chay fiestankumanmi kinsantin panankuta waqyachillaqkupuni paykunawan mikhunankupaq ukyanankupaqwan.

⁵Chay fiesta ruwayta tukuqtinkutaq Jobqa wawankunata waqyachispa sapankata ch'uyanchachiq, hinaspan tutallamanta hatarispa sapanka wawanmanta sacrificiota Diosman haywaspa ruphachiq: Ichapaschá wawaykunaqa sonqonku ukhupi Diosta ñakaspanku huchallikunkuman karqan, nispa niq yuyaywan. Jobqa chay hinatapunin ruwayta yachaq.

⁶Huk p'unchay angelninkuna Señor Diosman qayllaykushaqtinmi, Satanaspas paykunawan kuska qayllaykullarqantaq.

⁷Chaymi Señor Diosqa payta nirqan: — ¿Maymantan hamushanki? nispa. Satanastaq kutichirqan: — Kay pachaq k'uchun-k'uchunta purimusqaymantan, nispa.

⁸Hinan Señor Diosqa nirqan: — ¿Kamachiy Jobta qhawarirqankichu? Pay hina chanin runaqa manan kay pachantinpi kanchu. Payqa tukuy sonqonwanmi serviwan, mana allin ruwaymantapas t'aqakunpunin, nispa.

⁹Satanasmi ichaqa nirqan: — Manamá yanqanchu Jobqa yupaychashasunki.

¹⁰Qanqa paytapas familiantapas tukuy kaqnintapas manan piwanpas llamiykachinkichu, aswanmi lliw ima ruwasqantapas saminchashanki, chaymi uywankunapas suyuntinman hunt'aykushan.

¹¹Kaqninkunatachus kunan qechurqowaq, chayñayá yachawaq imaynataraqchus uyaykipi ñakasunkiman chayta, nispa.

¹²Señor Diostaq Satanasta nirqan: — Chay hinaqa, Jobpa lliw kaqninta munasqaykita ruwamuy, pay kikintan ichaqa ama imanankipaschu, nispa. Hinan Satanasqa Señor Diospa qayllanmanta ripurqan.

¹³Huk p'unchaymi Jobpa churinkuna ususinkunapiwan kurakninkuq wasinpi ukyasharqanku mikhusharqanku.

¹⁴Hinan huk runa Jobpa wasinman willakuq chayarqamurqan: — Torokunawanmi chakrata llank'asharqayku, china asnokunatapas qayllallaykupi michisharqayku.

¹⁵Chayllamanmi Sabá suyu runakuna llat'anaq phawaykamuwaspanku uywakunata qatirikapunku. Llank'aq-masiykunatataq wañurqarichipunku, ñoqallañan wañuchinamanta ayqerqamuni, chaymi willaq hamushayki, nispa.

¹⁶Chay runa manaraq willakuyta tukuykushaqtinmi huk runaqa chayarqamullarqantaq: — Llapan michiqkunata ovejakunatawanmi rayo rupharqapun, ñoqallatañan mana wañuchiwanchu, chaymi willaq hamushayki, nispa.

¹⁷Chay runa manaraq rimayta tukuykushaqtinmi huk runapas chayarqamullarqantaq: — Caldea suyu runakunan kinsa t'aqa hamusqaku, hinaspan llat'anaq phawaykamuspa camellokunata qatirikapunku. Michiq-masiykunatataqmi wañurqarichipunku, ñoqallañan wañuchinamanta ayqerqamuni, chaymi willaq hamushayki, nispa.

¹⁸Chay runa manaraq willakuyta tukuykushaqtinmi huk runapas chayarqamullarqantaq: — Churiykikunan ususiykikunapiwan kurakninkuq wasinpi mikhusharqanku ukyasharqanku,

¹⁹chayllamanmi qonqaylla tutuka hatun wayra ch'inneqmanta hamurqospa, wasita tawantin ladomanta wawaykikuna pataman thuniykapun, hinan llapallankuta wañurqachin, ñoqallañan mana wañunichu, chaymi willaq hamushayki, nispa.

²⁰Chaymi Jobqa sayarispa llakikuymanta p'achanta llik'irparikurqan, chukchantapas ruturqokurqan, hinaspan uyanpamanta wikch'ukuspa Señor Diosta yupaychaykurqan.

²¹Nirqantaq: — Q'alallan kay pachaman paqarimurqani, q'alallataqmi wañukapusaqpas, Señor Diosmi lliw imatapas qowarqan, payllataqmi qechukapuwan. ¡Saminchasqapuni Señor Diosqa kachun! nispa.

²²Chaykunaña kaqtinpas Jobqa manapunin huchallikurqanchu, manallataqmi Diostapas huchacharqanchu.