Read Diospa Simin Qelqa JOB 12 Bible Online

JOB 12 - Diospa Simin Qelqa bible

JOB 12

¹Chaymi Jobqa kutichirqan:

²— ¡Arí, qankunaqa llaqta taytakunapunin kankichis! ¡Wañuqtiykichisqa manan ima yachaykunapas kanqachu!

³Ichaqa ñoqapas yuyaynillayoqtaqmi kani, imapipas manan sullk'achu qankunamantaqa kani. ¿Pitaq mana yachanchu lliw chaykunatari?

⁴Diosta waqyakuqtiyqa uyariwarqanmi, chaywanpas amigoykunaqa burlakuwanmi. Ñoqaqa mana huchachana chaninmi kani, chaywanpas runakunaqa asipayawanmi.

⁵Qhali kashaqkunaqa onqosqataqa pisichanmi, urmaq hina kaqtapas tanqarparinmi.

⁶Suwakunaqa thakmi wasinkupi tiyakushan, Diosta phiñachiqkunapas llakhillan kawsakushan, paykunaqa kallpankumanpunin hap'ipakunku.

⁷Tapukuy uywakunata, paykunan yachachisunki, tapukuy phalaq animalkunata, paykunan willasunki.

⁸Tapukuy hallp'a pachata, paymi yachachisunki, tapukuy lamar-qochapi challwakunata, paykunan willasunki.

⁹Icha, ¿mayqenninkupas kanmanraqchu llapanta Diospa ruwasqanta mana yachaq?

¹⁰Diospa makinpin animalkunaq kawsayninqa kashan, paypa munayninpin runakunaq kawsayninqa kashan.

¹¹Ninriwan uyarispan allinta mana allinta reparan, mikhunata malliykuspan sumaq mana sumaq kasqanta yachan.

¹²Kurak taytakunapin yachayqa kashan, askha watayoq runakunapin yuyayniyoq kayqa kashan.

¹³Diosllan yachayniyoqpas atiyniyoqpas, paymi yuyaychan, lliwtataq entienden.

¹⁴Diospa thunisqantaqa manan pipas wakmanta perqanmanchu, Diospa wisq'asqantaqa manan pipas kicharinmanchu.

¹⁵Dios mana parachimuqtinmi llapa hallp'a ch'akirqapun, Dios parata kacharimuqtinmi lliw hallp'aman llinp'aykun.

¹⁶Diosmi kallpayoqqa, paytaqmi imapipas atipaqqa, Diospa munayninpin kashan q'otusqakunapas yukaqkunapas.

¹⁷Diosmi yuyaychaqkunaq umanta muyurichin, juezkunatapas waq'ayachin.

¹⁸Paymi reykunaq atiyninta qechupun, kamachimantaq tukuchipun.

¹⁹Sacerdotekunatan llank'ananmanta p'enqayta wikch'upun, allin takyasqa kamachikuqkunatan qarqopun.

²⁰Lliwpa hap'ipakunan allin kunaykukuqtapas manan rimarichinchu, allin yuyayniyoq kurak taytakunatapas musphachinmi.

²¹Allin wiraqochakunatapas mana imapaqmi qhawarin, allin kallpayoqkunatapas kallpantan chiriyachin.

²²Mana piqpa rikusqan pakasqakunatapas sut'imanmi horqomun, ch'ampiq laqhakunatapas sut'imanmi tukuchin.

²³Diosmi suyukunataqa hatunchanpas thuninpas, hatunyachinpas chinkachinpas.

²⁴Kay pachapi umalli runakunaq yuyaynintapas qechunmi, ch'inneq ch'usaqpi purishaqtapas tumaqayachinmi.

²⁵Laqha tutayaqpi purishaspan llamipakunku, machasqata hinan thampiykachachin.