Read Diospa Simin Qelqa JOB 13 Bible Online

JOB 13 - Diospa Simin Qelqa bible

JOB 13

¹Lliw kaykunatan rikunipuni, ninriykunawanpunin uyarini.

²Qankunaq yachasqaykichistaqa ñoqapas yachallanitaqmi, qankunamantaqa manan imapipas pisichu kani.

³Aswanmi Dioswan rimayta munani, Tukuy-atiyniyoqwanmi churanakuyta munani.

⁴Qankunaqa llullakuywanmi cheqaqkaqta pakashankichis, qankunaqa hampiq purispa mana qhaliyachiqkunan kankichis.

⁵¡Qankunachus ch'inyaykuwaqchis ratollapas chayqa, yachaysapa runaman yupasqan kawaqchis!

⁶Ama hinachu kaychis, uyariykuwaychispuni, allinta uyariykuwaychis defendekusqayta.

⁷¿Yuyankichischu llullakusqaykichiswan Diosman sayapakusqaykichista? ¿Yuyankichischu q'otuq simikunawan Diosta servisqaykichista?

⁸¿Qankunari Diospa rantinpi churakuwaqchischu? ¿Qankunari Diosman sayapakuytachu munankichis?

⁹Ichaqa, ¿imaynataq kankichis Diosninchis t'aqwisuqtiykichis? Runata hina, ¿Diosninchista q'otuyta atiwaqchischu?

¹⁰Llullakuspachus Diosman sayapakunkichis chayqa, cheqaqtapunin Diosqa anyasunkichis.

¹¹¿Diospa hatun kayninri manachu llaksasunkichisman? ¿Qankunari manachu q'aqchakuwaqchis?

¹²Ñawpaq thawtisqaykichisqa uspha hinallan, ch'ampa perqa qhepamanta hark'apakuy hinallan.

¹³¡Kunanqa upallaychis! Ñoqapas rimaytan munani, ¡imapas hayk'apas kawachun!

¹⁴Kawsayniytan churani, hina wañusaqpas, kawsayniytaqa makiypin hap'iykusaq.

¹⁵Manan suyakuyniy kanñachu, hina wañuchiwachunpas, chaytukuywanpas uya-uyapuran tupapakuyta munani.

¹⁶Chay hinapichá qespikuyta atiyman, millay runaqa manataqmi Diospa qayllanman haykunmanchu.

¹⁷Uyariwaychis rimasqayta, qankunaman rimapayasqayta.

¹⁸Ñoqapas rimarikuytan munani, allintan yachakuni chaninchasqa kanayta.

¹⁹¿Pipas hamushanchu ch'atawananpaq? Chay hinaqa, ch'inllan uyariykuspa wañukapusaq.

²⁰Diosnilláy, huk iskay cosasllatawanmi munani qowanaykita, manataqmi qanmanta pakakunichu.

²¹Amañayá ñak'arichiwaychu, amapuniñayá kay hinata llaksawayñachu.

²²Rimapayamuway, ñoqataq kutichimusqayki, icha, ¿ñoqaraqchu rimapayasqayki qantaq kutichimuwanki?

²³Diosníy, ¿imakunaraqmi huchay? Willaykuway huchallikusqaykunata.

²⁴¿Imanaqtinmi mana qhawariwankichu? ¿Imanaqtinmi awqaykita hina rikuwanki?

²⁵Wayraq apanan ch'aki raphi hinallan kani, chayri, ¿imanaqtintaq ch'usaqyachiyta munawanki? Chhapa hinallan kashani, ¿imanaqtintaq qatiykachawanki?

²⁶Imaymana muchuywanmi ñak'arichiwanki, wayna kasqaymantaraqmi hoqariwanki.

²⁷Chakiykunatan thunkuwanki, purinaykunatan makilla qhawanki, manan kuyurinayta munankichu.

²⁸Runaqa ismusqa k'ullu hinan wanurikapun, thutaq k'utusqan p'acha hinan ñut'urikapun.