Read Diospa Simin Qelqa JOB 15 Bible Online

JOB 15 - Diospa Simin Qelqa bible

JOB 15

¹Temán llaqtayoq Elifazmi rimarqan:

²— Yachayniyoqri, ¿yanqa simiwanchu kutichinman? Yachayniyoqri, ¿k'arak simikunatachu rimanman?

³¿Rimayllachu rimanman? ¿Yanqa qasichu seqachinakunman?

⁴Qanqa Dios manchakuqtapas cheqaq hap'ipakuqtapas pantachishankin.

⁵Qanpa huchaykin chay hinata rimachisunki, q'otukuq simikunatan rimanki.

⁶Qanpa simiykin huchachasunki, manan ñoqachu, qanpa rimarisqaykin contraykipi sayarin.

⁷Qanri, ¿kay pachapi manaraq pipas kashaqtin karqankiñachu? Qanri, ¿paqarirqanki manaraq orqokuna kashaqtinchu?

⁸Qanri, ¿uyarirqankichu Diospa pakallapi yuyaykusqankunata? Qanri, ¿yuyankichu sapallayki kay pachapi yachayniyoq kasqaykita?

⁹¿Imatan qan yachanki ñoqaykuq mana yachasqaykuta? ¿Imatan qan reparanki ñoqaykuq mana reparasqaykuta?

¹⁰Soqo umayoq yuyaq taytakunan ñoqanchis ukhupi kashan. ¡Paykunaqa taytaykimantapas aswan yuyaqkunañan!

¹¹¿Manachu saksanki kikin Diospa sonqochasqanwan? Ñoqaykupas paypa rantinpi llamp'u simiwanmi rimapayashaykiku.

¹²¿Imanaqtinmi sonqoykiwan q'otuchikunki? ¿Imanaqtintaq ñawiykipas ch'illmipakun?

¹³¿Imanaqtintaq Dios contra k'arakta phiñakunki? ¿Imanaqtintaq millay simi kacharisqata rimanki?

¹⁴¿Pi runallapas ch'uya kanmanchu? ¿Runamanta paqariqqa chanin kanmanchu?

¹⁵Manan angelninpipas Diosqa confiakunchu, ñawinpaqqa hanaq pachapas manan ch'uyachu.

¹⁶¡Imayna aswanraqchá millay waqllisqa runaqa! ¡Imayna aswanraqchá hucha ruwaywan misk'illikuq runaqa!

¹⁷Kunantaq hukta nisqayki, uyariykuway: Kawsayniypi yachaqasqaytan willasqayki.

¹⁸Kayqa yachaysapakunaq yachachisqanmi, kayqa ñawpa taytankumanta yachaqasqankuta mana pakaykuspa yachachisqanmi

¹⁹(chay ñawpa taytankumansi kay suyupas qosqa kasqa, manaraq wak llaqtayoqkunapas haykushaqtin).

²⁰Millay runaqa tukuy kawsasqan p'unchaymi muchushallanpuni, awqa sonqo runaqa pisi p'unchayllan kawsan.

²¹Ninrinqa uyarishallanpunin llaksakuykunata, llat'anaqqa llakhi kashasqan horasmi phawaykun.

²²Manan kanñachu suyakuynin wañuymanta ayqenanpaqqa, paytaqa huk puñalmi wañuchinanpaq suyamushan.

²³Ayanpas suweq'araq mikhunanpaqmi kanqa, payqa yachakunmi thunikuyninqa llaksakuyraq kananta.

²⁴Laqhayaqmi llaksakuywan hunt'aykushan, phutikuywan hatun llakiwantaqmi musphachishan, awqa-tinkuypi phawaykuq rey hinaraq.

²⁵Kaykunan kan makinkuta Diosman haywariqkunapaqqa, Tukuy-atiyniyoqta atipayta yuyaykuqpaqqa.

²⁶Phatu chuchu escudowan pakaykukuspan Dios contra manchanataraq phawaykun.

²⁷Payqa kashan wirasapallañan, uyanpas wiksanpas hatunllañan.

²⁸Chaytukuywanpas payqa tiyanqa purunyasqa llaqtapin, payqa tiyanqa thunisqa wasikunapin, ch'usaqyapunan patapi kashaq wasikunapin.

²⁹Manañan qhapaqchu kapunqa, lliw kaqninpas ch'usaqyapunqan, manan llanthullanpas kay pachapi rikukunqañachu.

³⁰Laqhayaqmantaqa manapunin ayqenqachu, ch'ikchin ruphasqa mallki hinan kanqa, Diospa phukurparisqan hinan kanqa.

³¹Pay kikinta q'otukuspa mana valeqpi suyakuqqa, manan imatapas chaskinqachu.

³²Manaraq imanpin k'allmanqa naq'epunqa, manataqmi hayk'aqpas q'omeryanqañachu.

³³Mana hayk'aq poqoq uvasniyoq yura hinan kanqa, t'ikan urmasqa olivos sach'a hinan kanqa.

³⁴Millay runaqqa manapunin mirayninqa kanchu, lluk'iykuqkunaq tiyanan karpakunaqa ninaq ruphasqanmi kanqa.

³⁵Chay millaykunaqa mana allinkaqtan wiksallikunku, paykunaqa mana chaninkaqtan wachakunku, llapan yuyaykusqankunapas hukkunata q'otunallapaqpunin, nispa.