Read Diospa Simin Qelqa JOB 33 Bible Online

JOB 33 - Diospa Simin Qelqa bible

JOB 33

¹Chayrayku, Job, rimasqayta uyariway, nisqaykunaman ninriykita k'iraykamuway.

²Simiy patapiñan kutichinaypaq kashan.

³Chanin-kay sonqowanmi rimarisaq, imatachus yuyaykusqaytan cheqaq-kaywan rimarisaq.

⁴Diospa Espiritunmi ruwawarqan, Tukuy-atiyniyoqmi kawsayta qowarqan.

⁵Atispaqa kutichimuway, wakichikuy churapakamunaykipaq.

⁶Qanpas ñoqapas Diospa ñawpaqenpiqa kaqkaman kanchis, ñoqapas t'urumanta kamasqallan kani.

⁷Chay hinaqa, manan imapas kanchu manchakuwanaykipaq, chaywanpas manan qantaqa ñit'iykusqaykichu.

⁸Qan kikiykin niwarqanki, kay nisqaykitan uyarirqani:

⁹Mana ima huchayoq ch'uyan kani, manan pantasqaypas huchaypas kanchu.

¹⁰Ichaqa Diospunin yanqa tumpawan, awqanpas kayman hinan qhawariwan,

¹¹Chakiykunatan thunkuwan, purisqaytapas makillan qhawan, nispa.

¹²Chay hina rimasqaykiqa manapunin chaninchu, Diosqa runakunamantaqa aswan hatunmi.

¹³¿Imanaqtinmi: Runaq rimasqanta mana kutichimunkichu, nispa, Diosta quejakunki?

¹⁴Diosqa imaymana rikch'aypin rimapayawanchis, ñoqanchisqa manan reparanchischu.

¹⁵Mayninpiqa tutan ruwan mosqoypi otaq rikhuriypipas, lliw runakuna puñurqapuqtinña, misk'i puñuypi kashaqtinkuña.

¹⁶Diosqa runaman rimasqanta uyarichinmi, anyaspanmi lliwtaraq llaksan

¹⁷millay ruwayninkumanta t'aqananpaq, uma hoqariq-kayman mana kutinankupaq.

¹⁸Chay hinapin wañuymanta waqaychan, wañuy mayu chimpanatapas hark'an.

¹⁹May kutinpiñataq Diosqa runata cheqanman churan onqoykunawan, tullunkunaman imaymana nanaykunata churaspa.

²⁰Chaymi mikhunakunata millakun, sumaq mikhunatawanpas cheqnikun.

²¹Aychanpas lliwmi thantakapun tullunkunapas rikhurinankama.

²²Kawsayninpas aya p'ampana patallapiñan kashan, wañuypas punkullanpiñan kashan.

²³Diospa waranqa angelninmanta huk ángel hamuspa payman sayapakunman, chanin kasqanmantawan sut'inchaspa,

²⁴payta khuyapayaykuspataq Diosta ninman: Wañuymanta qespichiy, kacharisqa kananpaq pagota tariniñan, nispa chayqa,

²⁵chay hinapin aychanqa qholla wawaq hinaraq kanqa, waynaq hinaraq cuerponpas kapunqa.

²⁶Diosmantan mañakunqa, paypas uyarinqataq, kusikuywanmi Diosta uya-uyapura qhawarinqa, Diostaqmi wakmanta payta chaninta hina qhawarinqa.

²⁷Hinan runakunata ninqa: Ñoqaqa huchallikurqanipunin, chanin-kaykunatan q'ewirqani, chaytukuywanpas Diosqa manaraqmi muchuchiwanchu.

²⁸Aswanmi wañuymanta horqoykuwan, hinan k'anchaytapas rikuykuniraq, nispa.

²⁹Chay hinatan Diosqa runata ruwan, iskay kinsa kutita.

³⁰Wañuyman mana haykunanpaq, kawsashasparaq k'anchayta rikunanpaq.

³¹Amigo Job, allintapuni uyariway, rimasqayta ch'inlla uyariway.

³²Imachus rimanayki kashan chayta kutichiway, niway, chanin kasqayki rikuchiytan munani.

³³Mana chaytaq, ch'inllaña uyariway, ñoqan allin yachaysapa kayta yachachisqayki.