Read Diospa Simin Qelqa JOB 34 Bible Online

JOB 34 - Diospa Simin Qelqa bible

JOB 34

¹Eliuqa nillarqantaqmi:

²— Uyariwaychis, yachaysapakuna, uyariwaychis rimasqayta, hamawt'akuna.

³Ninriwanmi reparankichis rimasqata, simiwanmi reparankichis sumaq mikhunata.

⁴Chay hinallataq chaninkaqtapas reparasun, allinkaqtapas huñulla yachaqasun.

⁵Jobmi nin: — Mana ima huchayoqmi kani, Diostaq mana chaninta hina qhawariwan.

⁶Cheqaqta rimashaqtiypas payqa llullakunmi, mana ima huchaymantan mana thaniq k'iriwan churaykuwan, nispa.

⁷¡Manan pipas Job hinaqa kanchu! Paymanqa Dioswan churanakuymi misk'iykun, unuta ukyaykuy hinaraq.

⁸Millaykunawanmi huñukuyta munan, mana chaninkunawanmi puriyta munan.

⁹Payqa ninmi: Runaqa manan imatapas tarinchu, Diospa sonqonman chayaqta ruwaspaqa, nispa.

¹⁰Chay hinaqa, hamawt'akuna, uyariwaychis. ¡Diosqa manan hayk'aqpas mana allintaqa ruwanmanchu! ¡Tukuy-atiyniyoqqa manan hayk'aqpas mana chanintaqa ruwanmanchu!

¹¹Payqa sapankamanpas ruwasqanman hinan pagapun, sapankamanpas tupaqninman hinan qopun.

¹²Cheqaqtapunin Diosqa mana chanintaqa mana ruwanmanchu, cheqaqtapunin Tukuy-atiyniyoqqa chaninkaqtaqa mana q'ewinmanchu.

¹³¿Pitaq Diostari kay pacha kamachiqta churarqan? ¿Pitaq paytari teqsimuyuntinta qhawananpaq churarqan?

¹⁴Diosqa yuyaykukuspan lliw runamanta kawsayninta samaynintawan qechunman,

¹⁵paykunataq llapallan kuskapacha wañunkuman, wakmanta hallp'aq ñut'unman tukupunkuman.

¹⁶Yuyayniyoq kaspaqa uyariway, rimasqayta makilla uyariway.

¹⁷Chanin-kayta Dios cheqnikuspari, ¿kamachinmanchu? Qanri, ¿atiyniyoq chanin Diosta huchachawaqchu?

¹⁸Diosqa reykunatapas: Manan imapaqpas valenkichischu, ninmi, umalli kamachikuqkunatapas: Mana chaninkunan kankichis, ninmi.

¹⁹Paymi llapanta kamarqan, chaymi umalli runakunaman mana sayapakunchu, paypaqqa qhapaqpas wakchapas kaqkamallan.

²⁰Runaqa huk ratomanta huk raton tutaq sonqollanpi wañurqapun, runaqa withapakushasqanpin chinkariykapun, munayniyoq runatapas mana kallpachakuspallan Diosqa ch'usaqyachin.

²¹Runaq purisqanqa Diospa qhawasqallanmi, llapan purisqanpas reqsisqallanmi.

²²Imayna niraq laqhapas manan kanchu mana chanin ruwaqta pakaqqa.

²³Diosqa ñan yachanña imaynachus runaq kawsaynin kasqanta, payqa manan runataraqchu tapun ima huchatapas yachananpaqqa.

²⁴Chaymi mana tapuspalla munayniyoq runata chinkachin, hinaspan rantinpi hukta churan.

²⁵Diosqa ima ruwasqakunatapas yachanmi, chayraykun tutaq sonqollanpi hap'irqospa ñit'irqapun.

²⁶Millay runata hinan hasut'in, llapa runaq rikushasqan,

²⁷payta mana kasuyta munasqanmanta, munayninman hina mana purisqanmantawan.

²⁸Paykunaq sarunchasqanmi wakchakunaqa Diosman qaparirqan, Diostaq chay pisichikuqpa waqyakusqanta uyarirqan.

²⁹Dios upallakuqtinri, ¿piñataq huchachanman? Uyanta pakaykukuqtinri, ¿piñataq rikunman? Paymi llaqtakunatapas runakunatapas kamachin,

³⁰ama millay runakuna llaqtanta kamachinanpaq, ama millay runakuna llaqtanta q'otunanpaq.

³¹Huk runachus Diosta ninman: Huchallikusqanipunin, kunanmantaqa manañan ruwasaqchu.

³²Rikuchiway mana rikusqay huchaykunata, mana allinta ruwarqani chayqa, amaña ruwasaqchu, nispa chayqa, allinmi.

³³Chay hinaqa, Diospa yuyaykusqanta mana chaskishaqtiyki, ¿yuyaykusqaykiman hina Diosqa allinkaqta qosunkimanchu? Chaytaqa qanmi yuyaykukunayki, manan ñoqachu, chay hinaqa niway yachasqaykita.

³⁴Uyariqniy yachaysapa runakuna, willawaychis, yuyayniyoq kaqpiwan niwaychis:

³⁵Jobqa manan yachaywanchu rimashan, rimasqankunapas manan reparakunchu.

³⁶Jobtaqa imanmanta imankama taripachunku, rimasqankunaqa sut'illan kashan, millay runakunaq hina.

³⁷Jobqa huchan patamanpas mana kasukuytawanmi yapaykukun, ñoqanchiswanmi pukllakun, Dios contrataq imaymanata thawtin.