Read Diospa Simin Qelqa JOB 37 Bible Online

JOB 37 - Diospa Simin Qelqa bible

JOB 37

¹Chikchi t'oqyaqtinqa sonqoyraqmi tiktikin, sonqoypas phatarqoshanman hinaraqmi kawan.

²¡Uyariychis Diospa manchay q'aqyaq kunkanta! ¡Uyariychis siminmanta kunununuy lloqsimusqanta!

³Diosmi phuyu sonqokunapi hinantinman q'aqyaqechin hallp'aq huk k'uchunmanta huk k'uchunkamaraq.

⁴Chaymantataq kunununuyllaña uyarikun hatun manchana kunkan rimariqtin, kunununumushanankamaqa q'aqyayninqa manan thaninchu.

⁵Diosninchis kunkanta kunununuchimuqtinqa musphanakunan kan, imaymanakunan ruwakun mana piqpapas entiendey atinan.

⁶Rit'itapas pampaman chayananpaqmi kamachin, paratapas sinchi kallpawan chayananpaqmi kamachin.

⁷Chay hinapin runakunaqa wasinkupi qhepakunku, chay hinapin Diospa llapa ruwasqanta yachanku.

⁸Salqa animalkunapas t'oqonkumanmi winaykukunku, chay ukhupin pakakunku.

⁹Tutuka hatun wayran uray ladomanta lloqsimun, wichay lado rit'i wayramantan chiriqa hamun.

¹⁰Diospa phukusqanwanmi chhullunkuqa ruwakun, Diospa samayninwanmi qocharayaq unukunaqa tikayan.

¹¹Paymi phuyukunata parawan ch'aranyachin, chaykunapin lliphllikiyqa q'enqochakunraq.

¹²Diospa kamachisqanmi phuyuqa pukllan, hinantin hallp'a patakunapi Diospa ima munasqanta ruwananpaq.

¹³Diosqa paratan kay pachaman chayachin runata muchuchinanpaq, wakin kutipitaq munakuyninta rikuchinanpaq.

¹⁴Job, makilla uyariykuway, Diospa imaymana musphana ruwasqankunata qhawariy.

¹⁵¿Yachankichu imaynatachus Diospa phuyukunata kuyuykachachisqanta? ¿Yachankichu imaynatachus illapata q'enqochachisqanta?

¹⁶¿Yachankichu imaynatachus phuyuq takyasqanta? Chaykunan Diospa musphana ruwasqankuna, payllapunin hunt'asqa yachayniyoqqa.

¹⁷Qanqa p'achayki ukhullapiraqmi rupharinki, uraymanta ruphashaq wayra suyuta hunt'aykuqtin.

¹⁸Chay hinari, ¿atiwaqchu Diosta yanapayta hanaq pacha kamaypi, ch'ila qespita hina ruwayta?

¹⁹Yacharichiwayku, ¿ima niykumantaq Diosta? Kunan raton tutayaqpi hina kashayku, manan ima niytapas atiykuchu.

²⁰Ñoqaqa manan rimariyllatapas munaymanchu, kawsayniytachá chinkachiyman.

²¹Wayra hamuspan inti pakaq phuyuta picharqon, hinan ima sumaqta inti k'anchamushaqtin mana pipas intita qhawarinmanchu.

²²Wichay ladopin rikhurin qoriq chhipipiyninkuna, manchana atiyniyoq Diosmi hamun.

²³Tukuy-atiyniyoqqa sinchi atiyniyoqpunin, ñoqanchisqa manan taripasunmanchu, payqa chaninmi, chanintapunitaqmi kuskachanpas, manan pitapas llakichinchu.

²⁴Chayraykun runakunaqa Diosta manchakunku, cheqaqtapunin llapan yachaysapakunapas Diostaqa manchakun, nispa.