Read Diospa Simin Qelqa JOB 4 Bible Online

JOB 4 - Diospa Simin Qelqa bible

JOB 4

¹Hinan Temán llaqtayoq Elifazqa Jobta nirqan:

²— ¿Imatapas rimapayaqtiy, phiñakuwaqchu? Manan ch'inlla kaymanñachu.

³Qan, askha runaman yachachiqpas, qan, pisi kallpayoqta kallpachaqpas,

⁴qan, urmaqkunata sayarinanpaq kallpachaqpas, qan, kumpanayakuqta sayarichiqpas,

⁵llakiq ñit'isqan rikukuspaykichu laqhoyarqapullankitaq, ñak'ariypi kaspaykichu pisi kallpayarqapullankitaq.

⁶Qanqa Diospa hunt'aq kamachinmá kanki, allin kawsaypi puriq runamá kanki, ¿imaynataq manari kanchu cheqaq hap'ipakuyniykiqa?

⁷Yuyariyyá, ¿mana huchayoqqa hukllapas chinkachisqachu karqan? ¿Maypin chanin runaqa ch'usaqyachisqa karqan?

⁸Yachaspaymi rimani, mana allin ruwaqqa, mana allin ruwasqallataqmi rikukun, runa ch'aqwachiqqa, ch'aqwallapitaqmi rikukun.

⁹Diosqa chay hina runataqa phukuspallaraqmi ch'usaqyachipun, k'arakta phiñakuspan hukpaqkama thunipun.

¹⁰Imaynatapas waqakuchun, león hinapas qaparichun, Diosmi upallachin, kiruntaraq chhalluspa.

¹¹Mana mikhunayoq león hinan wañupun, uñankunapas lliwmi ch'eqechisqa kapun.

¹²Pakayllapin huk willakuy chayarqamuwan, ñak'ayllatan chhiwchisqata uyarirqoni.

¹³Llapa runakuna misk'i puñuypi kashaqtinkun manchanata ñit'ishawasqa.

¹⁴Pasaqtapuni llaksakushasqani, tulluykunapas manaraq takyashawasqachu.

¹⁵Uyaytapas samay hina pasarpariwan, cuerpo peloykunapas ch'uskuchakuwanraq.

¹⁶¡Pichá chaypi kashasqa! Yanarayashaqtan rikurqoni, ichaqa manan reparanichu imaynachus kasqanta. Ch'inllataq karqanpas, chaymantaraq uyarirqani:

¹⁷Runari, ¿Diospa ñawpaqenpi chaninpuni kanmanchu? Wañuq runari, ¿Kamaqninpa qayllanpi ch'uyapuni kanmanchu?

¹⁸Diosqa hanaq pachapi kamachinkunapipas manan confiakunchu, Diosqa angelninkunapipas tarinmi huchata.

¹⁹¡Imaynataraqtaq hallp'amanta ruwasqa runapiqa tarinqa! Runaqa hallp'a patapi t'urumanta ruwasqa wasi hinan, ñit'ispa wañuchina thuta hinan.

²⁰Runaqa pacha paqarmanta ch'isinkama thuninan, mana piqpa reparasqanmi wañupun.

²¹Karpa chutaq waskha p'itisqa hinan runaq kawsayninqa p'itikun, yachayta mana aypaspan wañupun, nispa, nishaqta.