Read Diospa Simin Qelqa JOB 40 Bible Online

JOB 40 - Diospa Simin Qelqa bible

JOB 40

¹Señor Diosqa Jobta nillarqantaqmi:

²— Yaw, Job, ñoqa Tukuy-atiyniyoqwanmi churanakushanki, ¿ñoqata anyawankimanchu? Qanqa huchachawankin, chay hinaqa, kutichimuway, nispa.

³Hinan Jobqa nirqan:

⁴— ¿Ima niymanñataq kanpas, ñoqa mana imapaq valeqri? Aswanpas ch'inllaña kakusaq.

⁵Rimarqaniñan huk kuti, manan ima rimanaypas kanñachu, rimaniñan iskay kutipi, manan imatapas niymanñachu, nispa.

⁶Hinan Señor Diosqa tutuka hatun wayraq chawpinmanta Jobta rimapayarqan:

⁷Kunanqa allin qhari kasqaykita rikuchiway, tapusqaykunatapas kutichiway.

⁸¿Qanchu mana chanin kasqayta rikuchiwankiman? ¿Chaninmi kani nispachu huchachawankiman?

⁹Qanri, ¿ñoqamanta aswan kallpayoqchu kanki? ¿Qanpa rimasqaykiri ñoqaq hina kununununmanchu?

¹⁰Chay hinaqa, hatun atiyniyoq-kaywan p'achakuy, lliphipipiq qhapaq-atiyniykiwan p'istukuy.

¹¹Llaksakuytaraq phiñakuy, uma hoqariqkunatapas qhawarispallaraq k'umuchiy.

¹²Arí, qhawarispalla thunirpariy, millay runakunataqa maychus kasqanpi sarurpariy.

¹³Pampamanraq llapanta p'ampay, wañusqakunaq kasqanmanraq wisq'ay.

¹⁴Chay hinapin ñoqapas reqsisaq qanpa atiyniyki lliw imapipas llallichisqasuykita.

¹⁵Qhawariy, haqay hina hatun Behemot animalta, qan hina kamasqallataqmi paypas, waka hinan q'achuta mikhun.

¹⁶Qhawariy, haqay hinaraqmi wasankunapas, cheqaq kallpallayoqñan wiksanpas.

¹⁷Chupanpas cedro kurku hinaraqmi, chaki hank'unkunapas qhopuchakushanraqmi.

¹⁸Tullunkunapas broncemanta soqos hinaraqmi, chakinkunapas fierro tawnakuna hinaraqmi.

¹⁹Kayqa kamasqay animalkunaq aswan ñawpaqninmi, ñoqallapunin kani kamaqninpas wañuchiqninpas.

²⁰Salqa animalkunaq pukllanan orqokunapin mikhunanpaq q'achukunaqa wiñan.

²¹Khiska ch'aphraq llanthun ukhumanmi suchuykun, t'otora ukhukunamanmi t'uru-t'uruman winaykukun.

²²Ch'aphrakunapin pakakun, mayupi saucekunan muyuykun.

²³Jordán mayuña askhayamun chaypas, manan mancharikunchu, senqanmanña unu taripashan chaypas, llakhillan kashan.

²⁴¿Pitaq ñawsayachispa hap'irqonman? ¿Pitaq senqanmanta watucharqoytapas atinman?