Read Diospa Simin Qelqa JOB 5 Bible Online

JOB 5 - Diospa Simin Qelqa bible

JOB 5

¹Kunanqa qapariyyá, ¿pillas uyarisunki? ¿Mayqen angelmanmi hap'ipakunki?

²Mana yuyayniyoqqa phiñakuspallapunin wañun, mana yuyayniyoqqa sientekuspallapunin wañun.

³Rikullanitaqmi mana yuyayniyoqpa t'ikarisqanta, kaq ratopachataqmi wasinqa ñakasqa.

⁴Wawankunapas wikch'usqa hinan kanku, chaninchana wasipipas mana yanapaqniyoqmi kanku, chay hinapin sarunchasqa kapunku.

⁵Chaypa cosechantan yarqasqakuna mikhukapunku, khiska sonqomantawanpas lliwtan pallarqapunku, qhapaq kaynintan ch'akisqakuna ch'usaqyachipunku.

⁶Millay-kayqa manan pampamantachu phutumun, hatun llakipas manan hallp'amantachu paqarimun,

⁷aswanpas runa kikinmi chaykunata paqarichin, imaynan ninamantapas phinchikilla t'akakun hinata.

⁸Qan hina kaspayqa Diostachá waqyakuyman, paymanchá kay hina kayniyta willakuyman.

⁹¡Payqa hatuchachaq musphanakunatan ruwan! ¡Mana yupay atina milagrokunatan ruwan!

¹⁰Payqa kay pachamanmi parata chayachimun, chaywantaq hallp'ata qarpaykun.

¹¹Paymi pisichasqakunata hatunchan, paymi llakisqakunata kusichin.

¹²Paymi yuyaysapaq yuyaykusqanta qaqapachin, hinaspan paykunata pisipachin.

¹³Paymi waktasqanta ruwaqtapas llulla-kayninpi hap'irparin, chay hinapin mana chanin yuyaykusqankunata qolluchin.

¹⁴Sut'i p'unchaypin paykunataqa laqha tutapi hina purichin, chawpi p'unchaypin tutayaqpi hina thampiykachachin.

¹⁵Diosqa wakchatan wañunanmanta qespichin, awqa sonqo runakunaq makinmantan kacharichin.

¹⁶Chay hinapin wakchakunaqa wakmanta suyakunku, awqa sonqo runaq siminpas wisq'asqan kapun.

¹⁷Kusisamiyoqmi Diospa anyaykusqan runaqa, chay hinaqa, ama pisichaychu Tukuy-atiyniyoqpa kunaykusqantaqa.

¹⁸Señor Diosmi k'irin, payllataqmi hampin, makinwan nanachin chayqa, payllataqmi thanichinqa.

¹⁹Askha kutipin qespichisunki hatun llakimantaqa, chay hinapin mana chayamusunkichu mana allin kayqa.

²⁰Hatun yarqay kaqtinpas horqosunkipunin wañuymantaqa, hatun maqanakuy kaqtinpas qechusunkipunin espadamantaqa.

²¹Amachasunkin nina qallu runamanta, manan manchakunkichu hatun llaki chayamuqtinqa.

²²Asikunkin thunina p'unchay chayamuqtinqa, asikunkin yarqay p'unchay chayamuqtinqa, manataqmi manchakunkichu salqa animaltaqa,

²³chakrapi rumikunaqa manan sasachasunkichu, salqa animalkunaqa mansomanmi tukupunqa.

²⁴Wasiykipipas mana ima llakiyoqmi kawsakunki, lliw kaqniykita qhawaykuqtiykipas llapallanmi kapushanqa.

²⁵Wawaykikunapas askhapunin kapushanqa, mirayniykikunapas qora hinaraqmi kapushanqa.

²⁶Kaq kallpallaykipin wañukapunki, poqosqa trigo marq'ay hinan apasqa kanki.

²⁷Allinta rikuspan yachaspan rimayku, chay hinaqa, uyariwaypuni, hinaspa hap'iqakuy kawsayniykipi, nispa.