Read Diospa Simin Qelqa JOB 7 Bible Online

JOB 7 - Diospa Simin Qelqa bible

JOB 7

¹Kay pachapi runaq kawsayninqa mit'anipi llank'ay hinallan, llank'apakuq runaq p'unchaynin hinallan,

²ch'isiyaq ruphaypi llank'apakuq kamachiq tardeyanallantaña suyakuq hinan, llank'apakuqpa llank'ayta tukuspa pagonta suyarayaq hinan,

³ñoqapas killan-killanmi yanqapaq suyakushani, tutan-tutan muchuspaymi kaykushani.

⁴Puñuykuqtiypas tutaqa manan illariyta atinchu, illarimunantan yanqallaña suyaykushani, puñunapipas manan takyaniñachu.

⁵Aychaypas kuruq suksurqosqan kharkallañan kashan, aycha qaraypi k'iriykunan lleq-niripuwanña.

⁶P'unchayniykunan awaqpa lanzaderan hina phawashan, imaynan q'aytupas tukurqokun hinatan kawsayniypas tukukapun.

⁷Diosnilláy, yuyariy kawsayniyqa huk phukurqoyllan, manañan hayk'aqpas kusikuymanñachu.

⁸Diosnilláy, kunanqa rikushawankuraqmi, chaymantan ichaqa qan qhawariwaqtiyki mana kapusaqñachu.

⁹Imaynan phuyuqa kashaspapas ch'usaqyarqapullan, chay hinallataqmi hallp'aq sonqonman chinkaykapuq runapas, chaymantaqa manañan kutimunñachu.

¹⁰Wasinmanpas manan kutipunñachu, ayllunkunapas manan rikunkuñachu.

¹¹Chayraykun manapuni upallakuymanchu, kay wañunayayniypin qaparisaq, phiñasqa kaspaymi quejakusaq.

¹²¿Imaraykun mana kacharispa hap'iwanki? ¿Ñoqari lamar-qochachu kani? ¿Ñoqari lamar-qochapi manchakuy hatun animalchu kani?

¹³Puñunapi samaykusaqchá nishaqtiypas, puñuqtiyqa thaniykunqachá nanayniy, nishaqtiypas,

¹⁴aswantaraqmi puñukushaqtiy mancharichiwanki, imaymanawanraq musphapachiwanki,

¹⁵aswanpas kunkaymanta q'apirqapuwachunku, aswanpas wañukapusaq kawsanaymantaqa.

¹⁶¡Hina kachun! Manan kawsayta munaniñachu. ¡Samarichiway! Kawsayniymi sinchi llakikuy.

¹⁷¿Imanaqtinpunitaq qanpaqri sinchi chaniyoq runari? ¿Imanaqtinpunitaq runamantari sinchita llakipakunki?

¹⁸¿Imanaqtintaq p'unchay-p'unchayri qhawapayanki? ¿Imanaqtintaq sapa rato hinari probashallanki?

¹⁹¿Hayk'aqkamataq makillari qhawawanki? Manañan thoqayllaytapas millp'uykachiwankiñachu.

²⁰Huchallikuniña chaypas, qan, runaq kawsaynin qhawaqtari, ¿ima mana allintataq ruwayki? ¿Imanaqtinmi sapa rato hina p'anawanki? ¿Ñoqari llasa q'epichu qanpaqqa kani?

²¹¿Manachu huchaytaqa pampachaykuwankiman? ¿Mana allin ruwasqaytapas manachu pampachaykuwankiman? Kunallanmi hallp'aman chinkaykapusaq, maskhawankin, manataq kapusaqñachu, nispa.