Read Diospa Simin Qelqa JOB 8 Bible Online

JOB 8 - Diospa Simin Qelqa bible

JOB 8

¹Chaymantataq Shúa suyumanta Bildadqa Jobta nirqan:

²— ¿Hayk'aqkamataq kay hinata rimaspallari kanki, tutuka hatun wayra hina kunununuspayki?

³¿Diosri chanin-kayta q'ewinchu? ¿Tukuy-atiyniyoqri “siwk” nisqata q'ewinchu?

⁴Wawaykikunachá Dios contra huchallikurqanku riki, chaymantachá paykunata muchuchirqan.

⁵Tukuy-atiyniyoq Diosman kutirikuy, tukuy sonqoykiwantaq mañakuy.

⁶Ch'uyataqchus chanintaqchus kanki chayqa, kunanpachan Diosqa hamuspa yanapasunki, lliw ima kaqniykitapas wakmantan t'ikarichinqa.

⁷Qhapaq kayniyki kapurqasunki chayqa manan imapasraqchu qhepaman kapusunki chaywan tupachiqtiykiqa.

⁸Ñawpa runakunata tapurikuy, paykunaq yachasqankupi yuyaymanay.

⁹Ñoqaykuqa qayna p'unchay runallan kayku, manan imatapas yachaykuraqchu, p'unchayniykupas kay pachapiqa llanthu hinallan kashan.

¹⁰Paykunan ichaqa yachachisunkiman, yachasqankutapuni kay hinata willasunkiman:

¹¹¿T'otorari hatunta wiñanchu mana ceneja t'uruq kasqanpi? ¿Llach'u qorari allinta wiñanchu mana unuq kasqanpi?

¹²Chaytukuywanpas mana rutusqa q'omer kashaspallaraqmi wakin qorakunamantaqa ch'akirqapun.

¹³Chay hinallataqmi Diosta qonqarpariqkunapas wañupun, Diosmanta mana imapas yuyariq millay runaq suyakuyninpas chinkapun.

¹⁴Millay runaq suyakuyninqa ñañu q'aytu hinallan, millay runaq hap'ipakuyninqa kusikusiq llikan hinallan.

¹⁵Hap'ipaykukuyta munaqtinpas p'itikunmi, k'iraykuyta munaqtinpas ch'usaqmi tukun, nispanku.

¹⁶Millay runaqa allin qarpasqa ruphaypi wiñaq q'achu hinallan, huerta kanchapi ch'ikchimuq qora hinallan.

¹⁷Saphinkunapas qaqamanraqmi saphiykun, wiñaspapas rumitaraqmi p'ampan.

¹⁸Pillapas saphinmanta t'irarqoqtintaq, wiñasqan huertapiqa rikuypas kanñachu.

¹⁹Chay hinan millay runaq kusikuyninqa huk ratolla, rantinpitaq hukkuna rikhurimun.

²⁰Diosqa mana huchayoqtaqa manapunin saqerparinchu, millay runakunatapas manapunin yanapanchu.

²¹Payqa wakmanta asichisunkiraqmi, qanqa kusikuymanta qaparinkiraqmi.

²²Awqaykikunataqmi p'enqasqa rikukunqa millay runaq wasintaqmi thunisqa kapunqa, nispa.