Read Diospa Simin Qelqa SALMOS 10 Bible Online

SALMOS 10 - Diospa Simin Qelqa bible

SALMOS 10

¹Señor Diosníy, ¿imanaqtintaq karupi kashanki? ¿Imanaqtintaq khuyayta llakikushaqtiypas pakakunki?

²Hatunchakuspan millay runaqa wakchata qatiykachan, mana allinta ruwaq runaqa toqlla churasqanpin urmanqa.

³Millay runaqa sonqonpa munasqanmantan alabakun, qhapaq kayman sonqollikuqtan saminchan, Señor Diostataq pisichan.

⁴Millay runaqa anchaykachaspanmi Diosmanta mana yuyariq tukun. “Manan Diosqa kanchu”, nispan yuyaykun.

⁵Paymanqa ima ruwasqanpas allinmanmi rikch'akun, chaninchayniykikunataqa manan reparaqpas tukunchu, llapa awqankunatan pisicharparin.

⁶Sonqonpin nin: Manan hayk'aqpas urmaykusaqchu, manan hayk'aqpas ima mana allinpas kawanqachu, nispa.

⁷Ñakashallanpunin, llullakushallanpunin, manchachishallanpunin, millayllatapunin rimashan.

⁸Llaqtachakuna qayllapin pakaykukuspa suyapakun, mana huchallikuqtan pakallapi wañuchin. Ñawinqa mana kallpayoqtan qhamiyashan,

⁹t'oqonpi león hinan suyapashan. Wakchatan pakaylla qhamiyan qonqaylla hap'irqonanpaq, hap'irqospataq llikanman aysaykun.

¹⁰Hap'irqosqakunaqa ñit'isqan pampaman urmanku, sinchi kallpanwan atipasqa.

¹¹Millay runaqa sonqonpin nin: Diosmi qonqapun, ñawintan ch'illmiykun, manan hayk'aqpas rikunqachu, nispa.

¹²¡Señorníy, sayariy! ¡Diosníy, maqarqariy! ¡Llakichisqa runakunata ama qonqaychu!

¹³¿Imanaqtintaq millay runaqa pisichasunki: Diosqa manan cuentata mañawanqachu, nispa sonqonpi yuyaspa?

¹⁴Qanqa rikurqankipunin, qanqa rikurqankin ñak'arisqantapas muchusqantapas, chaykunata yachashaspaykiqa yanapaykunkin. Qanmanmi mana kallpayoqqa hap'ipaykukun, qanqa mana piniyoqtaqa yanapallankipunin.

¹⁵¡Millay runaq atiyninta waqllichiy! ¡Millay runata mana allin ruwasqanmanta cuentata mañay, manaña imamantapas huchachanayki kanankama!

¹⁶Señor Diosqa wiñay-wiñaypaq Reymi, suyunmantan mana iñiyniyoqkunaqa qarqosqa kanqaku.

¹⁷Señor Diosníy, huch'uyyaykukuqkunaq mañakusqantaqa uyarinkin, qanmi paykunataqa kallpachanki, makillan waqyakamusqankutaqa uyarinki.

¹⁸Mana piniyoqtapas sarunchasqatapas qanqa amachankin, hallp'amanta ruwasqa runaqa amaña astawan manchachinanpaq.