Read Diospa Simin Qelqa SALMOS 104 Bible Online

SALMOS 104 - Diospa Simin Qelqa bible

SALMOS 104

¹¡Tukuy sonqoywanmi Señor Diosta saminchasaq! Señorníy, mayna hatunmi kanki. Diosníy, qhapaq-atiywanmi, lliphipipiywanmi p'achakunki,

²k'anchaywanmi capawan hina p'istukunki. Qanmi hanaq pachata karpata hina chutarqanki,

³qanmi hanaq unu patapi wasiykita sayarichirqanki. Phuyukunatan carretaykiman tukuchinki, wayra patapin phawanki.

⁴Wayrakunatan willaqniykikunaman tukuchinki, ninaq qallusqankunatan kamachiykikunaman tukuchinki.

⁵Qanmi kay pachata allinta teqsicharqanki sayashasqanmanta ama hayk'aqpas kuyurinanpaq.

⁶Kay pachatan p'achawan hina lamar-qochawan qataykurqanki, orqokunatan unu millp'urqan.

⁷Phiñariqtiykin unuqa ayqerqan, q'aqyasqayki kunununuqtinmi usqhaylla phawarirqan.

⁸Orqokunaman wichaspa, qheswakunaman uraykuspa, maypichus kananpaq nisqaykiman chayarqan.

⁹Qorpatan unupaq churarqanki ama wasapananpaq, amaña hallp'a pachata millp'unanpaq.

¹⁰Qanmi wayq'okunamanta unuta phullpuchimunki, chaymi orqokuna chawpinta mayukuna phawan.

¹¹Chay unutan llapa salqa uywakuna ukyanku, chaywanmi salqa asnokuna ch'akiyninkuta thasnukunku.

¹²Chay mayu patakunapin phalaq animalkuna q'esachakunku, chay sach'a-sach'apin takiykunku.

¹³Qanmi hanaq pachaykimanta orqokunata paraykiwan qarpamunki, sumaq sonqo-kayniykiwanmi hallp'atapas saksaykachinki.

¹⁴Q'achutan uywakunapaq wiñachinki, q'omerkunatan runaq allinninpaq wiñachinki, chaymi hallp'amanta mikhuyta horqon,

¹⁵kallpachaykuqnin t'antatan ruwan, kusirichiqnin vinotan ruwan, uya llamp'uyachina aceitetapas ruwan.

¹⁶Señor Diospa sach'ankunamanmi allinta paran, Libanopi paypa mallkisqan cedrokunamanmi allinta ch'aqchun.

¹⁷Chaykunapin pichinchukuna q'esachakun, hatunkaqninpitaq cigüeña tiyan.

¹⁸Hatun orqokunaqa salqa cabrakunapaqmi, qaqakunapitaq purun qowikuna pakakun.

¹⁹Killatan ruwarqanki tiempokunata señalananpaq, intipas yachanmi ima horastachus haykupunanta.

²⁰Inti haykupuqtinmi tutayaykachinki, chaypin yunka llapa animalkuna wakwarimunku.

²¹León uñakunan mikhunata maskhaspa qaparinku, mikhunankutan Diosmanta mañakunku.

²²Inti lloqsimuqtinmi ripunku, hinaspan t'oqonkupi puñukampunku.

²³Hinan runaqa llank'ananman lloqsin, ch'isiyaykuykamataq llank'an.

²⁴Señor Diosníy, ¡mana yupay atiyraqmi ruwasqaykikunaqa! Llapallantan yachaywan ruwarqanki, kamasqaykikunan teqsimuyuntinta hunt'aykun.

²⁵Haqay lamar-qochaqa may hatunllañan mast'arikushan, chaypin askhallaña animalkuna wakwarishan, hatunraq huch'uyraq.

²⁶Chaypin barcokuna purin, chaypin kamasqayki Leviatanqa kashan, chaypin chay hatunkaray animalqa pukllan.

²⁷Llapallankun suyakushasunkiku tiempollanpi paykunaman mikhuchinaykipaq.

²⁸Qoykuqtiyki hinan paykunaqa chaskikunku, haywariqtiyki hinan allinkaqwan saksaykunku.

²⁹Uyaykita pakaykuqtiykiqa mancharikunkun, samayninkuta qechuqtiykiqa wañukapunkun, ñut'u hallp'amantaq tukupunku.

³⁰Kawsachiq samaywan phukuykuqtiykin kamasqa kanku, kay pachaq rikch'aynintan llanllarichinki.

³¹¡Wiñaypaq Señor Diospa qhapaq-atiyninqa kachun! ¡Señor Diosqa kamasqanwan kusikuchun!

³²Pay qhawariqtinmi kay pacha khatatatan, pay llamiykuqtinmi orqokuna q'osñirin.

³³Señor Diosmanmi kawsashaspay takisaq, Señor Diosniytan kawsanaykama yupaychasaq.

³⁴Tukuy yuyaymanasqay Señor Diospaq hina kachun, payllawanmi ñoqaqa kusikuni.

³⁵Kay pachamanta huchasapakunaqa chinkapuchunku, millay runakunaqa tukukapuchunku. Tukuy sonqoywanmi Señor Diosta saminchasaq. ¡Yupaychasqa Señor Diosqa kachun!