Read Diospa Simin Qelqa SALMOS 107 Bible Online

SALMOS 107 - Diospa Simin Qelqa bible

SALMOS 107

¹Señor Diosman graciasta qoychis, payqa allinmi, munakuyninqa wiñaypaqmi.

²Señor Diospa qespichisqankunaqa nichunku: Awqamantan Señor Diosqa qespichimuwanku,

³karu suyukunamantan huñuykamuwanku, wichaymanta, uraymanta, inti lloqsimuymanta, inti haykuymantawan, nispa.

⁴Ch'usaq ch'inneqnintan chinkasqa purirqanku, tiyanankupaq llaqtaman rina ñantan mana tarirqankuchu,

⁵yarqasqa kaspan wañunayarqanku, ch'akisqa kaspan pisi kallpayarqanku.

⁶Llaki-phutiyninkupin Señor Diosman waqyakurqanku, paytaq paykunata llakikusqankumanta horqorqan.

⁷Chaymantataq paykunata cheqan ñanninta pusarqan, maypichus tiyananku llaqtaman.

⁸Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis.

⁹Payqa ch'akichikuqmanmi ukyachin, yarqachikuqkunatan allinkunawan saksachin.

¹⁰Laqha tutayaqpin tiyasharqanku, sinchi llakiq ñit'isqan fierro cadenawan watasqa preso hina,

¹¹Diospa kamachikuyninkunata mana kasukusqankurayku, Ancha Hatun Diospa yuyaychayninkunata pisichasqankurayku.

¹²Diosmi paykunata sinchita llank'achispa k'umuykachirqan, urmaqtinkuqa manan pipas yanapaykurqanchu.

¹³Chaymi llaki-phutiyninkupi Señor Diosman waqyakurqanku, paytaq muchusqankumanta qespichirqan,

¹⁴laqha tutayaqmantan horqorqan, preso kasqankumantan kacharichirqan.

¹⁵Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis.

¹⁶Bronce punkukunatan p'akirqarirqan, fierro p'utikunatan chhallurqarirqan.

¹⁷Mana chanin ruwasqankuraykun mana yuyayniyoq kapurqanku, huchallikusqankuraykun llakipi rikukurqanku.

¹⁸Mikhuytan millakurqanku, wañuy punkumanñan chayarqanku.

¹⁹Ichaqa llaki-phutiyninkupin Señor Diosman waqyakurqanku, paytaq muchusqankumanta qespichirqan,

²⁰rimarispanmi paykunata qhaliyachirqan, aya p'ampanamantan paykunata qespichirqan.

²¹Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis.

²²Agradecekuy sacrificiokunata payman haywaychis, ruwasqankunatapas kusisqa takin-takin willariychis.

²³Lamar-qochanta barcopi puriqkunan, hatun qochapi negociaqkunan,

²⁴Señor Diospa ruwasqankunata chaypi rikurqanku, musphana kamasqankunata chay ukhupi rikurqanku.

²⁵Pay rimariqtinmi manchay wayra hatarirqan, phoqchiqeyninkunatan sayarichirqan.

²⁶Barcopi puriqkunan wichaymanraq seqarqanku, uraykamuspataq ukhumanraq chinkaykurqanku, mana allinpi kaspan q'aqchasqallaña kasharqanku.

²⁷Machasqa hinan thampiykacharqanku, tukuy yachayninkupas yanqan karqan.

²⁸Ichaqa llaki-phutiyninkupin Señor Diosman waqyakurqanku, paytaq muchusqankumanta qespichirqan.

²⁹Manchay wayratan thanichirqan, manchay phoqchiqeytan sayachirqan.

³⁰Manaña phoqchiqesqanta rikuspan kusikurqanku, Diosmi chayay munasqanku cheqasman pusarqan.

³¹Señor Diosta munakuyninmanta agradecekuychis, runakunapaq musphana ruwasqankunamanta: ¡Gracias! niychis.

³²Llaqtaq huñukuyninpi payta hatunchaychis. Kurak runakunaq huñukuyninpi payta yupaychaychis.

³³Paymi mayukunata ch'inneq pampaman tukuchin, unu pukyukunatapas ch'aki pampaman tukuchin,

³⁴ruruchiq hallp'atapas qollpa pampaman tukuchin, chaypi tiyaqkunaq millaykunata ruwasqankurayku.

³⁵Paymi ch'inneq pampata unu qocha-qochaman tukuchin, ch'aki pampata unu pukyukunaman tukuchin.

³⁶Chaypin yarqasqakunata tiyachin, paykunataq tiyanankupaq llaqtata sayarichinku.

³⁷Chakrakunatan tarpunku, uvas chakrakunatan llank'anku, askhatataq rurusqata huñunku.

³⁸Paykunatan saminchaykun, chaymi anchatapuni askhayanku, uywankupas manan pisiyanchu.

³⁹Paykunaqa, ñak'ariypi kaspan pisiyachisqa karqanku, llakiq ñit'isqan kaspan k'umuykachisqa karqanku.

⁴⁰Diosqa cheqnikunmi sarunchaqkunataqa, paykunataqa mana ñanniyoq ch'inneqnintan chinkasqata purichirqan.

⁴¹Wakchakunatan ichaqa wakcha kasqankumanta horqon, oveja t'aqakunata hinan ayllunkutapas askhayachin.

⁴²Chayta rikuspan chanin runakunaqa kusikunku, tukuy mana chanin runataq upallakapunku.

⁴³¿Pillapas yuyayniyoq kanchu? Chaykunata reparachun, Señor Diospa munakuynintapas chaninchaykuchun.